34. Ya Kaatag pun na Kwentun Jesus

Malakê pun na ingkwentun Jesus tungkul sa pag-arin Bapan Namalyari. Sinabi na, “Ya pag-arin Bapan Namalyari, maiparisu ya sa gisay but-un mustasa ya intanêm sa panggitnan. Tanda yuy si but-un mustasa, sabay ya nabêlêngbêlêng sa kaganawan but-u.”

Nuwa nu tumubu ya, pakadyag yan gisay kayu. Kabay ya sangan ati, mapanyagan yan salay un mani uybun manuk.”

Dilag pun ingkwentu si Jesus. Sinabi na, “Ya pag-arin Bapan Namalyari, maiparisu ya sa pamalbag ga pikisukit gisay babayi sa ginêmês sa arina angga sa mapalbag nay arina ya pandaygên tinapay.”

“Ya pag-arin Bapan Namalyari maiparisu êt sa gisay pibandiyan na nakakali sa gisay panggitnan. Sên nakitan gisay liyaki ya ati, ingkali nan manguman. Matula-tula ya. Kabay insaliw nay kaganawan pibandiyan na buy sinaliw nay abituy panggitnan.”

“Ya pag-arin Bapan Namalyari, maiparisu ya êt sa gisay mangalakal mani perlas. Mangkap yan mamangêd da perlas ya makamalkamal. Sên nakitan nay perlas ya pantêkapên na, insaliw nay kaganawan pibandiyan na buy sinaliw nay abituy perlas.”

Ingkwentu êt Jesus ya tungkul sa mani tawuy magtiwala sa mangangêd da diyag la buy pandustakên na kaatag ga tawu. “Dilag luway liyaki ya naku sa Templu amên manalangin. Si gisa, maningil buwis buy si gisa êt, pinunu sa simbaan.”

“Nanalangin na pinunu sa simbaan. Sinabi na, ‘Bapan Namalyari, magpasalamat taku kamu tagawan a ku makasalanan kaparisun mani manakaw, mamurayit o makikanayun, o kaparisun ati ya maningil buwis.”’

“Alimbawa sa gisay duminggu, katilwa kun mag-ayunu buy mam-i yaku êt ikapu ku sa kaganawan naupa ku.”

Nuwa si abituy maningil buwis, nakaidêng ya sa madayu buy nanalangin. Gawan sa dêng-êy na, a ya makaêlêw sa langit. Kabay pan-apuapun nay pagaw na. Ya pansabin na, ‘Bapan Namalyari, malunus ka kangku, ta gisa kun makasalanan.’

“Pamakayari, sinabin Jesus, ‘Pansabin ku kamuyu. Inlêngên Bapan Namalyari ya panalangin maningil buwis buy matinêk kina sa pangêlêw na. Nuwa si abituy pinunu sa simbaan, asê inlêngên Bapan Namalyari ya panalangin na. Iyêpan Bapan Namalyari ya mapagmatag-ay buy itag-ay nay mapagpayêpay nakêm.”’

Kwentu sa Biblia ya ubat sa Mateo 13:31-33, 44-46; Marcos 4:30-32; Lucas 13:18-21; 18:9-14