29. Ya Kwentu tungkul sa Ipus ya a kalabay Mamatawad

Gisay allu, namatang si Pedru kan Jesus, “Panginuun, katiumnu kun patawarên na patêl kuy pawan manyag kasalanan kangku? Makatapitu nayi?” Nakitbay si Jesus kana, “Alwan kay pitu nun a pitumpu ya tipitu.” Ya labay sabin Jesus, pawan mamatawad. Kabay ingkwentun Jesus kanay,

“Ya pag-arin Bapan Namalyari, maiparisu ya sa pag-arin gisay ari ya nipabêg sa mani ipus na amên singilin na sila sa mani nautang la. Dilag gisay ipus ya nakautang kaalagan upan gisay tawu sa lalên luwan dalan na libuy tawun.”

“Gawan a ya makabayad, sinabin ari, ‘Isaliw yu silan mipapamilya buy kaganawan pibandiyan la amên mabayaran nay utang na kangku.’ ”

“Kabay nakilunuslunus ya ipus sa ari buy nakisabi. Sinabi na, ‘Ari kuway, biyan muku pun kayêk panawun amên mabayaran kuy kaganawan utang ku kamu.’ Kabay nalunus kanay ari buy a nayna impabayad da utang na buy tinulutan naynan mita.

“Nuwa pamakabitan ipus, natbêng nay gisay kaparisu nan ipus ya nakautang kanan kaalagan apat ta buwan na upa. Dinagus naya buy ginêyêk. Sinabi na, “Mamayad kaynan utang mu kangkung e!”

“Nanduku kanay kaparisu nan ipus buy nakisabi kana. Sinabi na, ‘Biyan muku pun kayêk panawun amên mabayaran kuy kaganawan nautang ku kamu.’ Nuwa a ya nakalabay, nun a impasukul nay kaparisu nan ipus kaban a ya pun makabayad kana.”

“Dilag dakun umnuy ipus ya nakakit sa dinyag na. Kabay nalungkut sila buy naku sila sa ari amên ipatanda lay kaganawan dinyag abituy ipus.”

“Amêsên, impabêg ari ya ipus na buy sinabi na kana, ‘Ipus, sadyay dawak nakêm mu! A ku impabayad da utang mu kangku gawan nakilunuslunus ka kangku. Siyan a ka ya nalunus sa kaparisu mun ipus kaparisun pallunus ku kamu ta?’ Gawan sa tubag ari, impasukul nay nadawak ka ipus kaban a ya pun makabayad sa kaganawan utang na.”

Pamakayari, sinabin Jesus, “Parabaysên êt ta daygên Bapa kuy idi sa langit sa sisabêt man ya asê katandan mamatawad kaparisu na un buun bêkê.”

Kwentu sa Biblia ya ubat sa Mateo 18:21-35