40. Impaku si Jesus sa kurus

Pamakayarin dinustak mani sundalus si Jesus, pinabita laya kaban nakabakay kanay kurus ya pipakwan kana.

Gintan mani sundalus si Jesus sa gisay lugal la pambêgên “Bungu”. Kaban pan-ipaku lay gamêt buy bitis Jesus sa kurus, sinabi na, “Bapay patawarên mu sila ta a la tanday pandaygên la.” Dilag impapaku si Gubernador Pilatu sa ugtun ulun Jesus. Paradi ya nakasulat, “Ati ya Arin mani Judio.”

Nibabagutan na mani sundalus amên matandan la nu sisabêt ta makakwan yaming Jesus. Sa a la tanda sa pandaygên lan abiin, natupad laynay idi sa kasulatan ya, “Pinidadakayan lay yaming ku buy pinibabagutan la.”

Dilag êt luway kaawyun si Jesus ya nakapaku sa kurus. Si gisa, idi sa êtêb panabtab na buy si gisa êt, idi sa êtêb udi na. Sinabin idi sa udin Jesus, “Uysiyan a muya iligtas sa sarili mu buy sikay ta?” Nuwa sinabyanan yan gisa pun na manakaw, “A ka nayi malimu kan Bapan Namalyari? Makasalanan kita, nuwa siya, ayin yan kasalanan.” Buy nakisabi ya kan Jesus, “Ganakên muku nu mag-ari kay na.” Nakitbay si Jesus, “Amêsên êt, makaawyun kata sa Paraisu.”

Dinustak êt si Jesus un mani pinunun Judio buy kaatag tawu. Sinabi la kana, “Nu taganan Anak kan Bapan Namalyari, magtabuy ka sa kurus buy iligtas muy sarili mu. Nu madyag muy abiin, maniwala kay kamu!”

Ugtuy mamut ta abitu, nuwa bêngat tan dinumiglêm sa palitêng la. Nabuyutan tatluy uras ya nadiglêm.

Sinabin Jesus, “Bapay nayari kinay impadyag mu kangku! Pan-idin kina kamuy ispiritu ku.” Pamakayari, nidêngdêng ngana si Jesus buy nabuytuwan yinan inawanên. Bêngat tan nangayun buy ya maragul la kurtinay idi sa lalên templu, napiatag sa bunak paubat sa babu angga sa aypa. Ya kurtinan abitu sabay ya namipapawa sa mani tawu kan Bapan Namalyari.

Sa kapamilatan pangamatin Jesus, makapagdani yay mani tawu kan Bapan Namalyari. Si sundalus sa mamantay kan Jesus, nakitan nay kaganawan nalyari buy sinabi nay, “Taganan ayin yabay kasalanan na tawun abiin. Pêtêg awêd da Anak yan Bapan Namalyari.”

Pamakayari, dilag luway liyaki ya pinunun mani Judio ya si Jose ya taga Arimatea buy si Nicodemo. Si ati ya luway pinunu, maniwala silan sabay si Jesus ya Mamiligtas. Inyawad la kan Pilatuy bangkay Jesus. Impunggus lan telay pallêbêng nga lawinin Jesus buy insun la sa lêyang nga pamilbêngan. Pamakayari, tinakpan lan maragul la batuy pamilbêngan.

Kwentu sa Biblia ya ubat sa Mateo 27:27-61; Marcos 15:16-47; Lucas 23:26-56; Juan 19:17-42