Iesus Uqacan Ho Mesaia Soian Ec Le Qel Qetec Ho Niea

Sain Ifan uqa mil he unug ifanean ho, elcel unug ho itotom adi nieanah. Qisolmec ho qei nieanah. Odan Adamcai Ewa hoalenanan ho, hoale wawalai niecgu bibilehi, hoale Ifanun wawalai utec bilehianah. Ois hogu sag o almec ho qei nieanah. Ifan uqa mil he unug qa ode nieian galedeanah.

Ois abi iacul hogu, Satan uqa Ewa ulduleian hocon uqa man wacugu noafa uqa le madeanah. Odean aid houqacai Adam hoale Ifan amuggu qisol mehianah. Hoale qisolmehian hondeggun ho, mil unuggu hegu dana aid unug sag ociaciafa hoage unug almeciacai.

Ois Adamcai Ewa hoale qisol mehian houqacan, etacub meuqe bahin hofa alesoanah. Hoale Ifancai ad bileinah. Odan houqau elianig hoqa sain hogu hananmec ho, dana aid unug bahin qisolmec duman houqacai basadecian alesocia, ode hocon hoagefa Ifancai ad bilecia. Ifancai dana aid hoageu bilecusadec houqa ho qisolmec uqa ho ifuldeanah. Odan hoqa, Ifan uqa bilecusadec houqa ho uqa ehelawe tutu mudeian hocon uqa isdec hoil ilamean nieanah.

Ifan uqa, mel hoil Ewa wacu gude sihul sihul alesoian houqa, uqa esi Satan gati lacude nanasaleian, odeb Satan uqa esi dana mel houqa faci gobisi gataweuteian ec le made qel qeteanah. Ois houqau gug hoqa, Satan uqa esi Mesaia houqa qeb almeian, odeian hoqa, Ifan uqa esi tulideb, uqa aie ehele eawac bileian, odebafa Mesaia uqa esi Satan uqau gagadi odec ho nanasaleb qeimebcaiteian. Iar mati bahinag nue hedeanafa, Ifan uqa, Iesus uqa ho Mesaia ec ho amasac mudeanah.

Sain Ifan uqa wa alecgu uqa mil he unug qe ifuldean hogu ho, uqa dana aid ini hoage uqacan wawa cefein hoage besade oade meadeian hocon uqa bot hoil saiade adeanah. Hi odecet bahin, dana aid unug bahin qisomec ageuan Ifan uqa aqeb qeimenigan ec niea, oda hoqa, Ifan uqa Iesus saiadeanah, Iesus uqa dana aid unug ini uqacan wawa cefenigan hoage unug uqa hoage besade oade meadeian.

Asac asac 100 iar matibahin nueadeinahgu ho, dana aid hoage qisolmec hoageuan ulouladec onigan niea ec houqa ifaecgu ho, ihanec dana hoage ho gaid ode Ifan ihandec utec abi ho mudeciahan. Odan hoqa, ihandec utec ho mudadein houqa ho dana aid hoageu qisolmec ho agasec adewahuqec. Ois Iesus uqa ho Ihanec Ilo Dana Ben bahin bilea. Iesus, uqa ihandec dana odacat hoage iwe qe, uqa ihandec osahi houqa adi ho ihoc dana aid mil he unug gude hoageu qisolmec ho agaseian houqa ho, uqa dodo uqa deweu feladean qecian almeanah. Iesus uqa ho, uqa itotom bahin uqa ihandec ilo dana ben alesoanah, elacin, el qisolmec adaha ho in hoil mudeafa houqacan olouladec ocun nieacai hoqa ho Iesus uqa oanah.

Ifan uqa Abraham maudeanah, “Mil he unug gude dana aid am filfil gude hoage unug esi inacangu hoage eldec onigan.” Ois Iesus uqa ho Abraham uqau sihul sihul gude alesoanah. Dana aid am filfil unug gude hoage uqacangu eldec ocia, elacin, dana aid unug in uqa Iesusun wacu cefeacai ho, uqa qisolmec hogude uqa besule omulec houqa oa, odan dana aid wawa cefeccai hoage ho, hoage Abraham uqau sihul sihul houqa alesocia.

