31. Namita si Jesus sa Babun Lanêm

Pamakayarin nangaral Jesus, sinabi na sa mani tagasunul na, “Kaban pan-ipauli kuy mani tawu, magsakay kaw na sa bangka amên muna kaw sa Betsaida.” Sên naipauli nay nay mani tawu, sinumukpa si Jesus sa gisay bung-uy amên kakapad nay manalangin. Buy nanalangin ya anggan bunak yabi.

Sên idi yana sa bunak dagat ya bangkan mani tagasunul na, magkasakit silay na sa pagsagwan, gawan salungat sila sa masikan na bagyu.

Pamakayarin nanalangin Jesus, inlaku nay mani tagasunul nan mamita ya sa babun lanêm.

Sên nakitan mani tagasunul nay dilag mamita sa babun lanêm, kinêdêsan sila gawan sa sadyay limu la. Kabay nakaangaw silan paradi, “Anitu!” Tandan Jesus ya malimu sila. Kabay nagbêg ya, “Agana kaw malimu, sikuy atiyê!”

Sinabin Pedru kan Jesus, “Panginuun, nu sabay sikay abiin, ipalaku muku baysên un mamita êt sa babun lanêm.” Nakitbay si Jesus, “Kaksaw ka di!”

Kabay nagtabuy si Pedru sa bangka buy namita ya sa babun lanêm papakun kan Jesus. Nuwa sên katiumnuy nan nagtakbang Pedro, nangawing ya sa palitêng na buy natanam nay malakas sa angin buy nakit nay sadyay lakas allun.

Gawan baysên, nalimu si Pedru buy pakanawa yan nilêmlêm. Masnêg nan sinabi, “Panginuun, iligtas muku!” Tambêng yan sinagêp Jesus buy sinabi na, “Nabêlêngbêlêng yay panampalataya mu ta! Buy siyan magmitalisa yay nakêm mu ta?”

Pamakasakay lan Jesus buy si Pedru sa bangka, tambêng tinunggên na malakas sa angin buy nagpatêtbêk ka lanêm. Inulimên yan mani tagasunul na buy sinabi la, “Pêtêg yabay awêd sikay Anak Bapan Namalyari du!”

Kwentu sa Biblia ya ubat sa Mateo 14:22-33; Marcos 6:45-52; Juan 6:16-21