44. Pinaiyul Pedru buy si Juan ya lumpu

Gisay allu, naku si Pedru buy si Juan sa Templu. Kaban mamadanidani sila sa susunan sa Templu, dilag silan naakit ta gisay lumpuy liyaki ya magpalimus.

Pinakaêlêw yan Pedru buy sinabi na, “Ayin nakun peray maidin, nuwa dilag gakun idin kamu. Sa lagyun Jesu Cristu ya taga Nazaret, midêng ka buy mita ka!”

Tambêng pinaiyul Bapan Namalyari ya liyaki ya lumpu. Nakabita buy kapan-ukdu-ukdu naynan nangulimên kan Bapan Namalyari. Nakaupapas ya mani tawuy nakakit kana ya idi sa lawasan Templu.

Tambêng nakuy mani tawu amên êlêwên na tawuy lumpu ya inumiyul lana. Sinabin Pedru sa mani tawuy mititipun, “Mapatêl kun Israelita, uy siyan nakaupapas kaw ya sa nalyari ta? Buy papakaêlêwên yu kay yata? Indap yu nayi nu sikay ya nakapaiyul sa tawun ati gawan sa sarilin yan kapangyarian o kangêdan yan? Asê! Inumiyul ya gawan sa kapangyarian Jesus buy sa panampalataya na kana.”

Sikaw wa namipapati kan Jesus kan gobernador Pilatu. Impapati yuy pangubatan biyay ya ayin katganan, nuwa pinabyay yan Bapan Namalyari. A yu tanda nu sabêt ta nadyag yu, nuwa ginamit Bapan Namalyari ya abitu amên matupad da ula tungkul sa Mamiligtas ya pasakitin buy mati ya. Kabay magsisi kaw na buy mag-udung kaw kan Bapan Namalyari amên patawarên nay mani kasalanan yu.”

Nanubag ga mani pinunun Judio kan Pedru buy kan Juan. Kabay impadakêp lay luwa buy impasukul. Paraman baydu, malakêy tawuy naniwala sa pangaral la buy nanampalataya sila kan Jesus. Kabay niras limay libuy lawyaki ya nanampalataya kan Jesus.

Pamakawasak, gintan mani pinunun mani Judio si Pedru buy si Juan sa pinakapuun pari buy sa kaatag pun na pinunun Judio. Pinatang la silan Pedru buy si Juan, “Sabêt ta kapangyarian na ginamit yu amên paiyulun na lumpu?”

Nakitbay si Pedru, “Inumiyul la liyakin abitu gawan sa kapangyarian Jesus ya Mamiligtas. Sabay siyay impaku yu sa kurus, nuwa inuman yan pinabyay Bapan Namalyari! A yuya tinanggap, nuwa ayin kaatag ga paralan amên miligtas nun a sa kapamilatan kapangyarian Jesus.”

Sên natandan mani pinunun Judio ya kay nayêpay pangatawu lan Pedru buy si Juan buy a sila nag-aral, nakaupapas sila sa kapas-êyan nakêm lan magsabi. Nuwa naisip lay sabay sila bay-in na pagkaawyun Jesus. Kabay pinalimu la si Pedru buy si Juan bayu la intabi.

Kwentu sa Biblia ya ubat sa Dyag 3:1-4:22