45. Si Felipe buy ya nagtungkulan na taga Etiopia

Si Esteban, gisa ya sa mani pinunun nunan manampalatayay miaawyun. Pikatandan yan mangêd da tawu, biyasa ya buy pan-awyunan yan Ispiritun Bapan Namalyari. Malakêy nay dinyag Esteban ya mamakaupapas. Pawa nan pansabin sa mani tawuy kaylangan lan manampalataya kan Jesus.

Gisay allu, kaban pan-iturun Esteban ya tungkul kan Jesus, nakisubakan kanay dakun umnuy Judio ya asê maniwala kan Jesus. Sa tubag la kan Esteban, indawak lay sinabi na. Sinabi la, “Nalêngê yan yay magsabin nadawak tungkul kan Moises buy tungkul kan Bapan Namalyari!” Kabay impadakêp la si Esteban buy gintan laya sa pinakapuun pari buy sa mani pinunun mani Judio. Idi êt bayduy malakêy mamipakadawak laban kan Esteban.

Pinatang puun pari si Esteban, “Pêtêg nayi ya pansabin la tungkul kamu?” Sinabin Esteban ya mamakaupapas sa dinyag Bapan Namalyari sabitun panawun Abraham angga sa panawun Jesus buy nu parasaantun asê pansunulun mani tawu si Bapan Namalyari. Buy sinabi na, “Mangakdêy ya ulu yu. A kaw kalabay manunul kan Bapan Namalyari buy pawa yun asê pantanggapên na pangawyun Ispiritun Bapan Namalyari. Kaparisu kaw mani ninunu yu ta pampatin yuy mani propetan Bapan Namalyari. Nuwa sikaw, luyang pun na dawak ya dinyag yu sa dinyag la, gawan agyan na Mamiligtas ya in-utus Bapan Namalyari, impapati yu êt.”

Sên nalêngên mani tawuy ati, natubag-tubag sila. Kabay tinêmpanan lay mani têk la buy nan-angaw sila. Ginuluy la si Esteban paawas sa balayan buy binatwan angga sa napati laya.

Nuwa bayu nati si Esteban, nanalangin ya, “Panginuun Jesus, tanggapên muy kaladwa ku.” Pamakayari, nanduku ya buy nanalangin, “Panginuun, agana mu sila parusan sa nadawak ka dinyag la kangku.” Pamakasabi na, nati yina.

Dilag gisay liyaki bayduy nakiayun sa pamati kan Esteban. Binantayan nay yaming mani tawuy namati kan Esteban. Si lagyu na, Saulo. Sabitun panawun abitu, malakêy nay mani tawuy kalabay mamati sa mani manampalataya. Kabay malakêy manampalatayay namita sa bibiyan la buy naku sila sa magmikakanayun na balayan. Nuwa agyan dakun antuy lakwên la, pan-iaral la sa mani tawuy tungkul kan Jesus.

Si Felipe, gisa ya sa mani tagasunul Jesus. Sabitun panawun na pampasakitin ya mani manampalataya, namita si Felipe sa Jerusalem. Naku ya sa Samaria buy baydu nan in-aral ya tungkul kan Jesus. Malakêy taga Samaria ya nanampalataya kan Jesus. Gisay allu, in-utus ang-el Panginuun si Felipe, “Maku ka sa dan papakun sa kakyangan.” Buy naku ya. Kaban mamita ya, nakitan nay gisay nagtungkulan ya ubat sa Etiopia ya nakasakay sa kalesa na. Sinabin Ispiritun Bapan Namalyari kan Felipe ya magdani ya buy pakisabyan nay nagtungkulan.

Sên marani yana si Felipe sa kalesa, nalêngê nay nagtungkulan na mamasan librun propeta Isaias. Paradi ya pambasên na, “Gintan layan paran tupay nakal-an patin. Kaparisu ya êt tupay pan-urugun ya ayin tarit. Dinustak laya buy asê ustuy pangatuynungan kana. Pinati laya êt.”

Pinatang Felipe ya nagtungkulan, “Mapukatan mu nayin kayêk ka pambasên mu?” Nakitbay ya nagtungkulan, “A kuya bay mapukatan nu ayin mamipapukat kangku. Kaksaw ka! Magsakay ka baydi sa dani ku. Sa êlêw muy sisabêt ya pantukuyun propeta Isaias? Kaatag tawu nayi o sarili na?”

Impapukat Felipe sa nagtungkulan ya si pantukuyun, Isaias sabay si Jesus. Nanggamit pun êt si Felipe un kaatag pun na kasulatan amên sabin kanay Mangêd da Balita tungkul kan Jesus.

Kaban mamita si Felipe buy ya nagtungkulan, nidan sila sa gisay lugal la dilag lanêm. Sinabin nagtungkulan kan Felipe, “Atuwe! Naglanêm baydu! Malyari yakina nayin magpabawtismu?” Buy impapatgên nay pagsakayan nay kalesa.

Nakuy nagtungkulan buy si Felipe sa lanêm. Baydu yan binawtismuwan Felipe. Pamakayari nan binawtismuwan na nagtungkulan, gintan Ispiritun Bapan Namalyari si Felipe sa kaatag ga lugal. Baydu insundun Felipe ya pangaral na tungkul kan Jesus.

Buy nuli yana sa Etiopia ya nagtungkulan. Natulatula ya gawan nakilala na si Jesus.

Kwentu sa Biblia ya ubat sa Dyag 6:8-8:5; 8:26-40