41. Pinabyay Bapan Namalyari si Jesus
Pamakayarin impakun mani sundalus si Jesus sa krus, sinabin mani asê maniwalay pinunun mani Judio kan Pilatu, “Gobernador, naganaka yan na kalaraman tawun abiin sabitun nabyay yapun. Sinabi nay pamakayarin tatluy allu, mabyay yan manguman. Kaylangan ipabantay ya pinilbêngan kana amên mapilmiyan tamuy asê malimêd mani tagasunul nay lawini na buy a sila makadyag kwentuy nabyay yan manguman.”
Pikitbayan silan Pilatu, “Mipikilaku kaw dakun umnuy mani sundalus buy papakabantayan yun mangêd da pinilbêngan kana.” Kabay pinigtan lan pamigtay maragul la batuy pinanakêp la sa lubut lêyang buy impabantay sa mani sundalus amên mapilmiyan na ayin makalimêd sa lawinin Jesus.
Pamakayarin in-ilbêng si Jesus pamakawasak, Alluy nan Pagpaynaway abitu. Sa Allun Pagpaynawa, pan-ibawal mani Judioy maku sa pamilbêngan. Kabay asê nilakuy mani tagasunul na sa pamilbêngan. Pamakamaranun Duminggu, nakuy mani babayi sa pinilbêngan kan Jesus amên punwan pabangi ya lawini na.
Kaban papakun sila sa pinilbêngan, bêngat tan nangayun. Gisay ang-el Panginuun ya nagtabuy ubat sa langit. Nanuwad yan kimat ta mamakasilêw. Imbulid nay batuy pinanakêp sa pinilbêngan buy niknu ya sa batu. Sa sadyay limun mani sundalus, nabungsul sila.
Pamakalatêng mani babayi sa pamilbêngan, sinabin ang-el kallay, “Agana kaw malimu. Ayin na baydi si Jesus. Nabyay yinan manguman kaparisun sinabi na. Elêwên yuy pinilbêngan kana.” Inêlêw wabay mani babayi ya pinikalêkan kan Jesus. Ayin nana baydu si Jesus!
Sinabin ang-el sa mani babayi, “Mita kawna buy ipatanda yu sa mani tagasunul la nabyay yan manguman si Jesus buy muna yina kalla sa Galilea.”
Limu buy sayay matanam mani babayi. Nuwayuy mani babayi papakun sa mani tagasunul amên ikuwentu lay mangêd da balita.
Kaban papakun na mani babayi sa mani tagasunul Jesus amên sabin na mangêd da balita, nagpakit kalla si Jesus buy inulimên laya. Sinabin Jesus, “Agana kaw malimu. Mita kawna buy ipatanda yu sa mani tagasunul kuy maku sila sa Galilea buy makitan lakina baydu.”
Kwentu sa Biblia ya ubat sa Mateo 27:62-28:15; Marcos 16:1-11; Lucas 24:1-12; Juan 20:1-18