36. Nagbayuy lupan Jesus

Gisay allu, pikilakun Jesus ya tatluy tagasunul na, si Pedru, buy ya mipatêl la silan Santiagu buy si Juan. (Si abituy Juan na pantukuyun baydi alwan si Juan na namawtismu kan Jesus). Kay kakapad lay sinumukpa sa matag-ay ya bung-uy amên manalangin.

Kaban manalangin si Jesus, sinumawang nga lupa nan nanuwad mamut buy ya yaming na, pinumutin nanuwad sawang nga ayin kaparisu baydi sa babun luta.

Pamakayari, bêngat tan nagpakit si Moises buy si Elias ya makisabi kan Jesus. Nabyay ya luway liyakin ati sa babun luta dakun umnuy nay dinalan na tawun na inlumibas bayu pun malyari ya ati. Nakisabi sila kan Jesus tungkul sa kamatyan nay madani yan malyari sa Jerusalem.

Kaban makisabi si Moises buy si Elias kan Jesus, sinabin Pedru kan Jesus, “Panginuun, mangêd da idi kay baydi. Nu labay mu, manyag kay tatluy sawung: gisa kamu, gisa kan Moises buy gisa êt kan Elias.” Nasabin Pedruy abiin gawan kay nakatêgag ya.

Kaban magsabi pun si Pedru, natugpawan buy napalitêngan silan mamakasilêw wa ulap. Dilag tunuy ya ubat sa ulap ya magsabin, “Ati ya kakaidwan kun Anak ya kapapaidu kangku. Mallêngê kaw kana!” Gawan sa limun mani tagasunul, nipaglukub sila sa luta.

Tinalan silan Jesus buy sinabi na kalla, “Agana kaw malimu. Midêng kaw.” Sên nangêlêw sila sa palitêng la, kay si Jesus tanay nakitan la.

Inlumunsan si Jesus buy ya mani tagasunul na ubat sa bung-uy. Sinabin Jesus kallay, “Agana yu sabin agyan kansabêt man ya nakitan yu. Madani yakinan mati, nuwa manguman nakun mabyay. Nu nalyari yay sinabi ku, malyari yinan ikuwentu.

Kwentu sa Biblia ya ubat sa Mateo 17:1-9; Marcos 9:2-8; Lucas 9:28-36