Ifan Uqa Iakob Eldec Utea

Sain dana mel hoale benmehianahgu, Iakob uqa logu niecun galedeanah. Odan hoqa, Esau uqa ho mahat obecun galedeanah. Rebeka uqa Iakobcun wacu ben bahin nieanah, odean hoqa, Aisak uqa qa Esaucun ho wacu ben bahin nieanah.

Del hoil, sain Esau uqa mahat obean ho faheafa, uqa wen asisi bahindean hocon uqa Iakob maudeanah, “A ina ihocuf eli saiadecal ho leih itegan.” Odan Iakob uqa le wadacde maudeanah, “Ois, ina asac, ina dana mel matu hocon, elcel ina mugum bilea ho isa ois oigan ec ho niebafa.” Odeanfe, Esau uqa dana mel matu hocon elcel uqa muguc ho, uqa Iakob uteanah. Odeanafa, Iakob uqa uqau eli leih ho Esau uteanah.

Ois, Aisak uqa eldec uqau ho Esau uteian hocon odeanah. Odan hoqa, uqa ho qei odec niniean, Rebekacai Iakob hoale Aisak qaudecgu hoale Iakob uqa Esau ihoconqe soanah. Aisak uqa toia bahin hocon, uqa tutu bahin mecieb wawahuqe. Hocon, Iakob uqa Esau uqau loto elcel ho taqadeafa, uqa mecmec ganac oadeafa, uqa hoil qa du ohis tean meme, uqa leben nanahaigufa mealeanah.

Iakob uqa Aisakcai soafa uqa madeanah, "Isa Esau, isa ina eldec itegan hocon suga.” Sain Aisak uqa mecmec bagi ho fale deban doafa, ode uqa Esau uqau loto elcel ho dedeman meafa, uqa isdean ho heuqa gugufu Esau ec doafa uqa eldec uteanah.

Odan hocon, Esau uqa gemag becgu uqa Iakobun alucal doudede uqa fecun ho uleanah, elacin, Esau uqa dana mel matu hocon elcel matu muguc houqa ho Iakob uqa feleu outeanah, odede eldec uqa muguc hofa feleu outeanah. Hocon sain hoale memalai almebafa, Esau uqa Iakob qeb almeian ec madeanah.

Odan hoqa, Rebeka uqa Esau uqa ade isdec ilamean houqacan uqa le dahmeanah. Hocon uqa Aisakcai made dohiafa, hoale Iakob acanamcai suldulehian, uqa Rebeka uqau sihul hoagecai bileian hocon nueanah.

Iakob uqa Rebeka uqau sihul hoagecai uqa iar matibahin bileanah. Sain hogu uqa aid oafa, uqa himecul alesoin hoqa dana mel 12, odan melaid osahi. Odan Ifan uqa odeanahgu, Iakob uqa ehewanig acalac bileanah.

Iakob uqa Keinan hogu bilean ho, uqa masa uqau ho ulude nue obean 20 iar hedeanafa, uqa silhul uqaucai, abi dana aid uqadeucai, odan eqaf manan am filfil uqadeu ho unugcai, uqa oadeancaitean hoage haun ehelawe Keinan hogu faheinah.

Iakob uqa isdean ho Esau esi qiteb almeigan ec ho doan hocon, uqa ben bahin ode cumunieanah. Hocon Iakob uqa eqaf manan am filfil hogude matibahin, uqa Esau idacdulec amug utec suladeuteanah. Abi dana ini eqaf ho Esaucun oade fahein hoage Esau maudeinah, “Inau abi dana Iakob uqa eqaf heage inau suladeisea, uqa qa esi qei giec alesoian.”

Odan hoqa, Esau uqa Iakob uqau qisolmec houqa uqa wele agaseutete, uqa qisolmec houqacan qel isdeanah. Odan hoale ehele feanfean ehiafa hoale elubaehianah. Odean, Iakob uqa Keinan hogu wacu meu niecgu bileanah. Odan Aisak almeanafa, Iakobcai Esau hoale uqa lelehianah. Ois, Ifan uqa Abrahamcai le made qel qete gagadi mudehiangu uqa le made qel qetadean houqa Aisak uqaugu bilean ho, qil Iakob uqaugu wanah.

Ifan uqacan totqec louqec heqa: Gugqec 25:27-33:20 hogude