49. Ya Bayuy Kasunduwan Bapan Namalyari buy mani Tagasunul na

Gisay ang-el ya nagsabi sa gisay dalagay maglagyun Maria ya mianak yan gisay anak ka liyaki buy bêgên yan Anak Bapan Namalyari. Kabay nabuktut yabay si Maria gawan sa kapangyarian Ispiritun Bapan Namalyari. Agyan pun dalaga ya, nakaanak yan kulaw wa liyaki ya impalagyu sa kulaw, Jesus. Labay sabin, si Jesus, tawu ya buy Namalyari ya.

Malakêy mamakaupapas sa dinyag Jesus ya magpapêtêg ga sabay siyay Namalyari. Agyu nan mita sa babun lanêm. Agyu na êt ta patgênên na bagyu. Namaiyul ya êt nipagsakit, nipatas yan nadawak ka ispiritu sa lawinin tawu, buy pinabyay na êt ta mani nati. Pinakan na êt ta maigit limay libuy tawu sa kapamilatan kay lilimay tinapay buy luluway kênan lanêm.

Biyasan manuru si Jesus, makapangyarian na sabi na gawan Anak yan Bapan Namalyari. Inturu nay sêpat tamun kaidwan na kaparisu tamu kaparisun pangidu tamu sa sarili tamu.

Inturu na êt ta sêpat mun kaidwan na Bapan Namalyari un igit sa kaganawan buy igit pun sa pibandiyan mu.

Sinabi pun êt Jesus ya kaarian Bapan Namalyari, luyang maulaga pun sa dakun sabêt man na bagay baydi sa babun luta. Ya pinakamaulaga para sa gisay tawu, ya miawyun ya sa kaarian Bapan Namalyari. Amên miawyun sa kaarian Bapan Namalyari, kaylangan mu pun miligtas sa mani kasalanan mu.

Nanuru êt si Jesus sa kaatag ga tawu, tinanggap laya buy niligtas sila kaban si kaatag gaman, asê. Sinabin Jesus ya kaatag ga tawu, maiparisu sila sa mangêd da luta. Tinanggap lay Mangêd da Balitan Jesus buy niligtas sila. Ya kaatag tawu, maiparisu sa nakdêy ya luta sa dadanan, nu saantu asê makapagyamut ya sabin Bapan Namalyari buy asê makapanagêy. Sabay silay mani tawuy asê kalabay mananggap sa mensayi tungkul kan Jesus buy a sila miawyun sa kaarian Bapan Namalyari.

Inturun Jesus ya kakaidwan Bapan Namalyari ya mani makasalanan. Labay na silan patawarên buy maibilang na sila sa mani anak na.

Sinabi êt Jesus kantamu ya nasulapu si Bapan Namalyari sa kasalanan. Sên nangasalanan si Adan buy si Eba, agyan na mani kaapu-apuan la, nidamay yana sa mani kasalanan la. Gawan baysên, ya mani tawu baydi sa babun luta, nangasalanan nana buy nipapawa kan Bapan Namalyari. Kabay ya kaganawan tawu, nagin kapatin Bapan Namalyari.

Nuwa gawan kakaidwan Bapan Namalyari ya kaganawan tawu sa babun luta, indin nay kagisagisay Anak na amên nu sisabêt man na manampalataya kana, a ya mipakabili sa ayin katganan na kaparusan nun a mabiyan yan biyay ya ayin katganan.

Gawan sa mani kasalanan mu, sêpat kan mati. Sêpat dayin manubag si Bapan Namalyari kamu, nuwa impawês na tanay tubag na kan Jesus ya sêpat dayin sika ya katubagan na. Sabitun nati si Jesus sa kurus, tinanggap nay pamarusa ya sêpat dayi kamu.

Asê nangasalanan si Jesus, nuwa pinili nay maparusan ya buy mati bilang ganap pa andug amên mapatawad da mani kasalanan mu buy kasalanan kaganawan tawu baydi sa babun luta. Gawan indin Jesus ya sarili na, patawarên Bapan Namalyari ya agyan parasaantu pun kadawak ka kasalanan mu.

A ka mailigtas un mangangêd da diyag mu. Ayin kan madiyag amên mabiyan kan pamikibêtêk kan Bapan Namalyari. Kay si Jesus ya makapitas un kasalanan mu. Kabay sêpat kan maniwala ya Anak Bapan Namalyari si Jesus. Sêpat dayin sikay mati, nuwa siyay nati sa krus para kamu buy pinabyay yan manguman Bapan Namalyari.

Iligtas Bapan Namalyari ya kaganawan manampalataya buy mananggap kan Jesus bilang Panginuun, nuwa a na iligtas ya asê manampalataya kana. Asê maulaga nu mabandi ka o kalulu, liyaki o babayi, anak o tuwa, o agyan antuy bibiyan mu. Kakaidwan kan Bapan Namalyari buy labay nan manampalataya ka kan Jesus amên magin mangêd da pamikiawyun mu kana.

Pansagyatên kan Jesus ya manampalataya ka kana buy magpabawtismu ka. Maniwala ka nayin si Jesus ya Mamiligtas, ya kagisagisay Anak Bapan Namalyari? Maniwala ka nayin makasalanan ka buy sêpat kan parusan Bapan Namalyari? Maniwala ka nayin nati si Jesus sa krus amên itas sa mani kasalanan mu?

Nu nanampalataya kayna kan Jesus buy sa dinyag na para kamu, gisa kaynan manampalataya! Inligtas kay nan Bapan Namalyari sa kadlêman Satanas buy gintan na kay na sa kaarian sawang. Intas san Bapan Namalyari ya manan pamibiyaybiyay muy makasalanan buy binyanan na kan bayuy pamibiyaybiyay ya matinêk.

Nu manampalataya kayna, pinatawad dan Bapan Namalyari ya mani kasalanan mu gawan sa dinyag Jesus. Amêsên, kaluguran kaynan Bapan Namalyari, alwa kaynan kapati.

Buy bilang kaluguran Bapan Namalyari buy lingkud Jesus ya Panginuun mu, labay minan sunulun na mani pan-ituru na kamu. Agyan manampalataya kayna, mangatuksu ka pun êt manyag kasalanan, nuwa tapat si Bapan Namalyari kamu. Kabay sinabi na nu isabi muy mani kasalanan mu kana, patawarên naka. Biyan na kan pas-êy amên malabanan muy kasalanan.

Pansabin Bapan Namalyari kamuy pawa kan manalangin, pawa kan mamasan Sabi na buy ulimênên ya kaawyun na mani kaatag ga manampalataya buy isabi mu sa kaganawan ya mani dinyag na para kamu. Ya kaganawan abiin, makasawup kamu amên pumas-êy ya pamikibêtêk mu kan Bapan Namalyari.

Kwentu sa Biblia ya ubat sa Roma 3:21-26, 5:1-11; Juan 3:16; Marcos 16:16; Colosas 1:13-14; 2 Corinto 5:17-21; 1 Juan 1:5-10