Ehelawe Oc

Israelde hoage Isip ulude nuenigan ben bahin elubaeinah. Hoage haun ehelawe begabeg abi dana aid qei bilecia. Hoage Mil hoage onigan ec Le Madec Qel Qetec niean hogu nuenigan nueinah. Israel hoage Isipde hoageu gude elcel ocun eic ocoliadecianfe, Isipde hoage elcel adec adi adeinah. Hoage gol hofa, o, silwa hofa, odan elcel elianacai hondeg odacat hofa adeinah. Dana aid hatu hoil hoil gude hoage Ifanun wawa cefein ho, hoage sain Israel hoage Isip uludeinahgu hoagefa Israelde hoagecai ilam nueinah.

Asil ho Ifan uqa tain hoil tutu adi qafulec taweanahgu hogu uqa hanuqeanah, ode wi qa, tain tutu adi qafulec houqa lai iec alesoanah, ode ohis lulwa tatawe ieanahgu hogu uqa hanuqeanah. Ifan uqa hogu uqa hanueqe hi ifacadadean hoage totodeinah.

Odan del ganicif adi nueanafa, Isipde King uqa dana aid uqadeucai hoage isdec hoageu ho ehele falidean, hoage Israelde dana aid hoage ehele hoageu begabeg abi dana aid bileadenigan hocon galeadeanah. Ifan uqa dana aid hoage uqa ho Gugufu Ifan Osahi Adi ec odeichoage donigan, uqa ho Iawe, odan uqa ho Isipde Kingcai, Isipde King uqau ulec manecet matibahin hoage hogimadec uqa gagadi odec ahulec bilea ec ho fenigan. Gug houqacan, Ifan uqa odean Isipde King uqa isdec falidecun cucule uqa ilou teieanah.

Hocon Isipde King uqa fan adec dana uqadeucai, hoage Israelde dana aid hoage ehele hoageu begabeg abi dana aid bileadenigan hocon hoage labadeic totoadeinah. Sain Israelde dana aid hoage Isipde fan adec dana hoage fafaheician feadeciafa, hoage macas logcai houqa nahaicisai niniean, Isipde King uqau fan adec dana hoage qa nahaicisai fahecian feadeciafa, hoage utuf soqa ec dociafa hoage ben bahin cumunieciafa hoage utaceic eweinah. “Ige elacicin Isipde ule faheqa, o ige qil almecun io!”

Moses uqa Israelde dana aid madadeanah, “Ub umuniebilac! Qil Ifan uqa agecen meme uqa adeian, ode uqa age esuladeb hoage qei age aqebilac.” Odean Ifan uqa Moses maudeanah, “Dana aid hoage macas logcai ho totmudeic obenigan madadece.”

Odean, Ifan uqa tain tutu qafulec houqa gildean wanafa, uqa Israeldecai, Isipde hoage qatanadec gemacu tain houqa mean taweanah. Hocon, Isipde hoage Israelde qei feadeinah.

Ifan uqa, Moses uqa leben ohisde dadagaweb, macas wa qatane filigandeian hocon maudeanah. Moses ho odeanafa, Ifan uqa odean wasali uqa macas gude wa houqa sundean, hanenaigucisai ho nunuean, meulifaingucisai hofa nueanah. Odean hocon, macas gemacu qa obecun hi hoil alesoanah.

Israelde dana aid hoage wa nanahai nanahai olcolde niniehian, hoage macas gemacu mil kakanecgu ocobe nueinah.

Odean Ifan uqa tain houqa hi afaqec tawean ho uqa ohisdean tetean, Isipde hoage Israelde dana aid cumbibisolecian feadeinah. Isipde hoage Israelde ho labade nuenigan hocon isdec mudeinah.

Hocon hoage macas gemacu hi ho nieanahgu, hoage Israel dana aid totoadeic wainah. Odan hoqa, Ifan uqa odean Isip hoage cucumunie ocobeic qa, hoage odecian hoageu Karis ho hadagieinah. Odan hoage utaeinah, “Cum nuecie! Ifan uqa Israelde dana aid hoagecen meme uqa fan mea!”

Israelde dana aid hoage unug meu adi macas leteic nahaicisai wacianafa, Ifan uqa, Moses uqa haun ehele leben ohisde leben dadagaweian maudeanah. Sain Moses uqa le totodec odeanafa, wa uqa Isipde fan adec dana hoage lahulade oade taceafa, uqa ehele asac nieanah iwe aleso nieanah. Isipde fan adec dana hoage unug bahin wa leic almeinah.

Sain Israelde dana aid hoage Isipde hoage almecian feadeciafa, hoage Ifan uqa adi ho uqa ihoc hoage ofadeian ec ho dodoic, hoage Moses uqa ho uqa gugufu Ifan uqau le ahun madec dana ec ho doinah.

Odedeic Israel dana aid hoage ben bahin galececeic elubaeinah, elacin, Ifan uqa hoage almebilacancai, begabeg abi obilacancai, uqa hogude besade oadeanah. Ois, hoage etegsiec Ifan ewel outenigan. Israelde dana aid hoage qei begabeg bilebilac, hoage meu bilec qilde ho oin houqacan elubaecgucai, Ifan uqa hoage Isipde fan adec dana lebena gude uqa besade oadean houqacan, hoage Ifan weni ohisdecgu hoage seg qilde hoageu matibahin siladeinah.

Ifan uqa Israelde dana aid hoage uqa meheladean houqacan (Mehele Nuec), hoage iar osahi osahi hoage gaid ode isde dodoic elubaeic eli lenigan madadeanah. Hoage ode odecgu ho, Ifan uqa adegu esulade Isipde ho aqean golodedecian uqa hoage begabeg abi dana aid bilein hogude uqa besade oadean fahein houqacan isde donigan. Hoage sipsip nacag, deweu meu bahin adi hoil qecian almeanafa, hoage bret iscai qitigi namecia houqacai leleic, hoage etacub houqacan isde dodoic elubaeinah.

Ifan uqacan totqec louqec heqa: Ehelawe Oc 12:33-15:21 hogude