25. Tinuksun Satanas si Jesus

Pamakayarin nabawtismuwan Jesus, tambêng yan pikilakun Ispiritun Bapan Namalyari sa kakyangan. Nag-ayunu ya baydu un apattapuy allu buy apattapuy yabi. Inlumatêng baydu si Satanas amên tuksun ya dayi.

Sinabin Satanas, “Nu sikay Anak Bapan Namalyari, daygên mun kanên na mani batun ati.”

Nakitbay si Jesus, “Idi sa kasulatan, ‘Alwan kay sa kanên mambumyay ya tawu, nun a sa balang sabin Bapan Namalyari.”’

Pamakayari, pikilaku yan Satanas sa têngêl templun Jerusalem. Sinabi na, “Nu sikay nabay ya Anak Bapan Namalyari, magnabu kati. Idi sa kasulatan, ‘Iutus Bapan Namalyari ya mani ang-el na ta sal-un laka ta amên a midumpul ya bitis mu sa batu.”’

Nuwa nakitbay si Jesus, “Idi sa kasulatan, ‘Agana mu subukun na Panginuun mun Namalyari.”’

Pamakayari, pikilaku yan Satanas sa matag-ay ya bung-uy buy impakit kanay kaganawan bansa buy kangêdan mani ati. Sinabi na, “Idin ku kamuy kaganawan na abiin, nu manduku buy mangulimên ka kangku.”

Nakitbay si Jesus, “Magtas kay Satanas! Gawan idi sa kasulatan, ‘Kay Panginuun mun Bapan Namalyari ya sambên mu buy suywan mu.”’

Asê natuksu si Jesus sa mani panuksun Satanas kana. Kabay inlakwanan yan Satanas. Pamakayari, inlumatêng ngaman na ang-el Bapan Namalyari buy nagsuyu kan Jesus.

Kwentu sa Biblia ya ubat sa Mateo 4:1-11; Marcos 1:12-13; Lucas 4:1-13