47. Pablo buy Silas sa Filipos

Kaban mamita si Saulu sa sakup Roma, si lagyuy ginamit na, Pablu. Gisay allu, pikilakun Pablu si Silas ya kaluguran na papakun sila sa Filipus amên mangaral baydun Mangêd da Balita tungkul kan Jesus. Naku sila sa gisay lugal ya nadani sa ilug. Mamakuy mani tawu baydu amên manalangin. Napagkaluguran la êt bayduy gisay babayi ya naglagyun Lydia ya gisay magtindan telay kulay muradu. Mangidu buy mangulimên ya kan Bapan Namalyari.

Sên napukatan Lydiay mensayi tungkul kan Jesus, nagpabawtismu ya buy buun pamilya na. Sinagyat na êt silan Pablu buy si Silas amên patugêlên na pun baydu sa bali na. Kabay nanugêl silayna baydu.

Pawan mamaku silan Pablu buy si Silas sa mani tawu sa lugal la panalanginan sa Filipus. Allu-allu makitan la bayduy gisay ipus ya anak ka babayi ya kilalaku kalla. Ya babayin abiin, nasêdakan yan nadawak ka ispiritu. Dilag yan kabiyasnan manuga sa kapamilatan nadawak ka ispiritu. Kabay maragul la panakitan mani amung na.

Sên nakitan na si Pablu buy si Silas, pikilalakwan na sila buy masnêg nan pan-isabi ya, “Si mani tawun ati, lingkud silan Bapan Namalyari ya Katatag-ayan! Pan-iaral la kamuyu nu parasaantu kaw iligtas Bapan Namalyari!” Piuman-uman nan pansabin na abiin. Kabay nakwan nasuluk Pablo.

Gisay allu, masnêg ga êt magsabi ya babayi. Nagsuluk ka si Pablu kana. Kabay pinag-arapan yan Pablu buy intabi nay nadawak ka ispiritu sa lawinin anak, “Sa lagyun Panginuun Jesus, sikay nadawak ka ispiritu, magtas ka sa anak.” Sa uras êt ta abitu, nagtas sana nadawak ka ispiritu sa anak.

Sadyay tubag amung anak. Tandan la nu ayin nay nadawak ka ispiritu sa anak, ayina makapanuga sa mani tawu buy gawan di, ayin nan panakitan na amung babayi.

Kabay ginuluy amung babayi si Pablu buy si Silas papakun sa mani manungkulan Roma. Binarug lay luwa bayu la insukul.

Indin silan Pablu sa nalalêlalêy sukulan buy masipit lan impabantay. Binyanan êt kayuy bitis la amên a sila mibita. Nuwa pamakayabi, agyan idi sila sa nadawak ka kabilyan, nagkanta sila pun êt pangulimên kan Bapan Namalyari.

Kaban magkanta sila, bêngat tan nangayun malakas. Nibuklat ta mani pasbul sukulan buy naaswag ga kaganawan tanekalan mani nakasukul.

Sên nipaimatay magbantay, nakitan nay nibuklat ta mani pasbul sukulan. Magpakamati yina dayi gawan indap na nitakas say mani nakasukul. Gawan nu nalyari ya abitu, tanda nay ipapati yan nipagtungkulan. Nuwa nakitan yan Pablu. Kabay sinabi na, “Agana ka magpakamati, ta abiti kay kaganawan!”

Kaban magdani kan Pablu buy kan Silas ya magbantay sukulan, manginagin ya sa limu buy pinatang na sila, “Sabêt ta sêpat kun daygên amên miligtas saku?” Sinabin Pablu, “Manampalataya ka sa Panginuun Jesus amên miligtas ka buy pamilya mu.” Pikilaku na silan Pablu buy si Silas sa bali na buy inuyasan nay mani nuka la. In-aral Pabluy Mangêd da Balita tungkul kan Jesus sa kaganawan tawuy idi baydu.

Sên nanampalatayay na kan Jesus ya magbantay buy pamilya na, binawtismuwan silaynan Pablu. In-il-an un kanên si Pablu buy si Silas buy niaawyun silan nagsaya.

Pamakawasak, imbus san mani pinunun balayan silan Pablu buy si Silas. Sinabi la sa luwa ya mita silay na sa balayan Filipus. Nuwa bayu sila namita, naku sila pun kan Lydia buy sa kaatag mani kaluguran la. Niwagaw wa Mangêd da Balita tungkul kan Jesus buy kapanlulumakê êt manampalatayay miaawyun.

Sa pamakun Pablu buy kaatag pun na mamunu sa manampalataya sa magmikakanayun na lugal, in-aral lay tungkul kan Jesus. Nanulat sila êt sa mani manampalatayay miaawyun amên papas-êyên lay nakêm mani manampalataya. Ya kaatag sulat ta ati, nagin baagin Biblia.

Kwentu sa Biblia ya ubat sa Dyag 16:11-40