8. Inligtas Bapan Namalyari si Jose buy Pamilya na

Gisay allu, sên tuway na si Jacob, in-utus nay kakaidwan nay anak ya naglagyun Jose. Sinabi na kana, “Anak kuway, lakwên mun êlêwên na mapatêl muy magpastul ayup.” (Genesis 37:12-14)

Kakasakitan nakêm mapatêl na si Jose, gawan tanda lay mas yan kakaidwan bapa la buy tanda lay taynêp Jose ya sabay siyay mag-ari kalla. Kabay sên nakitan la si Jose, dinakêp laya buy insaliw sa mani manaliw ipus. (Genesis 37:3-11, 17-28)

Bayu sila nuli, kingwa lay yaming Jose, gininit lay ati buy insawsaw sa dayan kambing. Buy impakit lay ati sa bapa la buy sinabi la, “Bapay, êlêwên muy yaming nga ati nu sabay ya yaming Jose.” Sên nakitan Jacob ba yaming na, sinabi na, “Pata indukudu! Sabay ya yaming Jose ya ati! Napati yina lawês mangatubag ga ayup!” Kabay sadyay lungkut Jacob. (Genesis 37:31-35)

Pakan sa a na tanda, gintan naman sa Egiptu si Jose un mani nakasaliw kana. Maragul buy makapangyarian na bansay Egiptu. Insaliw la si Jose sa gisay mabandi ya manungkulan sa gubernu. Mapanunul si Jose sa amung na. Kabay pinagpala yan Bapan Namalyari. (Genesis 37:36; 39:1-6)

Kalabay makikanayun kanay asawan amung na. Nuwa asê nalabay si Jose gawan kasalanan sa Bapan Namalyari ya abitu. Kabay nanubag kanay asawan amung na. Sinangkanan na si Jose un alwan pêtêg. Kabay gawan di, dinakêp si Jose buy insukul. Nuwa agyan idi sa sukulan si Jose, pawa ya pun êt tapat kan Bapan Namalyari. Kabay pinagpala yan Bapan Namalyari. (Genesis 39:6-23)

Pamakalibas dakun umnuy tawun, nakasukul pun êt si Jose agyan ayin yan kasalanan. Gisay yabi, nanaynêp pa Arin Egiptu. Katilwan nanaynêp pa Ari buy migaganaka ya, ta ayin naman mamipaintindi kana nu sabêt ta labay sabin mani nataynêp na. (Genesis 41:1-8)

Kabay impabêg Ari si Jose, gawan nabalitan nay dilag kaagyuan si Jose un mamipaintindi nu sabêt ta labay sabin panaynêp. Sen idi ya si Jose sa arapan Ari, sinabin Ari kana, “Jose ya, ipaintindi mu kangkuy labay sabin nataynêp ku.” Sinabin Jose kana, “Panggalangên na Ari, inpatandan Bapan Namalyari ya labay sabin nataynêp mu. Ati ya labay sabin nataynêp mu. Mamipagtan si Bapan Namalyari un pituy tawun ya malakêy pupul, nuwa pamakayarin pituy tawun, pituy tawun êt layang buy ayin pupulun.” (Genesis 41:14-36)

Sên impatanda nay labay sabin nataynêp na, dinayêw Ari si Jose. Kabay dinyag na yan mamaala sa buun Egiptu. Buy sabay siyay ikalway pinakamatag-ay sa Arin Egiptu. (Genesis 41:37-40)

In-utus Jose ya mani tawu baydu, “Sa lalên pituy tawun ya malakêy pupul, manipun kitamun kanên amên nu lumatêng nga pituy tawun ya ayin pupul, dilag kitamun kanên.” (Genesis 41:46-49)

Alwan kay Egiptuy nakadanas un layang, nun a ya pamilya êt Jacob ya manugêl sa Canaan. (Genesis 41:57; 42:1)

Kabay sinabin Jacob sa mani anak nay lawyaki, “Maku kaw manaliw kanên sa Egiptu.” Pamakalatêng la baydu, a la tanday si Jose ya mamisaliw kanên kalla. Nuwa nakilala silan Jose. (Genesis 42:1-20)

Sên napaptêgan nay nagbayuy nay ugalin mapatêl na, nagpakilala ya kalla, sinabi na, “Siku si Jose ya patêl yu! Agana kaw malimu! Agyan nadawak ka palanu yu kangku sabitun insaliw yuku amên magin ipus, mangêd da man na dinyag Bapan Namalyari kangku! Manugêl kaw na baydi kaawyun ku amên mabiyan kataw kanên buy pamilya yu.” (Genesis 42:21-24; 45:3-15)

Pamakaulin mapatêl na, sinabi la sa bapa la, “Bapay nabyay pun awêd si Jose buy labay nan manugêl kitamu sa Egiptu kaawyun na!” Sên natandan Jacob ba ati, natula-tula ya. (Genesis 45:25-28)

Kabay agyan tuway na si Jacob, naku ya pun êt sa Egipto, kaawyun nay pamilya na. Nanugêl silay na baydun kaganawan. Buy bayu ya nati, inyawad na kan Bapan Namalyari ya kangêdan para sa kaganawan anak na. (Genesis 46:1; 49:1-28)

Kabay ya impangakun Bapan Namalyari kan Abraham, para êt baydu kan Isaac, kan Jacob, buy sa labinluway anak Jacob êt buy sa pamilya la. Buy ya layin mani anak la, sabay ya napakadyag labinluway layin Israel buy angga amêsên, idi sila pun êt sa lugal la impangakun Bapan Namalyari kalla.

Kwentu sa Biblia ya ubat sa Genesis 37-50