38. Nakisupakat si Judas sa mani kapatin Jesus

Tinawuntawun magkalutuy mani Judio sa Pestan Kaligtasan bilang pangganaka sa pamiligtas Bapan Namalyari sa mani ninunu la. Dinadinalan nay tawun na inlumibas sabitun inipus sila sa Egiptu. Amêsên, madani yay Pestan Kaligtasan. Kabay sinabin Jesus sa mani tagasunul nay, “Labay kun miaawyun kitamun magkalutu sa Pestan Kaligtasan baydu sa Jerusalem.” Tandan Jesus ya ipapati laya sa Jerusalem.

Dilag gisa sa mani tagasunul Jesus ya manalan pera sabay si Judas. Pawa yan manakaw sa peray pantalanên na, gawan lupa yan pera. Pamakalatêng Jesus buy mani tagasunul na sa Jerusalem, nagdani ya si Judas sa pinunun mani Judio. Tandan Judas ya asê kalabay maniwalay mani pinunun mani Judio si Jesus ya lumatêng nga Mamiligtas buy impalanu la pun êt nu parasaantu yan ipapati. Gisay allu, naku si Judas sa mani pinunun mani Judio buy nakisawupan ya kalla nu parasaantun madakêp si Jesus.

Namayad sila kan Judas tatlumpuy pilak pera amên isupakat na si Jesus. Nalyari ya ati kaparisun sinabin mani propeta. Nakalabay si Judas buy namita yan gintan nay pera. Nangkap yan paralan nu parasaantu nan maipadakêp si Jesus.

Kaawyun Jesus ya mani tagasunul na sabitun nagkalutu sila sa Pestan Kaligtasan. Kaban mangan sila, kingwan Jesus ya tinapay buy binis-il. Sinabi na, “Kêwên yuy ati ya tinapay buy kanên. Ati ya lawini kuy idin ku kamuyu. Daygên yuy ati bilang pangganaka kangku.” Sa paradi ya paralan pan-isabin Jesus kallay idin nay sarili na para kalla.

Pamakayari, kingwan Jesus ya alak buy sinabi na, “Inêmên yuy ati. Ati ya daya kuy mibulug amên mapatawad da mani kasalanan tawu buy sabay êt ta ati ya mamaptêg sa Bayuy Kasunduwan. Balang inêmên yuy ati, daygên yu bilang pangganaka yu kangku.”

Pamakayari, sinabin Jesus sa mani tagasunul na, “Gisa kamuyuy sabay ya mamisupakat kangku.” Nakatêgag ga mani tagasunul na buy nipapatang sila nu sisabêt kallay manyag parabaydu. Sinabin Jesus, “Si tawuy biyan kun tinapay sabay siyay mamisupakat kangku.” Pamakayari, binyanan nan tinapay si Judas.

Pamakakwan Judas sa tinapay, nasakup pinan kapangyarian Satanas. Namita ya buy nakisawupan ya sa mani pinunun mani Judio amên madakêp la si Jesus. Yabi yanay abitu.

Pamakayari lan nangan, naku si Jesus buy mani tagasunul na sa Bung-uy mani Ulibu. Sinabin Jesus, “Sa yabin ati, lakwanan yuku kaparisun nakasulat sa Sabin Bapan Namalyari, ‘Patin kuy magpastul buy mikyat ta mani tupa.”’

Nakitbay si Pedru, “Agyan lakwanan kaw kaganawan, a kataw lakwanan!” Sinabin Jesus kan Pedru, “Labay Satanas ya kêwên nakaw kaganawan, nuwa manalangin naku para kamuy Pedru amên asê mitas sa panampalataya mu. Paraman baydu, sa yabin ati bayu mangkati ya manuk, katitlu mukun ipuglaw wa a muku kilala.”

Sinabi pun êt Pedruy, “Agyan mati yaku, a kata ipuglaw.” Para êt bayduy sinabin kaatag pun na mani tagasunul na.

Naku si Jesus buy mani tagasunul na sa lugal la pambêgên Getsemani. Sinabin Jesus kalla, “Manalangin kaw amên a kaw matuksun Satanas.” Pamakayari, namita ya amên makapanalangin yan kay kakapad na.

Katitlun nanalangin si Jesus, “Bapay, nu malyari dayin kayêk, itas mu kangkuy mani kasakitan na lumatêng. Nuwa nu kay ati ya paralan amên mapatawad da mani kasalanan mani tawu, daygên muy Bapa ku nu sabêt ta ustu.” Gawan sa sadyay kapigaganakan Jesus, nantuluy sayngêt nan paray nan daya. Kabay namiutus si Bapan Namalyarin mani ang-el na amên papas-êyên nay nakêm Jesus.

Balang mayarin manalangin si Jesus, mag-udung ya sa mani tagasunul na buy makitan nan kay pawa silan mamabêlêw. Sa katitlun pag-udung na, sinabi na kallay, “Mimata kaw! Abiti yanay tawuy mamisupakat kangku.”

Kaawyun inlumatêng Judas ya mani pinunun mani Judio, mani sundalus buy malakêy tawu ya dilag gêgtan na kêya buy pamatuk. Nagdani si Judas kan Jesus buy sinabi na, “Mangêd da yabi kamuy, Manuru”, agnan pandêp na kan Jesus. Ati ya tanda' amên matandan mani kaawyun na nu sisabêt ta dakpên. Sinabin Jesus kana, “Judas, pandêp nayi ya gamitin muy patanda' amên isupakat taku?”

Sên dinakêp mani sundalus si Jesus, nanganus kêya si Pedru buy pinutus nay têk ipus puun pari. Sinabin Jesus, “Isakêb muy abiin na kêya mu! A mu nayi tanday agyu kun yawadên sa Bapa kuy miutus yan libulibuy ang-el na amên itanggul laku? Nuwa kaylangan kun sunulun na kalabayan Bapa ku.” Pamakayari, pinaiyul Jesus ya têk ipus. Dinakêp layna si Jesus buy nipamwayuy mani tagasunul na buy inlakwanan laya.

Kwentu sa Biblia ya ubat sa Mateo 26:14-56; Marcos 14:10-50; Lucas 22:1-53; Juan 12:6; 18:1-11