16. Ya Mamitanggul Israel

Kaban nabyay pun si Josue, manunul la malakêy Israelita kan Bapan Namalyari. Nuwa sên nati ya si Josue, a layna sinunul la utus Bapan Namalyari buy a lay na intabi ya malakêy tribuy manugêl pun baydu sa Canaan. Kabay si nalyari, nag-umpisan nangulimên na malakêy Israelita sa diyusdiyusan un malakêy tribuy idi baydu, alwaynan si Bapan Namalyari ya inulimên la. Buy sa panawun na abitu, ayin sila pun ari. Kabay si pandaygên mani Israelita, kay abituy kalabayan sarili la. (Mamitanggul 2:10-12)

Gawan sa a la panunul, si dinyag Bapan Namalyari, pinasawan na silan masakup malakêy kapati la. Si kaatag ga pibandiyan la, tinakaw buy si kaatag êt, inlasak malakêy kapati la. Buy si dakun umnuy Israelita, pinati la. Kabay mamakapalunus sa biyay malakêy Israelita angga sa inlumatêng nga panawun na nasabi lay, “Bapan Namalyari, magsisi kay yana. Kabay idukuduku yan kamuy iligtas mu kay dayi sa mani kapati yan!” (Mamitanggul 2:13-16)

Gawan sa sinabin malakêy Israelita, nabêgbêg ga nakêm Bapan Namalyari. Kabay namili yina êt gisay tawuy midêng amên mamitanggul kalla. Sa pakapakun baydu, masambut lay mani kapati la buy magin napatêtbêk ka biyay la. Nuwa nalitêpan lay na êt mangulimên kan Bapan Namalyari buy nanguman silayna êt nangulimên sa mani diyusdiyusan. Kabay pinasawan silay na êt Bapan Namalyarin masambut malakêy taga Midian. (Mamitanggul 3:9, 15; 6:1)

Nasakup tribun Midian ya malakêy Israelita sa lalên pituy tawun buy kay silay magnabang un kaganawan pupul malakêy Israelita. Buy gawan sa limun malakêy Israelita, nagtagu sila sa lêyang amên a sila makitan un malakêy tribun Midian. Sa katatawliyan, nanguman silayna êt nakidukuduku kan Bapan Namalyari, ya sinabi la, “Bapa yan na Namalyari, magsisi kay yana. Iligtas mu kay dayi sa mani kapati yan!” (Mamitanggul 6:1-7)

Gisay allu, in-utus Bapan Namalyari ya ang-el na sa gisay liyaki ya maglagyun Gideon. Nalatêng ang-el si Gideon ya nakatagu un manara' amên a ya makitan tribun Midian. Sinabin ang-el kana, “Gideon na, napas-êy ka sundalus, inawyunan kan Bapan Namalyari. Pinili na kan mamitanggul sa mani Israelita.” (Mamitanggul 6:11-15)

Sinabin ang-el, “Pan-iutus Bapan Namalyari kamuy lasakên muy diyusdiyusan bapa mu.” Nuwa malimu si Gideon sa malakêy tawu. Kabay si dinyag na, nagpayabi ya pun. Sa yabin abitu, intugawtugaw buy tinudaktudakan nay diyusdiyusan bapa na. Pamakayari, namipaydêng yan pamiandugan para kan Bapan Namalyari buy nag-andug ya baydu. (Mamitanggul 6:25-27)

Sên pamakamaranun, nakit malakêy tawuy nangayayapung ngay diyusdiyusan la. Kabay nasuluksuluk sila. Si dinyag malakêy tawu, inlaku la si Gideon, ta labay la yan patin. Nuwa pamakalatêng la baydu, sinabin bapan Gideon kalla, “Uysiyan pansawupan yinay namalyari ta? Nu pêtêg yan Namalyari, paulayan yuya ta agyu nan itanggul la sarili na!” Kabay sa pakapakun baydu, naligtasan Gideon. (Mamitanggul 6:28-31)

Sadyay lakên Midian ya nag-udung amên manakaw sa malakey Israelita. Kabay sinagyat Gideon na malakêy Israelita amên mibêtêk silan lumaban sa malakêy Midian. Nuwa bayu sila inlumaban, nanyawad yan luway tanda' kan Bapan Namalyari nu saba siyay pinili nan mamitanggul sa malakêy Israelita. (Mamitanggul 6:33-36)

Si nuna nan dinyag, kingwa nay êwês buy in-amak na sa luta. Buy sinabi na kan Bapan Namalyari, “Nu sabay sikuy pinili mu, bas-ên muy êwês ku, nuwa ya palitêng na, nayangu.” Dinyag yabay Bapan Namalyari ya inyawad na. Sên gisay na êt ta yabi, in-amak nayna êt manguman na êwês na sa luta buy inyawad nayna êt kan Bapan Namalyari ya, “Nu sabay sikuy pinili mu, bas-ên muy palitêng êwês ku, nuwa nayangu ya êwês ku.” Kabay dinyag êt Bapan Namalyari ya inyawad Gideon. (Mamitanggul 6:36-40)

