48. Si Jesus sa impangakun Mamiligtas

Sabitun dinyag Bapan Namalyari ya babun luta, mangêd da kaganawan buy ayin pun kadawakan sa babun luta. Mipangidu silan Adan buy si Eba buy kaidwan la êt si Bapan Namalyari. Sabitun nuna, ayin pun kamatyan buy sakit gawan parabaysên na labay Bapan Namalyari sa babun luta.

Sa kapamilatan utan, pikisabyan Satanas si Eba sa hardin Eden amên tuksun. Kabay nangasalanan kan Bapan Namalyari si Adan buy si Eba. Gawan sa pangasalanan la, ya kaganawan tawu sa babun luta, magsakit buy mangamati yana.

Gawan sa pangasalanan Adan buy si Eba, sadyay dawak nalyari gawan nasiray pamikibêtêk tawu kan Bapan Namalyari. Kabay paubat sabitun nuna, si kaganawan pan-ianak, mangasalanan nana buy magin kapatin Bapan Namalyari. Nuwa dilag palanu si Bapan Namalyari amên maiudung nga mangêd da pamakibêtêk mani tawu kan Bapan Namalyari.

Sabitun nuna, impangakun Bapan Namalyari kan Ebay gisa sa mani layi nay mallasaw sa ulun utan. Nuwa sugatên Satanas ya sakungan ati. Labay sabin, mapatin Satanas ya Mamiligtas nuwa pabyayên yan Bapan Namalyari. Gawan di, masiray kaganawan kaagyuwan Satanas kanuman. Pamakalibas malakêy tawun, ipakit Bapan Namalyari si Jesus ya Mamiligtas.

Sabitun siniran Bapan Namalyari ya babun luta sa kapamilatan maragul la lanab, nipadyag si Bapan Namalyari kan Noe un gisay maragul la barku. Ati ya nagin paralan amên miligtas silan Noe buy pamilya na tagawan naniwala sila kana. Para êt bayduy dinyag Bapan Namalyari kantamu. Agyan sêpat kitamun mati gawan sa mani kasalanan tamu, nanyag ya pun êt paralan amên miligtas sa kaganawan tawuy manampalataya kan Jesus.

Sa lalên dinadinalan na tawun, pawan mag-andug ya mani pari kan Bapan Namalyari bilang pamayad sa parusan kasalanan mani tawu, nuwa asê makapitas sa abiin sa kasalanan mani tawu. Si Jesus, sabay siyay Katatag-ayan buy Dakilay Pari. A ya kaparisun kaatag ga pari, gawan in-andug nay sarili na ya sabay ya makapitas kaganawan kasalanan tawu sa babun luta. Sabay si Jesus sa ganap pa pinakapuun pari, ta inaku nay parusa sa kasalanan kaganawan.

Sinabin Bapan Namalyari kan Abraham, “Pagpalên kuy kaganawan bansa sa kapamilatan mu.” Si Jesus, naubat ya sa layin Abraham. Pinagpalay kaganawan sa kapamilatan Abraham gawan na kaganawan nanampalataya kan Jesus, niligtas sa kasalanan buy sabay silay nagin layin Abraham.

Sabitun sinabin Bapan Namalyari kan Abraham ya iandug nay anak na ya si Isaac, tupay indin Bapan Namalyari bilang kasagilin Isaac. Sêpat dayin sikitamuy mati gawan sa kasalanan tamu! Nuwa nam-i si Bapan Namalyarin andug ya kasagili tamu, sabay si Jesus.

Sabitun impagtan Bapan Namalyari ya tawlin salut sa Egiptu, sinabi na sa mani tawuy mangwa silan biserun tupay liyaki. Patin lay ati buy punwan lan dayay mani pasbul bali la. Nu makitan Bapan Namalyari ya daya, libasan nay balin abitu buy a na patin na panganay sa pamilyan abitu. Si pamêg di, “Pallumibas Ang-el.”

Para êt baydu si Jesus ya nagin tupay andug para kantamu amên miligtas kitamu. Ayin maakit ta nadawak kana buy matinêk ya. Pinati ya sabitun allun pangganaka sa “Pallumibas Ang-el.” Nu manampalatayay gisay tawu kan Jesus, ya daya na, sabay ya magin bayad sa kasalanan tawun abitu buy a ya miawyun sa parusan Bapan Namalyari.

Sabitun nuna, nanyag kasunduwan si Bapan Namalyari sa mani pinili na ya sabay ya mani Israelita. Amêsên, nanyag gina êt Bayuy Kasunduwan amên agyan sisabêt man na manampalataya kan Jesus, miawyun sila sa mani tawuy pinili na.

Si Moises, gisa yan dakilay propetay mamipatandan Sabin Bapan Namalyari. Si Jesus, propeta ya êt kaparisun Moises. Nuwa si Jesus, alwa yan kay dakilay propeta, nun a sabay siyay pinakadakilay propeta. Sabay siya êt ya Namalyari. Kabay ya kaganawan pansabin buy pandaygên na, pansabin buy pandaygên êt Bapan Namalyari. Gawan baysên, makitan tamu ya si Jesus, sabay siyay Sabin Bapan Namalyari.

Impangakun Bapan Namalyari kan David da maubat sa layi nay gisay ari ya mamunu sa mani anak Bapan Namalyari kanuman. Gawan si Jesus ya Anak Bapan Namalyari buy Mamiligtas, sabay siyay pantukuyun Bapan Namalyari sa pangakun ati.

Si Jesus, gisa yan ari kaparisun David, nuwa si Jesus, ari ya sa kaganawan! Mag-udung ya buy mag-ari yan dilag katuynungan buy kapatêtbêkan kanuman.

Kwentu sa Biblia ya ubat sa Genesis 1-3, 6, 14, 22; Exodo 12, 20; 2 Samuel 7; Hebreo 3:1-6, 4:14-5:10, 7:1-8:13, 9:11-10:18; Pahayag 21