21. Ya Mamiligtas ya impangakun Bapan Namalyari

Awlagi pun, palanuy nan Bapan Namalyari ya mamiutus yan gisay Mamiligtas sa mani tawu. Sabitun nangasalanan silan Adan buy si Eva, impangakuy nan Bapan Namalyari ya ati. Sinabi na sa utan, “Dilag gisay anak ka babayi ya mallasaw ulu mu buy tuktukun muy naman na buwê na.” Si abituy utan ya nallinlang kan Eva, sabay siya si Satanas. Ya labay sabin Bapan Namalyari, dilag ianak ka manambut kan Satanas. (Genesis 3:15)

Impangaku êt Bapan Namalyari kan Abraham, “Sa kapamilatan mu, pagpalên kuy kaganawan tawu sa buun babun luta.” Ya pagpapalan ati, sabay ya panlumatêng Mamiligtas. (Genesis 12:1-3)

Impangakuy naman Bapan Namalyari kan Moises, “Dilag lumatêng nga gisay propetay kaparisu mu.” Ya propetan ati, sabay ya Mamiligtas ya lumatêng. (Deuteronomy 18:15)

Impangaku êt Bapan Namalyari kan Arin David, “Ya impangaku ku kan Eva buy Adan, Abraham buy Moises, sabay êt ta impangaku ku kamu, ta maubat sa layi muy Mamiligtas sa lumatêng.” (2 Samuel 7:12-16)

Sa kapamilatan propeta Jeremias, impangaku êt Bapan Namalyari, “Manyag gakun Bayun Kasunduwan sa mani tawu. Ya Manan Kasunduwan ku sa mani Israelita sabitun nuna, insulat kuy mani utus ku sa mani batu. Nuwa sa Bayun Kasunduwan, isulat ku sa bêkên mani tawuy labay kun daygên la. Ya mani tawuy mangilala kangku, kangku silayna buy patawarên kuy mani kasalanan la.” Sa pallumatêng Mamiligtas, mag-umpisay nay Bayuy Kasunduwan. (Jeremias 31:31-34)

Sinabi êt mani propeta ya si Mamiligtas ya lumatêng, magin yan propeta, pari buy ari. Ya propeta, sabay silay mani tawuy mallêngê sa pansabin Bapan Namalyari buy pan-isabi la êt ta ati sa mani tawu. Buy parabaysên êt ta daygên Mamiligtas ya lumatêng, ta sabay siyay ganap pa prupeta. (Deutereonomy 18:15)

Ya Mamiligtas sa lumatêng, pari ya êt. Ya parin Judioy naman, sabay ya mag-andug para sa pamatawad Bapan Namalyari sa kasalanan mani tawu. Pan-ipanalangin la êt ta mani tawu. Kabay iandug êt Mamiligtas sa lumatêng nga sarili na para sa pamatawad Bapan Namalyari sa kasalanan tawu, ta sabay siyay ganap pa pari. (Psalmo 110:4)

Ya Mamiligtas ya lumatêng, ari ya êt. Ya mani ari yaman, sabay silay mamunu sa kaarian buy saba sila êt ta mangatul sa mani tawu nu ustu o asêy dinyag la. Para êt baysên na daygên Mamiligtas sa lumatêng. Siyay mamisundu sa pag-arin Arin David buy mag-ari ya sa buun babun luta. Pan-atulan nay mani pandaygên mani tawu buy makatuynungan na pangatul na, ta sabay siyay ganap pa ari. (Isaias 32:1)

Bayu inlumatêng nga Mamiligtas, insabi ya pun mani propeta ya malakêy bagay ya malyari sa biyay na. Sinabin Malakias, “Dilag gisay makapangyarian ya propeta ya muna sa Mamiligtas.” Sinabi yaman êt Isaias, “Si Mamiligitas sa lumatêng, ianak yan gisay dalaga.” Sinabi yaman êt Mikas, “Ianak sa balayan Betlehem ya Mamiligtas.” (Malakias 3:1; Isaias 7:14; Mica 5:2)

Sinabi êt Isaias nu parasaantuy magin biyay Mamiligtas, “Si Mamiligtas, manugêl ya sa prubinsyan Galilea. Samungun nay mani malungkut. Ipatanda nay mibus say mani inipus buy mani nakasukul.” Sinabi na êt ta, “Paiyulun Mamiligtas sa mani nipagsakit, mani asê kalêngê, asê makakit, asê makapagsabi buy asê makabita.” (Isaias 9:1-2; 61:1-3)

Sinabi êt Isaias, “Manubag ga kaatag ga tawu sa Mamiligtas buy a laya paniwalan.” Sinabi pun êt kaatag ga propeta, “Ya mani tawuy mamati sa Mamiligtas, pisugalên lay yaming na.” Sinabi la pun êt, “Gisa sa mani kaluguran nay mamipakadawak kana.” Sinabin propeta Zakarias, “Si bayad sa pamipakadawak kana, tatlumpuy peran pilak.” (Psalmo 69:4; 22:18; Zekarias 11:12)

Sinabi yanan mani propeta nu parasaantun mati ya Mamiligtas. Sinabin Isaias, “Tupayan laya, kalyan laya, buy dugên laya. Pamakayari, ipaku laya sa krus angga sa mati ya.” (Isaias 50:6; Psalmo 22:6; Deuteronomio 21:23)

Ayin kasalanan ya Mamiligtas. Nuwa danasen nay kasakitan na sabay ya parusay para sa mani kasalanan mani tawu. Kabay gawan sa parusay madanasan Mamiligtas, miudung nga pamikiawyun mani tawu kan Bapan Namalyari. (Isaias 53:5-6, 10)

Alwan kay mati ya Mamiligtas, nun a sinabin mani propetay mabyay yan manguman. Buy gawan sa pangamati buy pangabyay nan manguman, matupad day palanun Bapan Namalyari ya iligtas sa mani tawu sa kasalanan. Buy nag-umpisay Bayun Kasunduwan Bapan Namalyari buy mani tawu. (Psalmo 16:10; Jeremias 31:31-34)

Impakit Bapan Namalyari sa mani propetay malakêy bagay tungkul sa Mamiligtas sa lumatêng. Nuwa apattaralan na tawun pun na inlumibas bayu in-utus Bapan Namalyari ya Mamiligtas baydi sa babun luta, ta iutus Bapan Namalyari ya Mamiligtas sa panawun na intakda na. (Galacia 4:4)

Kwentu sa Biblia ya ubat sa Genesis 3:15; 12:1-3; Deuteronomio 18:15; 2 Samuel 7; Jeremias 31; Isaias 59:16; Daniel 7; Malakias 4:5; Isaias 7:14; Mica 5:2; Isaias 9:1-7; 35:3-5; 61; 53; Psalmo 22:18; 35:19; 69:4; 41:9; Zekarias 11:12-13; Isaias 50:6; Psalmo 16:10-11