Ifan Uqa Deiwitcai Le Made Gagadi Mude Qel Qetea

Saul uqa Israel ageu hanuqec King alesoadeanah. Uqa dana docancai, odan uqau meciec ho meu bahin odan galecai, dana aid hoage odahacan galeadeanah iwe bahin uqa alesoanah. Saul uqa iar ganicif hanuqecgu uqa Israel hoageu king bile ofadean hogu ho, uqa king meu bahin bile adeanah. Odan hoqa, uqa fecec dana alesoanah, uqa Ifan ou qei totode odeanah. Ode hocon, Ifan uqa dana hoil gawoanah, odeb esi sain utecgu dana houqa esi Saul uqau abengu uqa king alesoian.

Ifan uqa Israelde mel haun hoil uqa weni Deiwit, uqa king Saul uqau aben oian hocon gawuleanah. Deiwit uqa sipsip ofadec dana, ode uqa Bethlehem taun hogu bileanah. Sain filfilgu, Deiwit uqa memeg uqau sipsip ofadede, uqa laioncai, eqaf bea ecia hoale sipsip utum adehianfe, uqa hoale aqalean almehianah. Deiwit uqa duman nocgu bileanah, odan uqa tutu obec dana, ode uqa Ifan uqa adi ho uqa ihoc ec ho dodoule, uqa ou totode odeanah.

Deiwit uqa fan adec dana wenicai, odan uqa ilo dana wenicai bileanah. Sain Deiwit uqa mel haun bileanahgu, uqa dana hoil docancai itoec, uqa weni Goliat ecia houqacai adehianah. Goliat uqa fan adecun iwaldec oanah, odan uqa dana gagadi, odan uqau docan ohis tec ho 3 mita ode taweanah. Odan hoqa, Ifan uqa Deiwit esuldean, uqa Goliat qean almemean, uqa Israel dana aid oade meadeanah. Ho hedeanafa, Deiwit uqa Israel uqau ad fiacul ho mati bahin aqe golodeanah, hocon ho uqacan dana aid hoage uqa weni ohisdeinah.

Saul uqa dana aid hoage Deiwitcun uqacan galeadean houqacan, uqa fel adeanah. Saul uqa sain matibahin Deiwit qeb almeian odeanah. Hocon Deiwit uqa lokume obeanah. Del hoil, Saul uqa Deiwit qeb almeian hocon uqa Deiwit memege obeanah. Deiwit uqa Saul fewan hocon, uqa men iacul lokume bileanah. Odan Saul uqafa men iacul hocotgu adi uqa iacul wanah. Odean hoqa, Saul uqa Deiwit qei mecideanah. Ois hogu, Saul uqa Deiwit utuqanig bahin wanahgu, Deiwit uqa ihoc Saul qeb almealihif hoqa, uqa ode qei odeanah. Uqa ho ucule qa, Deiwit uqa King alesoian hocon bahin uqa qei Saul qeb almewan ec ho uqa Saul ifadeian hocon, uqa Saul uqau loto medeu hoil ago oanah.

Nuean, nuean, fan adec hoil nieanahgu Saul qecian almeanah, odean hogu, Deiwit uqa Israel uqa king alesoanah. Uqa king meu bahin bileanah, odan dana aid hoage uqacan galeadeanah. Ifan uqa Deiwit eldec utetean, Deiwit uqa elcel mudean ho meu meu adi alesoanah. Deiwit uqa fan ade matibahingu acadean, Ifan uqa esuldulean uqa Israel hoageu ad dana ho aqade golodeanah. Deiwit uqa hihinage Ierusalem oafa, uqa Ierusalem taun benahiac hogu, uqau king bilec sain hogu, uqa abi gug filfil ho unug hogu nieian madeanah. Deiwit uqa king bilean sain hogu, Israel hatu hoqa gagadi odec ahulec odan ehewan acalac bileanah.

Deiwit uqa Ifan uqau gun lo hoil cefebafa, Israel dana aid hoage hogu sociafa Ifan binainig mumudeic, uqa ihandec utenigan hocon isdec oanah, elacin, 400 iar ode ho, dana aid hoage Moses uqa hoage so Egulenigan Lo Talabes cefe adeanahgu hogu soic, hoage Ifan binainig mumudeic uqa ihandec uteinah.

