35. Ya Kwentu tungkul sa Bapay Mapangidu

Gisay allu, panturwanan Jesus ya mani maningil buwis buy mani tawuy makasalanan ya niaawyun amên lêng-ên ya.

Idi êt bayduy dakun umnuy pinunu sa simbaan. Nakitan lay si mani makasalanan, intuwad Jesus kaluguran. Kabay inuyam laya. Gawan sa panguyam la kana, ingkwentu nay ati.

“Dilag gisay bapay nag-anak luway liyaki. Amêsên, sinabin abituy bungsu sa bapa na, ‘Bapay, idin mina kangkuy atag ku sa mani pibandiyan mu!’ Kabay si kaganawan pibandiyan bapa la, indakay nay na sa luway anak na.”

“Sên nakway nan bungsuy dakay na, naku ya sa madayuy lugal. Baydu na ginastus sa pera na sa ayin kapukatan na pamibiyaybiyay na.”

“Pamakayarin abitu, sadyay layang nga nadanasan mani tawu sa binyanan abituy bungsuy anak na. Ayin ninan peray panaliw kanên na. Kabay nakiipus ya tanan mamakan babuy. Sa sadyay kasakitan buy layang, labay nayna dayin kanên na pan-ipakan sa babuy.”

“Sên naisip-isip nay kaganawan dinyag na, sinabi na sa sarili na, ‘Du kanyan naman ni agyan na ipus bapa ku, malakêy maêkan na buy subra pun êt kalla. Nuwa sikina man, mati yan layang baydi. Mag-udung ngaku tana sa bapa ku buy makisabi yaku kanan ibilang naku tana sa mani ipus na.”

Idi yapun sa madayu, nakitan ninan bapa na. Sa lunus bapa na kana, ginanagan nayan tinakês buy dinêp.”

Sinabi na sa bapa na, “Bapay nangasalanan naku kamu buy kan Bapan Namalyari. A kina sêpat bêgên mun anak.”

“Nuwa sinabin bapa na sa mani ipus na, ‘Parasên yu! Kêwên yuy pinakamangêd da yaming buy ipayaming yu kana. Pasingsingan yuya buy pasapatusên. Buy mangwa kaw nabêlêng nga bakay impataba. Patin yuy abitu. Mangan kitamu buy magsaya! Gawan nabyay ya anak ku, ya indap kun nati! Indap ku êt nu nabating ya, pakan nakitan nana!’

“Kabay nagsayay mani tawu. Asê naêpêng, nuli ya panganay ubat sa panggitnan. Nalêngê nay tigtigan buy talêkan. Inisip na nu sabêt tay nalyari sa bali la.”

“Sên natandan nay si kasayaan na abitu, para awêd sa pag-udung bungsuy patêl na, êa nanubag ya. A ya kalabay sumun sa lalên bali la. Kabay nagsalwang nga bapa na buy pikisabyan nayan makiawyun ya sa kasayaan, nuwa siyan a ya nakalabay.”

“Sinabin panganay sa bapa na, ‘Bapay, sa makadang nga panawun, para kinan ipus ya manunul sa kaganawan pan-iutus mu kangku. Nuwa agyan kay misan, a mukuta binyan agyan kay gisay nabêlêng nga kambing ta amên makapagsaya ku kaawyun na mani kaluguran ku. Nuwa sên inlumatêng ngaman na anak muy bungsu ya nangubus nanggastus pibandiyan mu sa mani babayi ya pambayaran, impati muya pun êt impatabay baka!’ ”

“Kabay nakitbay ya bapa na, ‘Anak kuway, pakan pawa kata kayêk pagkaawyun ta buy kaganawan pibandiyan ku, pan-idin ku kamu. Nuwa amêsên, sêpat kitamun magsaya gawan si patêl muy indap tamu nu nati yana, nabyay ya awêd. Indap tamu êt nu nabating ya, nuwa nakitan tamina.’ ”

Kwentu sa Biblia ya ubat sa Lucas 15:11-32