Ifanec
Elcel unug ede gugqe alesoanah. Ifan uqa milcai hau Ifanean houqacai, elcel unug hogu niea ho uqa del 6 gu adi Ifaneanah. Ifan uqa mil ifane hedeanafa, milgu elcelcai qitigi gagatu adi nieanah. Etacub hoil qei alesoc gaul nieanah. Odean hoqa, Ifan uqau Kis adi qa hogu wa ohis lolowe obeanah.
Odean Ifan madeanah, “Fuladec alesoale!” Odan fuladec aleso nieanah. Ifan uqa mecidean ho fuladec houqa ho meu bahin, odan uqa houqa weni ho, “asil” eanah. Uqa fuladeccai gagatu ho filigan aleanah. Ode uqa gagatu hoqa weni ho “wi” eanah. Ifan uqa fuladec houqa uqa del hanuqec hogu uqa ifaneanah.
Elcel ifanec uqau del elis oan hogu qa, Ifan uqa ougu made hau ifanean ohis aleso niniean, mil qa facalis nieanah. Sain uqa hau ifaneanahgu ho, uqa wa ohis niea houqacai wa milus niea hoqa filigan aleanah.
Del iet (3) hogu qa, Ifan uqa ougu madean wa uqa filigande umuti niniean mil kakanec nieanah. Mil kakanec hoqa weni ho, “mil” eanah. Ode uqa wa hoqa weni ho, “macas” eanah. Ifan uqa elcel ifanean ho mecidean ho meu bahin feanah.
Odeafa Ifan madeanah, “Ois, mil ina oden, na gug filfilcai, gigcai, eli lec elcel filfilcai, gehu filfil alesoadeciec!” Odean ode alesoadeinah. Odan Ifan uqa elcel ifanean ho mecidean ho meu bahin feanah.
Odan elcel ifanec del sibou (4) hogu qa, Ifan uqa ougu madean, camcai, lagelcai, sulupaicai hoage alesoinah. Ifan uqa hoage mil fuladec utenigan mudadeanah. Ode uqa asilcai wi uqau gadac mec nienigancai, ode sain filfilcai, iar osahi osahi hoageu gadac mec nieian ho ifaenigan ho mudadeanah. Ifan uqa elcel ifanean ho mecidean ho meu bahin feanah.
Ode del besib (5) hogu qa, Ifan uqa ougu madean elcel unug wa iacul obecia houqacai, hai unugcai hoage alesoinah. Ifan uqa fean ho meu bahin, ode uqa hoage eldec le meu bahin adeanah.
Elcel ifanec del kesinub (6) hogu qa, Ifan uqa madeanah, “Eqaf gug filfil milgu obeciacai ho unug alesociec!” Odean Ifan madeanah iwe bahin alesoinah, odan eqaf leih qa manan, odan leih qa mil ohis wawagu obeciacai, odan leih qa ho uih. Odan ho unug hoage aladesoinah. Odan Ifan mecidean ho meu bahin feanah.
Ode Ifan madeanah, “Ois, ige qil ige dana aid ige ihoconige iwe mudadecun. Hoage esi milcai, eqaf unug hoageu ilo bileic ofadenigan."
Hocon Ifan uqa mil ufai odacat oadeafa, uqa hogu dana mudeafa, uqa eawac bilec houqa fudean dana ho iacul noanah. Dana houqa ho weni Adam. Ifan uqa aben hoil qeafa uqa elcel hogu efadeanah. Ode uqa Adam aben hogu bibile, uqa aben houqa ofdeian hocon uqa aben hogu mudean bileanah.
Ifan uqa aben ho gemacu, uqa na elis hoale abianalai filfil hondeg hogu efaleanah. Na hoil qa ho eawac bilec iseian, odan na hoil qa doc meuduncai meuqecen iseian. Ifan uqa Adam uqa aben ho iaculde na unug ageu meu houqa ois leian ec ho maudeanah. Odeafa qa, uqa na doc meuancai meuqecen ho iseian houqa ub lewan ec ho maudeananah. Uqa na hogude meu houqa lefe ho, uqa esi almeian ec ho maudeanah.
Ode Ifan uqa madeanah, “Dana uqa adi umuti bilecun ho meu hoil qe.” Odean hoqa, eqaf unug hogude eqaf hoil uqa Adam esudulecun ho qitigi.
Hocon Ifan uqa odean, Adam uqa hu kat bahin nieanah. Odean Ifan uqa Adam qesigude fehil hoil oafa hogude uqa aid mudeanah. Odeafa uqa mehule o wa Adam uteanah.
Sain Adam uqa aid houqa feafa uqa madeanah, “Ois! Itqecgu. Heuqa ho isacat iwe! Uqa ‘Aid’ ec madec nieian, elacin, uqa ho 'Dana' uqau gude mudean alosoanah.” Ode hocon dana uqa memegcai anag ulaleafa, uqa aideccai gabamdec osahi alesohia.
Ifan uqa danacai aid hoale uqa ihoconig iwe mudaleanhah. Uqa eldec le aleafa, uqa madaleanah, “Ale wawalai gude himenalacilcai, ahialacil hoage matibahin habie alesoadeciafa hoage mil he unugcai ihocwanigan!” OdeIfan uqa elcel unug uqa mudean ho meu bahinan feafa, uqa elcel ho unug hoagecen uqa wacu meu nieanah. Etacub heqa alesoan hoqa, del kesinub (6) hogu alesoanah.
Ifan uqa abi unug qeimudeanafa, del itanub (7) houqa soanah. Ode hocon, Ifan uqa el abi abi odean ho hedean, uqa del itanub (7) houqa eldec uteafa uqa gun mudeanah, elacin, del hogu qa, uqa abi oan hoqacan uqa huen mudeanah. Ifan uqa elcel unug mil hegu nieadecia houqacai, hau ohis nieadecia ho, Ifan uqa hi edegu uqa ifaneanah.
Ifan uqacan totqec louqec heqa: Gugqec 1-2