Odean hoqa, Ifan uqa le ahun madec dana weni Natan suldean, uqa le heuqa Deiwitcai o nueanah, "Ina fan adec dana hocon ina Gun Lo isau he qei cefeitenac. Ina melam uqa esi cefeian. Oda hoqa, Isa esi ina eldec ben bahin iseigan. Inau sihul sihul alesonigan ho gude hoil esi king bilecia iwe bile, uqa esi gaid gaidun dana aid isadeu hoageu ilo bibile ofadeian!" Deiwit uqau sihul sihul alesonigan hogude, in uqa esi gaid gaidun ilo bibile ofadeian houqa ho Mesaia. Mesaia uqa ho dana Ifan Uqa Gawoan Houqa, odeb uqa esi milgude dana aid hoageu qisolmec ho gude ho, uqa esi besade oadeian.

Sain Deiwit uqa le ho dahmeanahgu, uqa qei giec bahin, Ifan uqa Deiwitcun doafa, uqa Deiwit uqa weni ben bahin nieiancai uqa eldec matibahin uteian le maude qel qeteanah. Odan Deiwit uqa houqacan uqa Ifan heitecah ec mamaude, uqa Ifan weni ohis deanah. Deiwit uqa Ifan uqa esi el saingu etacub ho odeian ho uqa qei doanah. Odan hoqa, el sain etacub ho alesoan hoqa, Israel hoage sain ecelagcai ho humudeic bibilecian nueanah. Odeanafa, 1000 iar oian odeanahgu hogu Mesaia uqa alesoanah.

Deiwit uqa ilo bibile ofadean ho, uqa abi tutucun adi odede, uqa abi uqau houqa gaid ofdedean iar matibahin nueanah. Odean Ifan uqa Deiwit eldec uteanah. Odan hoqa, sain Deiwit uqa toia meanahgu, uqa Ifan amuggu qisolmec bahin hoil mudeanah.

Del hoil, sain Deiwit uqau fan adec dana hoage unug bahin hoageu lo uculudeic, hoage fan adec matibahin nieadeinahgu hogu acade niniecian, Deiwit uqa lo uqau gude meciean nuean ho, uqa aid galecai hoil wa loloan feanah. Aid houqa weni Batseba.

Deiwit uqa hoilgucisai meciecun cucule qa, uqa itacub hoil ena suldulean nue, uqa nue aid ho mehule fahe Deiwit uteanah. Odean Deiwit uqa aid ho falean niehiafa, uqa ehele lo uqaugu suldean nueanah. Sain nag bahin nueanafa, Batseba uqa wacucai mean hocon, uqa le houqa Deiwit suldeuteanah.

Batseba gemug weni Uria, odan uqa ho Deiwit uqau fan adec dana meu bahin bileanah. Deiwit uqa Uria uqa fan adec aben ho ucule faheian madeanah. Odan Uria uqa faheanafa, Deiwit uqa Uria uqa nue aideccai bilehian hocon maudeanah. Odan hoqa, Uria uqa fan adec dana unug hoage ode acade niniebil, uqa logu nuecun ho uleanah. Odeanfe, Deiwit uqa Uria ehele suldean fan adec abengu nueanah, odede uqa, fan adec dana hoageu ilo dana ben houqa, uqa Uria fan adec gagadi bahin nieaugu hogu mudeb, uqa qebil almeian hocon maudeanah.

Odan sain Uria qecian almeanafa, Deiwit uqa Batseba oanah. Odan uqacai bilehian nueanafa, Batseba uqa Deiwit uqau dana mel baseuteanah. Deiwit uqa ho odean houqacan, Ifan uqa gemag asisi bahin beanah. Ode hocon, Ifan uqa le ahun madec dana weni Natan suldulean, uqa Deiwit qisolmec bahin ho mudean houqacan maudeian nueanah. Deiwit uqa ahuldicah ec doafa, uqa wacu falideanfe, Ifan uqa silail uqau ho agaseutete houqacan qei isdeanah. Odan sain Deiwit uqa bilean wanahgu ho, sain meuqegu hofa, Deiwit uqa Ifan totodede, uqa ou ho totodec odeanah.

Odan hoqa, uqau qisolmec houqacan uqa olouldec oan houqa ho, dana mel uqau houqa almeuteanah. Odan sain Deiwit uqa bilean wanahgu ho, uqau sihul iacul hogu hoage nanan acadeic bileinah. Odean Deiwit uqau gagadi odeccai bilean hoqa, uqa weni ben bahin ode noanah. Deiwit uqa Ifancai uqacan adi gugufu bahinag qei bileanah, odan ho odean hofa, Ifan uqa le madec qel qetec uqau houqacangu uqa ode adi uqacan adi bileanah. Deiwitcai Batseba hoale bilehian wanafa, hoale dana mel hoil basehiafa mel hoqa weni Solomon qehianah.

Ifan uqacan totqec louqec heqa: 1 Samuel 10; 15 -19; 24; 31; 2 Samuel 5; 7; 11-12 hogude