17. Ya Kasunduwan Bapan Namalyari buy si David

Dilag gisay liyaki sa Israel. Si lagyu na, Saulu. Sabay siyay nunan ari sa Israel. Matag-ay ya buy mangêd da pangaliyaki na. Sa nuna nan pamunu, mangêd da dinyag na. Nuwa sa kinakadangan na panawun, dinumawak ka pamunu na buy a nayna pansunulun na kalabayan Bapan Namalyari. Kabay si dinyag Bapan Namalyari, namili yan gisay liyaki ya sabay ya isagili na kana. (1 Samuel 8:19-9:2)

Si David da napilin Bapan Namalyarin kasagilin Saulu. Kay gisa yan magpastul tupa. Nuwa bayu ya nag-ari sa Israel, paradi ya nalyari kana. Kaban magpastul yan tupa, dinuyung mani matubag ga ayup pa mani tupa na. Kabay si dinyag David, pinati nay mani matubag ga ayup. Si si David, nayêpay nakêm na, matinêk, buy manampalataya ya kan Bapan Namalyari. (1 Samuel 16:7-13; 17:34-37)

Sabitun bayintawu pun si David, inlabanan nay gisay iganti ya sabay si Goliat. Si si Goliat, magaling yan sundulas, matapang buy napas-êy, buy 3 metrun tag-ay na! Nuwa napatin David si Goliat sa kapamilatan tirador buy sa sawup Bapan Namalyari. Kabay niligtas sa mani Israelita. (1 Samuel 17:1-56)

Amêsên, si Arin Saulu, kinasêman na si David buy labaylabay na yan patin. Gisay allu, nakun nanuday si Saulo sa lêyang nga pagtagwan David. Asê nakitan Saulo si David, nuwa si si David, nakitan na si Saulo. Kaban magpaynawa si Saulo, pakanawan nagdani kana si David. Ta sa uras sa abitu, nu labay naya dayin patin si Saulo, mapati naya. Nuwa si dinyag na tana, nangginit yatan pêrad yaming Saulo gawan a na labay magin ari ya sa parabayduy paralan. (1 Samuel 18:5-16; 24:1-21)

Sa kapupusan, nati si Saulo sa gisay laban. Sa pakapakun baydu, si David da nagin ari sa Israel. Si si David, mangêd yan ari buy labaylabay yan mani tawu. Pinagpala yan Bapan Namalyari buy malakêy laban ya nanambut ya gawan sa sawup Bapan Namalyari kana. Buy si balayan Jerusalem sabay ya nagin capitulyu un Israel. Sa panawun pag-arin David, nagin mabandi buy mapas-êy ya buun Israel. (1 Samuel 31:3-6; 2 Samuel 5:1-5)

Sa lalên 400 na tawun na nilibas, pigêgtan mani Israelitay Tabirnakulu, ta abiin na panggamitin lan pangulimênan buy pamiandugan lan mani pan-idin la kan Bapan Namalyari. Nuwa amêsên, labay Arin David da mamipaydêng yan maragul la Templu sa Jerusalem ta amên mangulimên buy mag-andug sila baydu. (2 Samuel 7:1-2)

Nuwa impalakun Bapan Namalyari si propeta Natan kan David. Sinabi na, “Paradi ya pan-ipasabin Bapan Namalyari kamu. Gawan gisa kan sundalus buy malakêy napati mu, alwan sikay manyag Templu, nun a anak mina man. Nuwa paraman baydu, pagpalên kata pun êt. Buy alwan kay abiin, ta si mani layi mu, pawa silan miknu sa trunu bilang ari sa Israel. Buy maubat êt sa layi muy Mamiligtas ya lumatêng!” (2 Samuel 7:5-16)

Sên nalêngên David ya sinabin Natan, tambêng yan nagpasalamat kan Bapan Namalyari gawan para kana, kangêdan buy karangalan na impangakun Bapan Namalyari. Nuwa ya mani Israelitay naman, mangêtêng sila pun 1,000 tawun bayu lumatêng nga Mamiligtas. (2 Samuel 7:18-29)

Mangêd da pag-arin David buy pinagpala yan Bapan Namalyari. Nuwa sa kapupusan, nakadyag yan mabayat ta kasalanan sa pangêlêw Bapan Namalyari. (2 Samuel 8:1-15)

Gisay allu, kaban mallumaban na mani sundalus na, nagbabang-uwan naman mamabêlêw si David sa bali na. Pamakaimata na, nakitan nay gisay babayi ya magpaluyuy naidu-idu. Si lagyu na, Batseba. (2 Samuel 11:1-3)

Imbis saman ipakarayu nay pangêlêw na, si dinyag na, impabêg naya. Pamakalatêng Batseba, ginêtan naya buy impauli naya. Pamakalibas dakun umnuy duminggu, impasabin Batseba kan David da siyay bapan imbuktut na. (2 Samuel 11:4-5)

Si si Batseba, dilag yan asaway gisa sa mani magaling nga sundalus David. Si lagyu na, Urias. Impabêg David si Urias ubat sa laban. Sên inlumatêng ngina, sinabin David kana, “Muli kayna pun, ta gêtan muy asawa mu.” Nuwa sinabin Urias sa sarili na, “A ku kalabay, ta kapalunus ya mani kaawyun kun sundalus ya idi sa laban.” Kabay a ya nuli. Si dinapat taman David, sinulatan nay pinunun mani sundalus ya ipagtan si Urias sa nangapapas-êy ya kalaban amên mati yina. Sinunul laman pinunun mani sundalus ya sinabin David. Kabay nati si Urias, agyan magaling yan sundalus. (2 Samuel 11:6-17)

Sên nati ya si Urias, si dinyag Arin David, tinangên na si Batseba. Pamakalibas dakun umnuy buwan, in-anak Batsebay gisay kulaw wa liyaki. Nuwa ya pamikikanayun David kan Batseba sabaytun nabiyay pun si Urias buy ya pamipapati na kan Urias, sabay ya ingkatubag Bapan Namalyari kana. Kabay impalakun Bapan Namalyari si propeta Natan kan David. Sinabi na, “David day, nangasalanan ka kan Bapan Namalyari.” Pamakalêngên David sa sinabin Natan, nagsisi ya buy pinatawad ya êt Bapan Namalyari sa kasalanan na. Paubat ta baydu, agyan malakê pun na kasakitan na mangadanasan na, nanampalataya ya pun êt kan Bapan Namalyari. (2 Samuel 11:26-12:15)

Nuwa bilang parusa sa kasalanan na, si nalyari, nati ya anak David kan Batseba buy nasiray pamibêbêtêk pamilya na buy asêy na napas-êy ya pag-ari na. Nuwa agyan nakadyag gan kasalanan si Arin David, pawan napas-êy ya pangakun Bapan Namalyari kana. Amêsên, nakaanak si Batseban gisay liyaki ya pinaglagyunan nan Solomon. (2 Samuel 12:17, 24)

Kwentu sa Biblia ya ubat sa 1 Samuel 10; 15-19; 24; 31; 2 Samuel 5; 7; 11-12