Dilag 32,000 ya sundalus Israelita ya naku kan Gideon. Nuwa sinabin Bapan Namalyari kanay, “Baw-asên muy sundalus mu, ta malakê kaw.” Kabay sinabin Gideon sa malakêy sundalus na, “Sisabêt kamuyuy malimun lumaban sa mani Midian?” “Sikay,” abiin na pakitbay 22,000 sundalus. Kabay pinauli na silayna. Nuwa sinabi ya êt Bapan Namalyari kanay, “Baw-asên mu pun êt, ta malakê kaw pun.” Kabay impauli ya êt Gideon na kaatag angga sa 300 tay sundalus sa nitagan. (Mamitanggul 7:2-8)

Sa yabin abitu, sinabin Bapan Namalyari kan Gideon, “Maglimêd kan maku sa kampun mani Midian. Nu malêngê muy pansabin la, a kay na malimu.” Kabay naku si Gideon sa kampun malakêy kapati la. Pamakalatêng na baydu, nalêngê nay sinabin gisay sundalus tungkul sa taynêp na. Buy sinabin kaluguran abituy sundalus, “Ya labay sabin taynêp mu, sambutun kitamun Gideon.” Pamakalêngên Gideon, nangulimên ya kan Bapan Namalyari. (Mamitanggul 7:9-15)

Pamakayari, nag-udung si Gideon sa mani 300 sundalus na buy binyanan na silan tisa-tisay patutut, banga, buy atang. Sa uras sa abitu, kaban mamabêlêw pun na mani kapati la, pinalitêngan mani sundalus Israelitay kampu la. Nuwa ya atang la, tinugpawan lan banga amên a sila makitan kapati lay nakapalitêng silay na awêd. (Mamitanggul 7:16)

Sên nakapalitêng ngay mani sundalus Israelita, piaagnan laynan binalbal la banga buy kinayupan lay patutut buy insaway lay, “Ya laban na atiyê, para kan Bapan Namalyari buy para kan Gideon! Kaksaw kaw na!” (Mamitanggul 7:17-18)

Sên nimatay mani Midian, binulakat Bapan Namalyari ya isip la. Kabay sa pakapakun baydu, kay sila-sila tanay naman na nangapitatabtab. Kabay nangamamati sila buy si kaatag, nipagbating. Nuwa kinamat sila pun êt mani Israelita angga sa napati lay malakê. Sa uras sa abitu, ya bilang mani Midian na nati, 120,000. Ya mani nitagan, intabin mani Israelita sa kaatag ga lugal. Sa pakapakun baydu, inligtas Bapan Namalyari ya mani Israelita. (Mamitanggul 7:19-25)

Sa nalyarin abitu, sinabin mani Israelita kan Gideon, “Labay yan na sikay magin ari yan.” Nuwa sinabi yaman Gideon kalla, “Biyan yuku tanan gintuy ya nakwa tamu sa mani kapati tamu.” Kabay malakê yabay ya kwaltay indin kana. (Mamitanggul 8:22-26)

Amêsên, nanyag si Gideon un asê mangêd sa pangêlêw Bapan Namalyari. Ta pamakayari nan nangwan gintu, dinyag nan yaming ya sabay ya ulimênên mani tawu. Gawan sa dinyag Gideon, pinagbukutan êt mani Israelita si Bapan Namalyari, ta nakiêmên sila kan Gideon na mangulimên sa diyusdiyusan. (Mamitanggul 8:27)

Gawan sa dinyag la, pinarusan silan Bapan Namalyari. Kabay nasambut silay naman sa kapati la. Nakidukuduku silay na êt kan Bapan Namalyari, ya sinabi la, “Bapa yan na Namalyari, magsisi kay yana. Iligtas mu kay dayi sa mani kapati yan!” Kabay namiutus sa êt si Bapan Namalyarin kaatag ga mamitanggul sa mani Israelita. Ati ya pawan pandaygên mani Israelita. Mangasalanan sila, pamparusan sila, magsisi sila, buy pan-iligtas silan Bapan Namalyari. Abiin na piuman-uman lan pandaygên.

Sa kapupusan, nanyawad da mani Israelita kan Bapan Namalyari. Sinabi la, “Ya mani tribuy nakapalitêng kanyan, dilag silan ari. Kabay si labay yan dayi, biyan mu kay êt ari. Nu malyari dayi, matag-ay ya, napas-êy ya buy makapamunu ya kanyan sa laban.” Nuwa sinabi yaman Bapan Namalyari kallay, “A ku labay ya panyawadên yu. Nuwa paraman baydu, idin ku kamuyuy panyawadên yu.” (1 Samuel 8:6-22)

Kwentu sa Biblia ya ubat sa Mamitanggul 1-3; 6-8