14. Kinabitan tan mani Israelita un mamita sa kakyangan

Sên natanggap pa man mani Israelitay mani utus Bapan Namalyari, inawyunan na sila sa pamita la papakun sa lugal la impangaku na kalla. Buy idi ya êt sa ulap pa mumuna kalla. (Exodo 40:36-38)

Sabitun nuna, impangakun Bapan Namalyari kallan Abraham, Isaac buy kan Jacob ya idin nay lugal Canaan kalla buy sa mani layi la. Nuwa dilag mani tawuy manugêl baydu ya pambêgen lan Cananeo. Si ati silay mani Cananeo, a sila maniwala kan Bapan Namalyari, ta si pan-ulimênên la, mani diyus-diyusan buy kaatag ga mani bagay. (Deuteronomy 34:4)

Sinabin Bapan Namalyari sa mani Israelita, “Kaylangan ipatas yuy mani Cananeo sa lugal la abitu. Agana kaw makipagkasundu kalla. Agana yu sila pag-asawa. Kaylangan sirên yuy mani diyusdiyusan la. Nu a yu sunulên na utus ku kamuyu, ulimênên yinay mani diyusdiyusan la. Sa parabaydu, alway nan sikuy pan-ulimênên yu.” (Exodo 34:11-16)

Sên narani yay mani Israelita sa Canaan, namili si Moises un tisay lawyaki ya ubat sa labinluway layin Israel. In-utus silan Moises, ya sinabi na, “Maku kaw sa lugal Canaan, nuwa a kaw magpakit. Elêwên yuy lugal nu mangêd o asê. Buy êlêwên yu êt ta mani tawuy manugêl baydu nu mangêd silan makilaban o asê.” (Bilang 13:1-20)

Si mani in-utus Moises, binuyan lay lugal Canaan un apattapuy allu. Pamakaudung la, sinabin mapu, “Baydu sa Canaan, mangêd da luta buy malakêy inggitnay maêkan! Nuwa a kitamu malyarin makilaban kalla, tagawan napas-êy ya mani balayan baydu. Mangatag-ay ya mani tawu ya manugêl baydu! Nu lumaban kitamu kalla, kay mati kitamu!” (Bilang 13:21-29, 31)

Nuwa dilag pun êt luway katawuy naku baydu ya si Caleb buy si Josue. Sinabi la, “Pêtêg ga mangatag-ay buy nikapapas-êy ya mani tawuy manugêl baydu, nuwa agyu tamu silan sambutên, ta si Bapan Namalyari ya lumaban kalla para kantamu.” (Bilang 13:30)

Nanubag ga mani tawu kallan Moises buy kan Aaron. Sinabi la, “Uysiyan gintan yu kay yadi ta? Mangêd pun na idi kay sa Egiptu kaysa mati kay baydi buy mani asawa yan buy maanak yan.” Nuwa si Moises, Aaron, Josue, buy si Caleb, nakilunuslunus sila sa mani Israelita, ya sinabi la, “Makisabi kay kamuyun agana kaw manalungat kan Bapan Namalyari!” Nuwa sinabin mani tawu, “A yan labay sikaw wa mamunu kanyan. Patin yan kaw buy mamili kay bayun mamunu kanyan amên miudung kay sa Egiptu.” (Bilang 14:1-4)

Kabay nanubag si Bapan Namalyari sa mani Israelita. Mamakuni bengat tan sinumawang sa Tolday Pagtipunan ya sabay ya sawang Bapan Namalyari. Sinabi na kan Moises, “Kay silan Caleb buy si Josue ya makasun sa lugal la impangaku ku kamuyu. Buy ya kaganawan nag-idad da luwampu patag-ay, kinabitan la tan mita sa kakyangan angga sa mati sila. A sila makasun sa lugal la impangaku ku kamuyu.” (Bilang 14:10, 27-35)

Sên nalêngên mani tawuy abiin, nalungkut sila gawan nangasalanan sila. Kingwa lay mani almas la ta amên maku sa Canaan buy makilaban. Nuwa sinabin Moises kalla, “Agana kaw maku baydu, ta a kaw sawpan Bapan Namalyari!” Nuwa a sila nallêngê kan Moises. (Bilang 14:39-44)

Nasambut sila buy malakêy nati kalla, gawan a sila sinawpan Bapan Namalyari. Kabay sa lalên apattapuy tawun, ya nitagan kalla, nag-udung sila buy kinabitan lan mamita sa kakyangan. (Bilang 14:44-45)

Agyan idi sila sa kakyangan, indin Bapan Namalyari ya mani kaylangan la. Allu-allu pambiyan silan Bapan Namalyari un tinapay ya naubat sa langit. “Manna” ya impalagyu la sa tinapay. Binyanan sila êt Bapan Namalyarin puyu amên makaêkan silan karni. Sa lalên apattapuy tawun, asê nasiray yaming la buy isteping, gawan sa pallingun Bapan Namalyari kalla. (Exodo 16:12-15, 35; Deutoronomy 8:3-4)

Agyan idi sa kakyangan ya mani Israelita, binyanan silan Bapan Namalyarin lanêm. Nuwa si ati silay mani Israelita, nagdiklamu sila pun êt kan Bapan Namalyari buy kan Moises. Pakan tuparên naman Bapan Namalyari ya mani impangaku na kallan Abraham, Isaac, buy kan Jacob. (Bilang 20: 2-7)

Gisay allu, ayin mainêm ma mani tawu. Kabay sinabin Bapan Namalyari kan Moises, “Pakisabyan muy batu buy dilag mag-awas sa lanêm ma maubat baydu.” Nuwa asê sinunul Moises ya sinabin Bapan Namalyari kana, ta katilwa nan binarug têkên nay batu buy a nay naman pikisabyan na ati. Dilag inumawas sa lanêm ya naubat sa batu, nuwa nanubag si Bapan Namalyari sa dinyag Moises. Sinabin Bapan Namalyari kana, “Gawan a mu sinunul la sinabi ku kamu, a ka makasun sa lutay impangaku ku.” (Bilang 20:8-12)

Pamakayarin apattapuy tawun, si kaganawan mani tawuy nanubag kan Bapan Namalyari, nati yana sa kakyangan. Nilatêng sila sa danin lugal la impangakun Bapan Namalyari. Sa panawun na abaytu, tuway na si Moises. Kabay pinilin Bapan Namalyari si Josue amên sabay siyay mangawyun sa mani tawu. (Deuteronomy 34:9; 18:15)

Pinasukpan Bapan Namalyari si Moises sa gisay kakatag-ayan na bung-uy amên mabatsawan nay lugal la impangaku na kalla. Nuwa si si Moises, a ya nidaus baydu, ta nati yina sa bung-uy. Kabay naglungkut ta mani tawu sa tatlumpuy allu. Pamakayarin paglungkut la, si Josue yay mamunu kalla. Nagin mangêd da pinunu si Josue gawan manampalataya ya buy manunul ya kan Bapan Namalyari. (Deuteronomy 34:1-9)

Kwentu sa Biblia ya ubat sa Exodo 16-17; Bilang 10-14; 20; 27; Deuteronomio 34