Sain Ifan uqa Abraham uqa melah Aisak qeb almebafa, uqa ihandec uteian maudeanahgu ho, Ifan uqa Abraham melah Aisak uqau abengu ho, uqa sipsip manafal haungu ihandec ho uteian hocon uqa Abraham uqau saideuteanah. Ige unug qisolmec igeuan almecun niea! Oda hoqa, Ifan uqa Iesus saideanah, uqa ho Ifan uqau sipsip manafal haun, ode uqa igeu aben oafa uqa ihandec ho mudeian almeanah.

Sain Ifan uqa Isip hogu ulumen meuqe efelufel houqa itqecgu suldeanahgu hogu, uqa Israel dana hoage aidenacil himenacilcai ageu ageu himenacilcai, hoage sipsip manafal haun, odeb sipsip houqa ho deweu itotom adi houqa qebil almebafa logac ho ociafa, hoage lo hoageu aba wacgu ohiscai qesi nanahaigu log ho pilisideic loudenigan hocon madadeanah. Sain Ifan uqa log houqa feafa, uqa hoageu lo ho mehelude nuean hocon, uqa hoageu dana mel matude ho qei aqean almeadeanah. Etacub ho alesoan houqacan ho Mehele Nuec (Pasowa ) ec madecia.

Iesus uqa ho uqa Mehele Nuec (Pasowa) houqau sipsip manafal haun houqa. Iesus uqa ho itotom adi odan uqa qisolmec qitigi, odan uqa ho uqa Mehele Nuec (Pasowa) sain hogu uqa qecian almeanah. Hocon in hoil uqa Iesusun wacu cefeacai ho, uqa Iesus logac nean houqa ho, dana, o, aid houqau qisolmec hoqacan edeweuteacai, odan, Ifan uqau ulouladec soa houqa dana, o , aid houqa mehelude nueacai.

Ifan uqa Israelde dana aid uqa gawoadean hoagecai uqa wacu osahi meafa, uqa le made qel qete gagadi mudeanah. Israel dana aid hoage ho, uqa hoage gawoade oadeanah. Oda hoqa, Ifan uqa qil wacu osahi meafa Le Made Qel Qetec Gagadi Mudec Qilde mudean houqa ho, uqa dana aid unugun ageuan mudeanah. Le Made Qel Qetec Gagadi Mudec Qilde mudean houqacangu ho, uqa dana aid am filfil gude, ini hoage Iesusun wawa cefecia ho, hoage ho Ifan uqau dana aid uqa gawoadean hoagecai, hoageu hondeg alesocia.

Moses uqa ho uqa Ifan uqau le ahun madec dana wenicai, ode uqa ho Ifan uqau le ho amasac qasale madeanah. Oda hoqa, Iesus uqa ho uqa Ifan uqau le ahun madec dana unug bahin holimadec bahinag. Uqa ho Ifan hocon uqa elcel unug mumude, uqa el le ade madean houqa ho, uqa Ifan uqau dumanig hogu ocobe uqa Ifan uqau le houqa madeanah. Gug houqacan ho, Iesus uqacan ho mamadeic, uqa ho Ifan Uqau Le ec maudecia.

King Deiwit uqa sihul sihul uqau gude hoil esi alesoian ho, uqa esi Ifan uqau dana aid hoageu king ilo bile gaidgaidun ofadeian ec ho Ifan uqa king Deiwit le made qel qete maudeanah. Ois Iesus uqa ho uqa Ifan Melah, odan uqa Mesaia, ode hocon uqa ho Deiwit uqau sihul sihul gude uqa fil bahin alesoan hocon uqa ihoc, uqa gaidgaidun king ilo bileian.

Deiwit uqa Israel hoageu king, oda hoqa, Iesus uqa elcel unug hau ohis nieadecia hocai, hau gemacu nieadecia hocai, mil unug gudecai, mil facalisdecai, uqa elcel ho unug ageu king ilo bilea! Uqa esi haun ehele soafa, uqa ilo bahin bileian hogu uqau ilo bilec houqa ho, uqa esi tutucuncai, wawa meu niecgu bileccai, houqa ho uqa ilo bile ofdeb gaidgaidun nieian.

Ifan uqacan totqec louqec heqa: Gugqec 1- 3, 6,14, 22; Ehelawe Oc 12, 20; 2 Samuel 7; Hibru 3:1-6, 4:14-5:10, 7:1-8:13, 9:11-10:18; Le Amasacdec 21 hogude