12. Ya Paglipay mani Israelita sa Naudit ta Dagat

Natulatulay mani Israelita gawan mita silay na sa Egiptu. A silay na ipus. Maku silay na sa lugal la impangakun Bapan Namalyari sa layin Abraham. Indin mani taga Egiptuy kaganawan inyawad mani Israelita, agyan na mani gintu, pilak, o maulagay gamit. Dilag dakun umnuy tawuy taga kaatag êt ta lugal ya nakilaku sa mani Israelita sa pamita la sa Egiptu gawan nanampalataya sila êt kan Bapan Namalyari. (Exodo 12:33-36)

Sa pamitan mani Israelita, pawa silan pan-awyunan buy pambantayan Bapan Namalyari. Nuna ya kalla sa kapamilatan matag-ay ya ulap ya sabay ya pansunulun la. Nu yabi yana, pakadyag yan apuy ya ati. Si kay sêpat lan daygên, sumunul sila kan Bapan Namalyari. (Exodo 13:21-22)

Asê namanan, nagbayuy isip arin Egiptu buy mani tawu na. Labay lan paudungun na mani Israelita buy manguman lan daygên ipus. Nalyari ya ati amên ipakit Bapan Namalyari ya mas makapangyarian ya sa arin Egiptu buy sa mani diyusdiyusan la. (Exodo 14:5)

Kabay tinagal un ari buy mani sundalus nay mani Israelita amên manguman nan daygên ipus. Sên nakit mani Israelitay mani sundalus, nalimu sila. Nasipit sila sa mani sundalus buy sa Dagat ta Naudit. Kabay nakatangis sila. Si sinabi la, “Uysiyan namita kay yapun sa Egiptu ta? Pakan kay mati kay awêd baydi!” (Exodo 14:6-12)

Sinabin Moises sa mani tawu, “Agana kaw malimu, ta si Bapan Namalyari ya makilaban para kantamu.” Sinabi yaman Bapan Namalyari kan Moises, “Sabin mu sa mani tawuy isusundu lay pamita la sa Naudit ta Dagat.” (Exodo 14:13-16)

Nagpabunak ka ulap sa mani Egiptu buy sa mani Israelita. Kabay asê nakitan mani sundalus Egiptuy mani Israelitay pantagalên la. (Exodo 14:19-20)

Sinabin Bapan Namalyari kan Moises, “Itag-ay muy gamêt mu sa dagat buy miatag ga lanêm.” Nanunul si Moises. Nanyupyup pa malakas sa angin buy niatag ga lanêm. Kabay napakadyag dan ya bunak dagat. (Exodo 14:21)

Kabay nakadan na mani Israelita sa namalay luta. (Exodo 14:22)

Sên ayin nay ulap, nakit mani taga Egiptuy mamwayuy nay mani Israelita. Kabay tinagal la sila. (Exodo 14:23)

Dinuman sila êt sa dinanan mani Israelita, nuwa gawan sa dinyag Bapan Namalyari, nilêmês sa parugang mani sakayan la. A lay na tanda nu sabêt ta daygên la buy nipan-angaw sila, “Muwayu kitamina! Ya Bapan Namalyarin mani Israelitay mallumaban kantamu!” (Exodo 14:24-25)

Sên nakalipay yay mani Israelita, in-utus Bapan Namalyari si Moses, “Ipaktang muy gamêt mu sa dagat.” Sên dinyag nay abitu, niuman na lanêm buy natugpawan na mani taga Egiptu. Nalumud da kaganawan sundalus Egiptu. (Exodo 14:26-28)

Sên nakitan mani Israelitay nati yay mani Egiptu, nanampalataya sila kan Bapan Namalyari. Naniwala sila êt ta propetan Bapan Namalyari si Moises. (Exodo 14:31)

Nagsayay mani Israelita, gawan inligtas silan Bapan Namalyari. A sila nati buy a silay na ipus! Malaya silay nan maglingkud kan Bapan Namalyari. Malakêy ingkanta la sa pagpasalamat la sa pangabus la. Nagkanta silan mani pangulimên gawan inligtas silan Bapan Namalyari. (Exodo 15:1-21)

In-utus Bapan Namalyari kallay, “Balang tawun, magkalutu kaw sa buwan ati. Mangwa kaw gisay tupay mangêd buy ilutu yuy ati. Pamakayari, kêna yu kaawyun na tinapay ya ayin pamalbag. Daygên yuy abiin bilang pangganaka yu sa pamiligtas ku kamuyu sa Egiptu.” (Exodo 12:1-20)

Kwentu sa Biblia ya ubat sa Exodo 12:33-15:21