37. Pinabyay Jesus si Lazaru

Gisay allu, nabalitan Jesus ya si kaluguran nay si Lazaru nagdilag yan sakit ya asina maulwan. Si ati si Lazaru, dilag yan luway patêl la babayi, si Marta buy si Maria, ya kaluguran êt Jesus. Sên natandan Jesus sa ati, sinabi na, “Ya sakit ta idi kana, alwan kamatyan na kayaryan na, nun a abiin na magin sangkan amên maulimên mani tawu si Bapan Namalyari.” Kaidwan Jesus ya mani kaluguran na, nuwa nabuyutan nan luway allu bayu na nalaku si Lazaru.

Pamakayarin luway allu, sinabin Jesus sa mani tagasunul na, “Mag-udung kitamina sa prubinsyan Judea.” Nakitbay ya mani tagasunul na, “Manuru, sabêt pun na labay mun udungun sa Judea pakan labay kan patin mani Judio baydu!” Sinabin Jesus, “Ya kaluguran tamuy si Lazaru, mamabêlêw ya, nuwa kaylangan ku yan pêwên.”

Sinabin mani tagasunul Jesus, “Panginuun, nu kay mamabêlêw ya, umiyul ya pun.” Kabay sinabi yan Jesus, “Nati yana si Lazaru. Nuwa magpasalamat takun ayin naku baydu amên sa kapamilatan daygên ku, luyang kaw pun maniwala kangku.”

Pamakalatêng Jesus sa balayan lan Lazaru, apatta allu naynan nati. Timbêng yan Marta buy sinabi na, “Panginuun, nu idi kata dayi baydi, asê nati si Lazaru ya patêl yan. Nuwa paraman baydu, agyan amêsên, tanda kuy agyan sabêt man na yawadên mu kan Bapan Namalyari, idin na kamu.”

Nakitbay si Jesus, “Sikuy mam-in biyay buy sikuy mamabyay manguman sa mani nati. Ya kaganawan nangamamati ya nanampalataya kangku, manguman silan mabyay. Ya kaganawan nabyay ya nanampalataya kangku, a sila mati. Maniwala ka nayi sa sinabi ku?” Nakitbay si Marta, “Awuy Panginuun, maniwala kun sikay Mamiligtas ya Anak Bapan Namalyari.”

Pamakayari, inlumatêng si Maria. Nanduku ya sa arapan Jesus buy sinabi nay, “Panginuun, nu idi kata dayi baydi, asê nati ya patêl yan.” Pinatang silan Jesus, “Antuy pinilbêngan yu kan Lazaru?” Nakitbay sila, “Baydu sa pamilbêngan. Kaksaw ka amên makitan muya.” Nakatangis si Jesus.

Ya pinilbêngan kan Lazaru, gisay lêyang nga nagtakêp maragul la batu. Pamakalatêng Jesus baydu, sinabi nay, “Iagid yuy batuy nakatakêp.” Nuwa nakitbay si Marta, “Dat nabatay na ta apatta allu naynan nakalbêng.”

Sinabin Jesus kalla, “Alwa nayin sinabi ku kamuy makitan muy kapangyarian Bapan Namalyari nu maniwala ka kangku?” Kabay in-agid lay batu.

Pamakayari, naningla sa langit si Jesus buy sinabi na, “Bapa, magpasalamat taku kamu, gawan inlêngê muku. Tanda kuy pawa kan mallêngê kangku, nuwa pansabin kuy ati para sa ikakangêd mani idi sa palitêng ku amên maniwala silan sabay sikay namiutus kangku.” Buy masnêg binêg Jesus si Lazaru, “Lazaru, magsalwang ka!”

Nagsalwang yabay si Lazaru ya nakabêlêbêl pun telay paglêbêng. Kabay sinabin Jesus kalla, “Itas yuy telay nakabêlêbêl kana amên makabita ya.” Sên nakitan malakêy Judio ya dinyag Jesus, naniwala sila kana.

Nuwa ya mani pinunu sa balin pagtipunan mani Judio, kinasêman la si Jesus. Kabay nisasabi silan namalanu nu parasaantu lan ipapati si Jesus buy si Lazaru.

Kwentu sa Biblia ya ubat sa Juan 11:1-46