39. Inlitis si Jesus

Bunak kan yabi ya abitu sabitun gintan mani sundalus si Jesus sa balin puun pari amên litisin laya baydu. Nanunul kana si Pedru nuwa idi ya sa madayu. Sên idi yana sa balin puun pari si Jesus, nalakwan si Pedru sa lawasan. Nakiawyun ya sa mani mag-atug amên mimudu.

Sa lalên bali, inlitis mani puun Judio si Jesus. Dilag silan mani kaawyun na maglaram ya magpapêtêg pakan asê pariparisuy pansabin la. Kabay asê napaptgan mani pinunun Judioy taganan nagkasalanan si Jesus. Pakatêwêk kaman si Jesus.

Sa katatalwiyan, pinatang puun pari si Jesus, “Sabin muti kanyan nu sabay sikay nay Mamiligtas ya lumatêng ya Anak Bapan Namalyari?”

Nakitbay si Jesus, “Siku Sikina buy makitan mukun nakaiknu sa êtêb panabtab Bapan Namalyari buy mallumatêng ngakun ubat sa langit.” Sa tubag puun pari, gininit nay yaming na. Nan-angaw ya, “A tamina kaylangan na magpapêtêg. Nalêngê yinay sinabi na ya sabay siya kanuy Anak Bapan Namalyari. Amêsên, sabêt ta iatul yu kana?”

Nakitbay ya mani pinunun Judio, “Dapat patin ya!” Tinakpan lay matan Jesus, tinupayan laya, dinugê buy dinustak.

Kaban mangêtêng si Pedru sa lawasan bali, nakitan yan gisay babayi ya ipus. Sinabin babayi kan Pedru, “Alwa nayin sabay sikay pagkaawyun Jesus!” Nuwa impuglaw waman Pedruy a na kilala si Jesus. Asê naêpêng, dilag ga êt kaatag ga babayi ya namatang kana, nuwa impuglaw wa êt Pedruy a na kilala si Jesus. Sa katatalwiyan, sinabin kaatag ga idi baydu, “Kaawyun ka yabay Jesus ta parisu kaw taga Galilea.”

Insumpan Pedru, “Parusan nakun Bapan Namalyari nu kilala kuy liyakin abitu!” Tambêng nangkati ya manuk, agnan inawing Jesus si Pedru.

Nagpakadayu si Pedru buy nanangis ya gawan sa sadyay sakit nakêm na. Si si Judas ya namisupakat kan Jesus, nakitan nay inatulan kamatyan si Jesus. Nalungkut ya buy namita yan nagpakamati.

Pamakamaranun, gintan mani puun Judio si Jesus kan Gubernadur Pilatu. Labay lan atulan kamatyan si Jesus. Pinatang Pilatu si Jesus, “Sika nayi ya arin mani Judio?”

Nakitbay si Jesus, “Sikay nay nagsabi, nuwa alwan baydi sa babun lutay kaarian ku. Gawan nu baydi sa babun lutay kaarian ku, intanggul lakina dayin mani tagasunul ku. Nuwa naku waku baydi sa babun luta amên sabin sa mani tawuy kapêtêgan tungkul kan Bapan Namalyari. Mallêngê kangkuy kaganawan tawuy mangidu sa kapêtêgan.” Sinabin Pilatu, “Sabêt ta kapêtêgan?”

Pamakayarin pikisabyan Pilatu si Jesus, nagsalwang si Pilatu buy inarap nay mani tawu. Sinabi na, “Ayin nakun makitan na kasalanan sa tawun ati.” Nuwa nipan-angaw wa pinunun mani Judio buy mani tawu, “Ipaku ya sa kurus!” Inuman sinabin Pilatu, “Ayin nakun nakit ta kasalanan sa tawun ati.” Nuwa ingkakadus lan nan-angaw. Sinabi ya êt Pilatu, “Ayin yan kasalanan!”

Nuwa nalimwan Pilatu, dat maguluy mani tawu sa Jerusalem. Kabay pinaulayan nan ipakun mani sundalus si Jesus sa kurus. Inlatiku yan mani sundalus buy pinayamingan la yan yaming ari. Impakuruna la kanay dyag sa diwi. Dinustak la si Jesus buy sinabi la, “Elêwên yu ya Arin mani Judio!”

Kwentu sa Biblia ya ubat sa Mateo 26:57-27:26; Marcos 14:53-15:15; Lucas 22:54-23:25; Juan 18:12-19:16