33. Ya Kwentu tungkul sa Manggitna

Gisay allu, nangaral si Jesus madani sa agid dagat buy malakêy tawuy nititipun sa palitêng na. Kabay nagsakay ya sa gisay bangka buy niknu ya baydun nangaral.

Paradi ya ingkwentun Jesus kalla, “Dilag gisay manggitnay namibulaglag bini. Sa pamibulaglag na, dilag bini ya nangananabu sa dan. Inlumatêng nga mani uybun manuk buy tinuktuk lay mani bini.

Dilag mani bini ya nanabu sa mabatuy luta ya ayin mayngan luta. Tambêng tinumubuy bini sa nalayab ba luta. Nuwa sên naputakan mamut ta ati, nawangêy sila, gawan ayin silan pukat pagyamutan. Kabay nangamamati sila.

Dilag kaatag bini ya nanabu sa lutay pantubwanan têmak ka madiwi. Tinumubuy bini buy tinumubu êt ta diwi, nuwa asê dinumagul la bini buy asê nanagêy gawan nakulaputan yan diwi.

Ya kaatag gaman, nanabu sila sa mangêd da luta. Tinumubu buy dinumagul la mani bini buy nanagêy. Si kaatag, nanagêy titlumpu buy si kaatag tianêmmapu buy si kaatag êt dinalan na lasi. Sikaw wa mallêngê, pakaisipin yuy abiin!”

Asê napukatan mani tagasunul ya ingkwentun Jesus. Kabay impatanda na nu sabêt ta labay sabin kwentu, “Ya bini sabay ya sabin Bapan Namalyari, ya dan nu saantu nanabuy dakun umnuy bini, sabay ya mani tawuy nallêngên sabin Bapan Namalyari nuwa a la napukatan. Kabay inlumatêng si Satanas buy intas na sa nakêm lay sabin Bapan Namalyari.

Ya mabatuy luta nu saantu nanabuy kaatag ga mani bini, sabay ya mani tawuy nakalêngên sabin Bapan Namalyari buy matula lan tinanggap pa ati. Nuwa sên nakadanas silan kasakitan buy pangusig, asê naêpêng nga panampalataya la.

Ya lutay dilag têmak ka madiwi nu saantu nangananabuy kaatag bini, sabay ya mani tawuy nakalêngên sabin Bapan Namalyari, nuwa sên naêpêng ngana, nasambut silaynan pangganakên sa biyay la, pibandiyan buy panunul sa kalabayan lawini la. Kabay asê nanagêy ya sabin Bapan Namalyari gawan asê mangakit sa biyay la.

Nuwa ya mangêd da luta nu saantu nangananabuy bini, sabay ya mani tawuy nallêngê buy naniwala sa sabin Bapan Namalyari. Buy nanagêy ya sabin Bapan Namalyari gawan mangakit sa biyay la.

Kwentu sa Biblia ya ubat sa Mateo 13:1-8, 18-23; Marcos 4:1-8, 13-20; Lucas 8:4-15