24. Binawtismuwan Juan si Jesus

Sên dinumagul la si Juan, napakadyag yan propeta. Manugêl ya sa kakyangan. Si pangkanên na, durun buy pulut panilan. Ya yaming na, dyag sa sabut kamelyu.

Malakêy tawuy mamaku kan Juan sa kakyangan amên mallêngê sa pansabin na. Pawa nan pansabin na paradi, “Pagsisyan yu buy lakwanan yuy mani kasalanan yu tagawan madani yay pag-arin Bapan Namalyari.”

Sên nalêngê lay pansabin Juan, malakêy tawuy nagsisi sa mani kasalanan la buy nagpabawtismu. Malakê êt ta mani pinunu buy mani parin Judio ya naku baydu amên magpabawtismu. Nuwa a la insabi ya mani kasalanan la buy a sila nagsisi.

Kabay sinabin Juan kalla, “Sikaw wa nangadadawak buy mapagtalingkayu kaparisun lupung! Magsisi kawna buy ibayu yinay ugali yu tagawan putusun buy ulamên Bapan Namalyari ya kaganawan puun kayuy asê managêy.” Dinyag Juan na mani insabin propeta ya paradi, “Dilag gakun iutus ya gisay propeta ya muna kamu buy mil-an bêkên mani tawu amên mallenge kamu.”

Pinatang dakun umnuy Judio si Juan, “Sika nayi ya Mamiligtas sa lumatêng?” Nakitbay si Juan, “Alwan sikuy Mamiligtas, nuwa dilag gisay lumatêng nga mas makapangyarian pun kangku. A ku sêpat magin ipus na buy a ku sêpat mantan sandalyas na.”

Pamakawasak, inlakun Jesus si Juan amên magpabawtismu. Sên nakitan Juan si Jesus, sinabi na sa mani tawu, “Elêwên yu. Abiti yay Tupan Bapan Namalyari ya sabay ya mamitas kasalanan mani tawu.”

Sinabin Juan kan Jesus, “Alwan sikuy sêpat mamawtismu kamu. Sikay naman na sêpat mamawtismu kangku.” Nakitbay si Jesus, “Kaylangan mu kun bawtismuwan, gawan abiin na sêpat tan daygên.” Kabay binawtismuwan yan Juan agyan asê nangasalanan si Jesus kanuman.

Sên nabawtismuwan na si Jesus, nagsalwang ya sa lanêm. Buy nag-ugpa kanay Ispiritun Bapan Namalyari ya nanuwad gisay pati-pati buy dilag êt gisay tunuy ya ubat sa langit ya nagsabi, “Ati ya anak ku ya kakaidwan ku buy kapapaidu kangku.”

Bayu pun magpabawtismu si Jesus kan Juan, sinabi yan Bapan Namalyari kanay, “Magtabuy ya Ispiritun Bapan Namalyari buy mag-ugpa ya sa gisay bawtismuwan mu. Sabay siyay Anak ku.” Gigisay Bapan Namalyari, nuwa sên binawtismuwan Juan si Jesus, nakit nay Bapan Namalyari sa tatluy pangatawu. Nalêngê nay nagsabi si Bapan Namalyari, nakit nay Anak Bapan Namalyari ya si Jesus, buy nakit nay Ispiritun Bapan Namalyari ya nag-ugpa kana.

Kwentu sa Biblia ya ubat sa Mateo 3; Marcos 1:9-11; Lucas 3:1-23