18. Niatag ga Kaarian

Sabitun nati yina si David, si nanagili kana bilang ari, sabay si Solomon ya anak na. Pinatang Bapan Namalyari si Solomon, “Sabêt ta labay mun idin ku kamu?” Sinabin Solomon na, “Labay kuy biyan mu kun kabisyasnan.” Gawan sa sinabin Solomon, natula si Bapan Namalyari kana. Kabay binyanan yan Bapan Namalyarin kabiyasnan buy siyay pinakabiyasay tawu sa buun babun luta. Binyanan ya êt Bapan Namalyarin malakêy pibandiyan. (1 Ari 3:3-15)

Impaydêng Arin Solomon na Templu sa Jerusalem. Sinunul nay palanuy dinyag bapa na ya sabay si David. Amêsên, sa panawun na ati, ayin nay Tabirnakuluy impadyag Moises awlagi. Kabay sa Templuy na mangulimên buy mag-andug ga mani tawu. Paway nan idi sa Templu si Bapan Namalyari buy allu-allu yinan kaawyun mani tawu. (1 Ari 6:1-38)

Nuwa si Solomon, malakêy babayi ya kinaidwan nay ubat sa magmikakanayun na bansa. Niras gisay libuy napag-asawa na. Sa pakapakun baydu, a nayna sinunul la utus Bapan Namalyari ya agana mag-asawan malakê. Malakêy napag-asawa nay nantan mani diyusdiyusan la. Sên natuwan nan Solomon, nangulimên ya êt sa mani diyusdiyusan mani napag-asawa na. (1 Ari 11:1-8)

Gawan sa dinyag Solomon, nanubag si Bapan Namalyari kana. Kabay bilang parusa sa dinyag na, sinabin Bapan Namalyari kana, “Nu mati kay na, ya Israel, miatag sa luway kaarian.” (1 Ari 11:9-13)

Sabitun nati si Arin Solomon, si nanagili kana bilang ari, si Rehoboam ya anak na. Sabitun nuna, pangkilalanên buun Israel ya sabay si Rehoboam ya ari la. Nuwa amêsên, nititipun sila amên magdeklamu sa bayun ari ya sabay si Rehoboam. Sinabi la, “Sabitun nabyay pun na bapa mu, magkasakit kay sa pan-ipadyag na kanyan. Matag-ay êt ta pan-ipabayad na kanyan. Nuwa nu asê masakit ta pan-ipadyag mu kanyan, magpasakup kay kamu.” (1 Ari 11:41-12:4)

Nuwa ayin naman kapukatan ya pikitbay Arin Rehoboam. Sinabi na, “Para kamuyu, masakit ta impadyag bapa ku. Amêsên, mas masakit pun ya ipadyag ku kamuyu buy lakwas pun mabayat ya parusay idin ku kamuyu!” (1 Ari 12:13-14)

Gawan sa kadawakan pag-arin Rehoboam, nagpapaway mapuy layin Israel kan Rehoboam. Kabay luway layi ya nitagan kana. Si ata luway tribu, pambêgên kaarian un Juda. (1 Ari 12:16-20)

Si abituy mapuy layi ya nagpapawa kan Arin Rehoboam, si nagin ari la sabay si Jeroboam. Si ata mapuy layi, pambêgên silan kaarian un Israel. (1 Ari 12:20)

Si Jeroboam ya ari sa kaarian Israel, pambênbênan nay mani tawuy kalabay maku sa kaarian Juda amên mangulimên kan Bapan Namalyari sa Templu baydu. Kabay si dinyag na, nanyag yan luway rebultu sa kaarian na amên akayên nay mani tawun mangulimên sa mani rebultuy dinyag na. Sa pakapakun baydu, mabayat ta kasalanan na buy kasalanan mani Israelita kan Bapan Namalyari. (1 Ari 12:28-33)

Kabay asê nikasunduy Israel buy Juda buy pawa silan mipapati.

Awlagi, sa kaarian Israel, nangadadawak ka kaganawan ari la. Malakêy mani ari ya pinatin mani kaparisu lan Israelitay kalabay magin ari.

Ya kaganawan ari sa Israel buy mani Israelita, mangulimên sa mani ribultu. Alwan kay abiin, ta makikanayun sila êt buy pan-iandug la pun êt ta sarili lan anak sa mani ribultu bilang andug sa mani diyusdiyusan.

Naubat sa layin David da nagin ari sa Juda. Dilag mangêd da nagin ari kalla ya mangulimên kan Bapan Namalyari. Nuwa malakê êt sa mani nagin ari ya nangadadawak ka dyag. Matubag sila buy mangulimên sa mani ribultu. Ya dakun umnu kalla, mamiandug pun êt sarili lan anak sa mani ribultu. Ya mani tawu sa Juda, asê nanunul kan Bapan Namalyari ta pan-ulimênên layna man na diyusdiyusan.

Kwentu sa Biblia ya ubat sa 1 Ari 1-6; 11-12