27. Ya Kwentu tungkul sa Mangêd da Dyag Samaritanu

Gisay allu, dilag gisay manurun kautusan ya namatang kan Jesus amên subukan ya. Sinabi na, “Manuru, sabêt ta sêpat kun daygên amên mabiyan nakun biyay ya ayin katganan?” Nakitbay si Jesus, “Sabêt ta nakasulat sa kautusan Bapan Namalyari?”

Nakitbay ya manurun kautusan, “Kaidwan muy Panginuun mun Bapan Namalyari buun bêkê, buun kaladwa, buun pas-êy, buun isip. Buy idun muy kaparisu mu kaparisun pangidu mu sa sarili mu.” Sinabin Jesus kana, “Ustuy sinabi mu. Daygên muy abiin ta amên mabiyan kan biyay ya ayin katganan.”

Nuwa labay manurun kautusan na papêtgan nay matinêk ya. Kabay pinatang na si Jesus, “Nu parabaydu, sisabêt ta kaparisu ku?”

Gisay kwentuy impakitbay Jesus kana. “Dilag gisay Judioy liyaki ya mamita sa gisay dan. Ubat ya sa balayan Jerusalem papakun ya sa balayan Jerico.”

“Kaban mamita ya, inapat yan mani tulisan. Kingwa lay kaganawan pibandiyan na. Pinatukpatuk laya buy inlakwanan lay nan paran nati.”

“Asê naêpêng, dilag pari un mani Judioy nidan baydu. Sên nakitan nay liyaki ya pinatukpatuk buy tinakaw mani tulisan na pibandiyan na, inlibasan naya. Buy insundu nay pamita na.”

“Pamakayari, dilag êt nidan bayduy gisay liyaki ya Levita. (Ya mani Levita, gisa yay layin mani Judioy manawup sa mani pari ya maglingkud sa Templu). Buy sên nakitan nay gisay liyaki ya pinatukpatuk buy tinakaw mani tulisan na pibandiyan na, inlibasan naya êt.”

Amêsên, dilag gisay tawuy Samaritanuy nidan baydu. (Si ati silay mani Samaritanu, layi silan mani Judioy nakapag-asawan kaatag ga bansa. Si mani Judio buy mani Samaritanu, mitubag ga abiin sila.) Nuwa sên nakitan nay Judioy liyaki ya pinatuk tulisan, kinalunusan na ya. Inuyasan nan alak buy laruy mani nukan Judio bayu naya binêdbêdan.

“Insakay nay Judioy liyaki sa asnu na buy gintan naya sa gisay bali ya pan-upan amên saysayên naya baydu.”

“Pamakawasak, kaylangan isundun Samaritanuy pamita na. Kabay binyanan nan peray magbandin bali ya pan-upan. Sinabi na, ‘Saysayên muya buy nu kulang pun na abiin na peray magastus mu kana, bayaran kata sa pag-udung ku.”’

Amêsên, pinatang Jesus ya manurun kautusan. Sinabi na, “Sa êlêw mu, sisabêt sa tatluy nidan bayduy pêtêg nangidu sa kaparisu nan tawuy pinatukpatuk mani tulisan?” Nakitbay ya manurun kautusan, “Sa êlêw ku, abituy nalunus kana.” Kabay sinabin Jesus kana, “Dali ka. Para êt bayduy daygên mu.”

Kwentu sa Biblia ya ubat sa Lucas 10:25-37