22. Ya Pamianak kan Juan na Mamawtismu

Sabitun nuna, nakisabi si Bapan Namalyari sa mani tawu sa kapamilatan mani ang-el buy mani propeta. Nuwa amêsên, sa lalên apatta ralan na tawun, a sila pinagkasabin Bapan Namalyari. Pamakayarin abiin, pinagkasabi na si Zacarias ya gisay tuwa ya pari un mani Judio. Si Zacarias buy ya asawa nay si Elisabet, parisu silan mapanunul kan Bapan Namalyari, nuwa ayin sila pun anak.

Gisay allu, sabitun sinumun si Zacarias sa templu amên mamadêp kan Bapan Namalyari, pinagkasabi yan ang-el, “Manganak ka asawa mu un gisay liyaki. Ya ipalagyu mu kana, Juan. Matupus yan Ispiritun Bapan Namalyari buy il-an nay bêkên mani tawu sa pallumatêng Mamiligtas.” Nakitbay si Zacarias, “Parasaantun malyari ya abiin, pakan tuwa kina. Para êt bayduy asawa ku. Parasaantu kay pun makaanak?”

Nakitbay ya ang-el kan Zacarias, “Impalaku wakun Bapan Namalyari baydi amên sabin kamuy abiin na mangêd da balita. Nuwa gawan a ka naniwala, paubat amêsên, a kayna makapagsabi anggan asê pun ianak si Juan.” Sa uras êt abitu, asina nakapagsabi si Zacarias. Sên namitay nay ang-el, nuli yana si Zacarias. Asê nabuyutan, nabuktut tabay ya asawa na.

Sabitun anêm may buwan buktut Elisabet, pinagkasabi yaman ang-el si Maria ya kamag-anak Elisabet. Si si Maria, dalaga ya pun buy nakal-an ninan tangênên Jose. Sinabin ang-el kana, “Mangalêk kay Maria buy manganak kan gisay liyaki. Ya ipalagyu mu kana, Jesus. Bêgên yan Anak Bapan Namalyari ya Katatag-ayan buy mag-ari ya kanuman.”

Nakitbay si Maria, “Parasaantu malyari kangkuy abiin, pakan dalaga ku pun.” Sinabin ang-el kana, “Mabuktut ka sa kapamilatan kapangyarian Ispiritun Bapan Namalyari. Kabay banal la ianak mu, ta Anak yan Bapan Namalyari.” Naniwala si Maria buy tinanggap nay sinabin ang-el kana.

Asê nabuyutan, naku si Maria kan Elisabet. Sên nalêngên Elisabet ta pangumustan Maria, nagkimit ta kulaw sa bitukan Elisabet. Kaban pisasabyan lay dinyag Bapan Namalyari sa biyay la, sadyay tula la. Pamakalibas tatluy buwan, nuli yana si Maria.

Sên in-anak kan Elisabet ta kulaw, Juan na impalagyu la kana, kaparisun sinabin ang-el kalla. Nakapagsabi yana si Zacarias. Sinabi na, “Ulimênên na Bapan Namalyari, ta naganaka nay mani tawu na. Sikay anak ku, bêgên kan propetan Bapan Namalyari ya Katatag-ayan! Sikay mamisabi sa mani tawu nu parasaantun patawarên ya kasalanan la.”

Kwentu sa Biblia ya ubat sa Lucas 1