26. Naglingkud si Jesus sa mani Tawu

Pamakayarin nanambut Jesus sa panuksun Satanas kana, nakapag-udung ya sa Galilea un idi kanay Ispiritun Bapan Namalyari. Naku ya sa magmikakanayun na lugal amên mangaral tungkul kan Bapan Namalyari buy nangulimên kanay kaganawan tawu.

Amêsên, nuli yana si Jesus sa lugal la kinaragulan na sa balayan Nasaret. Sên Alluy nan Pagpaynawa, sinumun ya sa balin pagtipunan mani Judio. Inggawang kanay pinisulatan sabin propeta Isaias ya nakatilitil. Intiknal nay ati buy binasa na sa mani tawu ya dakun umnuy nakasulat baydu.

Paradi ya binasan Jesus, “Ya Ispiritun Panginuun, idi yana kangku, gawan pinili na ku amên mangaral Mangêd da Balita sa mani kalulu. In-utus nakun mipatanda sa mani nadakêp pa mibus silay na buy sabin sa mani bulag ga makakit silay na. In-utus naku êt amên mibus sa mani pampasakitin. Buy ati yay panawun amên madanasan mani tawuy kangêdan Bapan Namalyari.

Pamakayari, niknu si Jesus. Nakaêlêw kanay kaganawan idi baydu. Tanda lay si binasan Jesus sabay ya tungkul sa lumatêng nga Mamiligtas. Kabay sinabin Jesus, “Ya binasa ku kamuyu amêsên, malalyari yana.” Nakaupapas sa kaganawan tawuy idi baydu buy sinabi la, “Alwa nayin kay anak yan Jose ya kabaryu tamu?”

Pamakayari, sinabin Jesus, “Pakalêng-ên yuy ati. Ayin propetay pantanggapên sa sarili nan lugal. Ganakên yuy nalyari sabitun panawun propeta Elias. Sa panawun na abitu, malakêy bal-u sa Israel. Nuwa sabitun asê namauran si Bapan Namalyari sa lalên tatluy tawun buy kapaka, alwan bal-u sa Israel ya sinawpan Elias, nun a impalakun Bapan Namalyari si Elias sa gisay bal-uy idi sa kaatag ga lugal amên sawpan ya.”

Insundun Jesus ya pagsabi na, “Sabitun nabyay pun si propeta Eliseu, malakê êt ta nagketung sa Israel. Nuwa agyan gisa man kalla, ayin pinaiyul si Eliseu. Si kay pinaiyul na, si Naaman ya sabay ya kapitan mani sundalus sa Israel.” Sên nalêngên mani Judioy sinabin Jesus, nanubag sila.

Intabi la si Jesus sa balayan la buy impalaku laya sa bung-uy ya pinipaydêngan lan balayan la amên inabu laya dayi sa bêngaw. Nuwa dinuman si Jesus sa pibunakan la buy namita ya sa Nasaret.

Inlakun Jesus ya malakêy lugal sa Galilea buy malakêy tawuy naku kana. Pan-ilaku la kan Jesus ya mani nipagsakit, ya asê makakit, ya asê makabita, ya asê makalêngê, ya asê makapagsabi. Buy pinaiyul silan kaganawan Jesus.

Dilag êt malakêy tawuy sinêdakan nadawak ka ispiritu ya pan-ilaku kan Jesus. Buy kaban pan-itabin Jesus sa nadawak ka ispiritu, man-angaw sila. Ya pansabin la, “Sika ya Anak Bapan Namalyari!” Gawan sa nalyarin abiin, nakaupapas sa mani tawu buy nangulimên sila kan Bapan Namalyari.

Pamakayari, namili si Jesus un labinluway lawyaki buy binêg na silan apostul. Si abitu silay mani apostul, kilalaku sila kan Jesus buy tinurwanan na sila.

Kwentu sa Biblia ya ubat sa Mateo 4:12-25; Marcos 1:14-15, 35-39; 3:13-21; Lucas 4:14-30, 38-44