6. Binyanan Bapan Namalyarin Asawa si Isaac

Sên tuway na si Abraham, bayintawuy nay naman si Isaac. Kabay in-utus Abraham ya ipus nay maku sa lugal mani kamag-anak na amên mangkap mapag-asawan Isaac. (Genesis 24:1-4)

Sên dakun umnuy allun nakasakay ipus sa kamelyu papakun sa lugal la sinabi kana, nakakit yan lib-ung buy tinunggên ya baydu. Sên kaawat tana, nipanlumatêng bayduy mani babayi amên mangasuy. Nanalangin na ipus kan Bapan Namalyari, ya sinabi na, “Bapan kun Namalyari, sawpan muku kayêk. Idi yaku baydi sa danin lib-ung ya pangasuyan mani dalaga. Manyawad dakun palatandaan kamu. Si dalagay mamaynêm kangku buy sa mani kamelyu ku, saba siyay nay pan-idin mun pag-asawan Isaac.” Kaban manalangin ya pun, dilag inlumatêng bayduy naiduy babayi. Rebeccay lagyu na. Si Apu na, si lakay Nahor ya patêl nan Abraham. Si Rebecca, pinaynêm nay ipus buy pinaynêm na êt ta kamelyu na. (Genesis 24:10-21)

Sên pamakayarin pinaynêm Rebeccay ipus, nuli ya. Buy nakilaku êt kanay ipus. Pamakalatêng ipus sa balin Rebecca, pikisabyan nay pamilyan Rebecca, “Nu malyari dayi kayêk, kilaku kangku si Rebecca ta amên pag-asawa yan Isaac ya anak un amung ku.” Pinatang si Rebecca un indu na, “Rebecca, kilaku ka nayi kana o asê?” Nakitbay si Rebecca, “Awu, kilaku waku kana.” Sên inlumatêng silay na sa balin Abraham, nakit Isaac si Rebecca buy tinanggap yan Isaac pag-asawa na. (Genesis 24: 22-49, 57-58, 67)

Sên nilabas sa malakêy tawun, nati yana si Abraham. Ya kaganawan impangakun Bapan Namalyari sa kasunduwan la, impangaku na êt kan Isaac. Impangaku êt Bapan Namalyari kan Isaac ka makaanak yan bapan lakê, agyan layus si Rebecca.

Nanalangin si Isaac para kan Rebecca. Sinabi na, “Bapa, nu kalabayan mun kayêk, makaanak kay.” Indin naman Bapan Namalyari ya inyawad na, ta nangalêk si Rebecca buy kambal pun êt ta anak la. Nuwa kaban idi sila pun sa bitukan indu la, mipapati silay na. Kabay nanalangin si Rebecca, “Bapa kun Namalyari, sabêt ta ata malalyari sa maanak ku?” (Genesis 25:21-22)

Nakitbay si Bapan Namalyari kan Rebecca, “Magin luway maragul la bansay mani anak mu. Nuwa si bungsu, sabay ya pagsuywan panganay.” (Genesis 25:23)

Inlumatêng nganay allun panganak Rebecca. Naudit buy masabut ta balat panganay. Pinalagyunan lan Esau wa kulaw. Ya bungsuy naman, nakatalan ya sa bitis Esau. Jacob ya impalagyu la sa bungsu. (Genesis 25:24-26)

Kwentu sa Biblia ya ubat sa Genesis 24:1-25:26