Abi Dana Hoil Uqa Odacat Qei Waloloma Leacai

Del hoil Pita uqa Iesus ocolideanah, “Ilo isau, sain oti hoil uqa isa qisol mitefe, isa sain ganic ode ho, isa uqau qisol mec houqa agaseutitic houqacan qei isdeminac? Isa dahini ceceleb nue 7 gadac oian a?” Odan Iesus uqa madeanah, “7 gadac qe! Odeqeit, hawinec 70 ho ina ode 7 degan!” Iesus he madean ho, uqa in hoil ige qisolmigefe ho, ige qisolmigec uqau houqa ho agaseutete, houqacan ub isdemunac hocon dodo uqa le he madeanah.Odeafa, Iesus uqa le he tot aqeanah.

Iesus uqa madeanah, “Ifan uqau ilo bilec houqa ho dana aid ofadea ho ede iwe, king hoil uqa abi dana aid uqadeu hoage elaci hoil adeafa, uqa hondegun medeu wadadec ho oian hocon uqa bile tutumudeian odea iwe. Odan abi dana uqadeu gude hoil qa, uqa medeu wadacdec uteian ho ben bahig, uqa 200,000 iar abi ociafa, houqau abi amug men aci ociacai houqau gadac hogu uqa medeu wadacdec ho uteian.”

“Abi dana houqa etacub oan hondegun medeu wadacdec utecun ho ihocqe, hocon king uqa madeanah, ‘Dana he uqau sihulcai hoage begabeg abi dana bilenigan suladeciafa, men aci ho gude soian houqa ociafa, uqa men aci isau oan houqacan medeu qei itec niea ho, age houqa nahai adifa tutu mude utenigan.’”

“Odan abi dana houqa king amuggu gatelac cefe bileafa, uqa madeanah, ‘A ina isa sain nag ode itenafa, isa esi ina ganic bahin iseigan niea ho unugcai iseigan.’ Hocon king uqa abi dana ho amug waloloc leafa, men aci medeu uqau ho unugcai qitigi mude utete, uqa abi dana ho uludean nueanah."

“Odan hoqa, sain abi dana houqa king cuculude aleso nueafa, uqa abi dana fiac hoil feanah. Abi dana fiac houqa, uqau men aci wadacde uteian ho lagel 4 abi ociafa, abi amug men aci ociacai gadac odaha ho uqa uteian nieanah. Abi dana houqa abi fiac ho utalanagsiec bilitede fafale maudeanah, ‘Isau men aci medeu ina wadacde itegan niea ho itece!’”

“Odan uqa abi fiac houqa gatelac cefe bileafa uqa madeanah, ‘A ina isa sain nag ode itenafa, isa esi ina ganic bahin iseigan niea ho unugcai iseigan.’ Odan hoqa, abi dana houqa ho uqa abi dana fiac ho faleafa kalabusgu mudean bibilean nuean, uqa men aci medeu wadacdeian niean ho unug wadacde qitigi mudeanah.”

“Odan abi dana odacat hoage etacub ho alesoan ho feciafa, hoage ben bahin ode wawa meuqe meanah. Odan hoage kingcai nueciafa, hoage etacub ho alesoan ho unug bahin, hoage king totquleinah.”

“Odan king uqa abi dana ho utadean uqacai wanafa maudeanah, ‘Ina abi dana meuqe bahin, ina isa ninic itecan, isa inau men aci medeu houqa ho agasecisisi houqacan qei isdinah. Hocon Inafa odecet adi odeumah.’ Ode king houqa gemag asisi bahin bean hocon, uqa abi dana meuqe ho fale kalabusgu mudean bibilean nuean, uqau men aci medeu ho unug wadacde qitigi mudeanah.”

Odeafa, Iesus uqa madeanah, “ Age unug otialacil hoil qisol meadebil, age qisolmec uqauan wawagu qei gugufu bahin agaseutetec houqacan qei isdefeg ho, Mem isau hau ohis bilea ho, uqa esi odecet bahin odadeian.”

Ifan uqacan totqec louqec heqa: Metiu 18:21-35 hogude