King Uqau Hatu Qataneanah
Iar matibahin nueanafa, Deiwit uqa almeanah, odean uqa melah Solomon uqa haname ilo bibile Israel hatu ofdeanah. Ifan uqa Solomon le maudeanahgu, uqa Solomon uqa elacicin bahinag ben ode galedea houqacan ocolideanah. Odan Sain Solomon uqa doc meu bahinagcai bileian ocolieanafa, Ifan uqa wacu meu nieanafa, uqa odean Solomon uqa mil gude dana unug holimade, uqa doc meu bahinag acalac bileanah. Solomon uqa elcel matibahin houqacan uqa iwaldec oanah. Ode, uqa gehilec dana doc meu bahincai bileanah. Ifan uqacat adi odean Solomon uqa ehewanig acalac bileanah.
Ierusalem hogu, Solomon uqa memeg Deiwit uqa Gun Lo cefeian hocon ilameafa, uqa lo cefec elcel oso hagudeanahcai houqa ho uqa cefeanah. Ois, dana aid hoage Egulec Lo Talabes ho uculeic qa, hoage Ifan uqau Gun Lo hogu waiciafa, hoage Ifan binainig mumudeic, uqa ihandec hofa mude uteinah. Ifan uqa Gun Lo hogu, uqa dana aid uqadeucai uqa hoage gemacu bileanah.
Odan hoqa, Solomon uqa aid hatu odacat gudecen wacu nieanah. Uqa aid matibahin, 1000 odada hoage uqa aidecul bileutenigan oadeanah. Hi hogu, uqa Ifan uqau le ho qei totode odeanah. Aid matibahin hoage hatu filfil gude fahadeinah, odeic hoage ulec manecet hoageu hofa oadecian caitean faheciafa, hoage odecet adi hoage ulec manecet hoageu ho binainima mumudeic bileinah. Sain Solomon uqa toia meanahgu, uqafa ulec manecet hoageu ho binainima mudeanah.
Ifan uqa Solomonun gemag beanah, ode Solomon uqa Ifanun adi qei bilean houqacan uqa ulouldec hoqa, Solomon uqa almebafa, Ifan uqa Israel hatu ho qataneb elis alesohian ec uqa le made qel qeteanah.
Odan Solomon uqa almeanafa, uqa melah Rehoboam uqa king alesoanah. Rehoboam uqa doc meucai qei bileanah. Israel hatu gude dana aid unug hoage Rehoboam uqa ois king alesoah ec ho, hoage gagadi mudenigan hocon hoage faheic eguleinah. Hoage Solomon uqa abi gagadi matibahin odenigan adean abi oin houqacancai, uqa hoageu gude men aci matibahin gohilean houqacan, hoage gonaeic Rehoboam maudeinah.
Rehoboam uqa doc meucai qegu uqa hoage labadecgu walde madadeanah, "Age isdecia ho, mem Solomon uqa age abi gagadi bahin adeanah ec docia. Odeqeit, isa uqa abi adean houqa holimdec age ademin, age abi gagadi bahin onigan, odeb isa age uloul adec adeigan houqa meuqe bahin, uqa age adean houqa hogimdec ho adeigan."
Israel uqau feifei 10 hoage Rehoboam facalisanig bilecun uleinah. Feifei elis hoale adi qa, hoale uqa facalisanig odecet adi bilehianah. Feifei elis hoale ho Iuda uqau hatu houqa alesohianah.
Israel uqau feifei 10 odacat hoage Rehoboam facalisanig bilecun uleinahcai hoage qa, hoage dana hoil weni Ieroboam ecia ho uqa hoageu king bile adeian madeinah. Hoage hatu hoil alesonigan hocon, hoage mil notgucisai niean houqa ociafa, hoage hatu houqa ho weni Israel ec madeinah.
Ieroboam uqa Ifan facalisanig bilecun cucule uqa ho odeanahgu ho dana aid hoage silail mudeinah. Uqa dana aid uqadeu hoageu kadan elis cefaleanah. Hoage Iuda hatugu nueic, Gun Logu Ifan binainig mudecun ho cuculeic qa, hoage kadan elis hoale binainimalai mudeinah.
Odan Iuda hatucai Israel hatu hoale ad mudean mudean bilehianah, ode hoale gaid ode hoale nanan acadehi bilehianah.
Israel hatu qilde hogude king unug hoage ho meuqe. Odan Israel hogude dana odacat hoage king hondeg hoageu aben ho ociafa, hoage king bilecun eciafa hoage king hondeg ho matibahin aqecian almeinah.
Israel uqau king unug hoagecai, dana aid matibahin hoage kadan binainima mudeinah. Hoage kadan binainig mudecgu ho, hoage wal kobol mudeccai, ode sain odacatgu ho, hoage mel alcal hofa aqecian almecian ihanec mudeinah.
Iuda uqau king qa, hoage ho Deiwit uqau sihul sihul gude adi bileinah. King hogude leih qa, hoage dana meu bahin, odan hoage tutcungu adi ilo bileinah, odeic, hoage Ifan binainig mudeinah. Odan hoqa, Iuda uqau king matibahin hoage qa, hoage dana meuqe, odan hoage elcel ifuldeccai bileinah, odeic hoage kadan ho binainima mudeinah. King hondeg gude leih qa, hoage himenacilgu ulec manecet ihanadec hofa mudeinah. Iuda dana aid matibahin hoage Ifan facalisanig bilecun uculeic qa, hoage ulec manecet odacat ho binainima mudeinah.
Ifan uqacan totqec louqec heqa: 1 King 1- 6; 11-12 hogude