46. Nagin manampalataya si Pablu

Si Saulo ya bayintawu ya namantay sa yaming mani namati kan Esteban. A ya maniwala kan Jesus buy pampasakitin nay mani manampalataya. Naku ya sa imbalibali, pandakpên nay mani manampalataya, liyaki man o babayi, buy pan-isukul. Tinulutan yan pinakapuun pari ya maku sa Damasco amên dakpên nay mani manampalataya baydu buy ipasukul sa Jerusalem.

Kaban papakun si Saulo sa Damascu, nagpakit si Jesus kana. Nakitan Sauloy mamakasilaw wa sawang ya nakapalitêng kana. Nipalukub ya buy dilag yan nalêngêy nagsabi kanan, “Saulo! Saulo! Uysiyan pan-usigin muku yata?” Nakitbay si Saulu, “Sisabêt kan kayêk?” Nakitbay si Jesus, “Siku si Jesus ya pan-usigin mu.”

Pamakaidêng Saulu, a yina makakit. Kabay tinambay yatan mani kaawyun na papakun sa Damascu. A ya nangan o ninêm agyan dakun sabêt sa lalên tatluy allu.

Dilag gisay manampalatayay naglagyun Ananias. Pikisabyan yan Bapan Namalyari, “Maku ka sa bali ya bibiyan Saulu buy ipaluntu mu kanay gamêt mu amên makakit yan manguman.” Nuwa nakitbay si Ananias, “Panginuun, nabalitan kuy pamasakit na sa mani manampalataya.” Sinabin Bapan Namalyari kan Ananias, “Lakwên muya, ta siyay pinili ku amên makilala kun mani Judio buy kaatag pun nata mani tawu. Gawan kangku, malakêy kasakitan na madanasan na.”

Kabay inlakun Ananias si Saulo buy impaluntu nay gamêt na. Sinabi na, “Si Jesus ya nagpakit kamu sa dan, impalaku naku baydi kamu amên makakit kan manguman buy amên tanggapên muy Ispiritun Bapan Namalyari.” Nakakit yabay si Saulo buy binawtismuwan yan Ananias. Baydu ya pun nakaêkan buy nanguman pinumas-êy.

Tambêng nangaral si Saulu sa mani tawu. Sinabi na, “Si Jesus sabay siyay Anak Bapan Namalyari!” Nagtakay mani Judio gawan sabitun nuna, pampasakitin Sauloy mani manampalataya nuwa amêsên, gisa yina sa mani manampalataya. Nakisubakan êt si Saulu sa kaatag mani Judio buy impapêtêg na kallay sabay si Jesus ya Mamiligtas.

Pamakalibas dakun umnuy allu, impalanun mani Judioy patin si Saulo. In-utus lay dakun umnuy mani tawu amên magbantay sa mani pasbul balayan buy apatan si Saulo amên patin. Nuwa natandan Sauloy palanu la. Gisay yabi, ingkulsug yan mani kaluguran na sa maragul la basket buy intabuy ya sa lawasan bakud balayan. Kabay nakatakas si Saulo buy insundu nay pangaral na tungkul kan Jesus.

Naku si Saulo sa Jerusalem amên makasabi nay mani tagasunul Jesus, nuwa malimu sila kana. Kay si Bernabe, ya gisay manampalataya ya nangawyun kana sa mani apostul. Ingkwentun Bernabe kalla nu parasaantun kapas-êy mangaral si Pablo sa Damascu. Pamakayarin abitu, tinanggap pinan mani tagasunul Jesus.

Ya dakun umnuy mani manampalataya, namita sila sa Jerusalem gawan sa pamasakit buy naku sa Antioquia. Baydu la in-aral la tungkul kan Jesus. Malakêy mani tawu bayduy alwan mani Judio nuwa malakê kallay nagin manampalataya. Naku baydu si Saulo buy si Bernabe amên turwanan pun êt ta mani bayuy manampalataya tungkul kan Jesus amên luyang sila pun pumas-êy sa panampalataya la. Sa Antioquia, baydu nunan binêg ga mani Kristiyanuy manampalataya kan Jesus.

Gisay allu, kaban manalangin buy mag-ayunuy mani manampalataya ya idi sa Antioquia, sinabin Ispiritun Bapan Namalyari kallay, “Italaga yu kangku silan Bernabe buy si Saulo, ta dilag gakun ipadyag kalla.” Kabay nanalangin na mani manampalataya para kalla. Impaluntu la êt ta gamêt la kan Saulo buy kan Bernabe. Buy in-utus lay luwa amên iaral la Mangêd da Balita tungkul kan Jesus sa malakêy lugal. Naku sila sa magmikakanayun na lugal buy nangaral sa magmikakanayun na layi. Gawan sa pangaral lan Pablu buy si Bernabe, malakêy nanampalataya kan Jesus.

Kwentu sa Biblia ya ubat sa Dyag 8:3; 9:1-31; 11:19-26; 13:1-3