Wa Alec

Sain ecelagcai bahin nue hedeanafa, dana aid matibahin milgu bileinah. Hoage dumana meuqe bahin cumunancai ho mumudadeic, hoage hihiqana tetean bileinah. Etacub ho nue meuqe bahin meanfe, Ifan uqa wa alec ben bahingu uqa mil he unug qeb qeimeian hocon isdec mudeanah.

Odan hoqa, Ifan uqa Noacan wacu nieanah. Noa uqa ho tutu obec dana, odan uqa dana aid kobol meuqe bahin mudecia hoage gemacu bileanah. Ifan uqa wa alec suldeian isdec mumude bilean houqacan uqa Noa maudeanah. Ifan, uqa Noa uqa bot ben bahin hoil mudeian hocon maudeanah.

Ifan uqa Noa uqa bot houqau ecelag ho 140 mita ode mudeian, odeb babagalain uqau ho 23 mita, odeb ohis tec uqau ho 13.5 mita tec mudeian maudeanah. Noa uqa bot houqa ho nagu mudeian, ode uqa batal iet ohaleb ohis teian, ode aben matibahin agiadeian, ode qaqas hoil mudeian, ode uqa wasali waian ho aba hoil ohonawec mudeian maudeanah. Bot houqagu esi Noa uqa aidec himeculcai, odeb eqaf filfil mil gude obecia hoagecai, hoage wa alec nieian hogu qei fadalebilac hoage meu adi bilenigan.

Odan Noa uqa Ifan madeanah iwe totodeanah. Uqa melahul iet hoagecai, hoage bot mudecun hi Ifan madadeanah iwe hoage ode bahin mudeinah. Bot ho ben bahinag hocon hoage mumudecian iar matibahin nueanah. Noa uqa wa alec houqa soian ec ho uqa dana aid dahia faleanah. Ode uqa hoage qisolmec ho uculeic, hoage falide Ifancai sonigan hocon madadeanah. Odean hoqa, hoage uqau le houqacan qei wawa cefeinah.

Ifan uqa, Noa uqa aidec himeculcai, eli hoage lenigancai, eli eqaf hoage lenigan ho hoage eli am ho ihoc waian ho hagudenigan bahin madadeanah. Sain elcel ho unug ho saiadec hedec nieanafa, Noa uqa dodocai, uqa aideccai, uqa melahul iet hoagecai, odan melahul hoage aidelacilcai, hoage bot ho iacul wanigan sain soa ec ho Ifan uqa Noa maudeanah. Danacai aid ho unug gabandec ho 8 hoage bot ho iacul wainah.

Ifan uqa eqaf unug gude manafalcai, ufinocai, odan hai hoagefa odecet adi ho oadeafa, uqa hoage bot iacul waciafa hoage sain wa aleian hogu, hoage meu adi bilenigan hocon uqa hoage suladean hoage Noacai wainah. Ifan uqa eqaf manafal 7, odan ufino hofa 7, odan eqaf hoage Ifan ihandec utecun ho ois ec niea hondeg ho, uqa eqaf hondeg ho odeafa uqa suladean bot iacul wainah. Sain hoage unug bot iacul wacianafa, Ifan uqa dodo uqa aba meneanah.

Odean wa hananme neanah, odan wa nean ho odecet adi nene nieanah. Odan wa ho nean ho, 40 asilcai, 40 wi ho wa sadeccai qe wa ode adi nene nieanah. Wa mil iaculdefa asisi fifie alebeanah. Odan mil hegude elcel unug niean ho unug wa oade taceanah. Ode fohien ohis bahin hoagefa, wa odecet adi oade taceanah.

Elcel unug mil kakanecgu eawac niein hoqa almemecian, dana aid hoagecai, eqaf filfil, hoage bot iacul bilein hoqa hoage qei almeinah. Bot qa wa ohis atae obeanah, ode bot uqa elcel unug iacul niein hoage wa le almebilac hocon esuladean hoage meu bileinah.

Wa nene niean ho hedeanafa, bot hoqa wa ohis atae tatawean nuean lagel 5 oanah. Odan sain hogu, wa sananme side noanah. Odeafa, bot uqa fohien hoil taitac bileanah. Odan hoqa, mil unug qa wa odecet adi otace nieanah. Odean ehele lagel iet hedeanafa, fohien gatina ho amasacme nuadeinah.

Ehele 40 del hedeanafa, Noa uqa wa side hedeanahaf ec ho uqa feian hocon, uqa hai hoil weni alog ecia houqa suldeanah. Alog uqa mil kakanec feigaeafa uqa halupapawe nunue fafaheceanah. Odan hoqa, uqa mil kakanec hoil qei feanah.

Ho hedeanafa, Noa uqa hai hoil ufudid ecia houqa suldeanah. Odan hoqa, uqafa mil kakanec hoil qei qeledeanah. Ode hocon, uqa ehele Noacai faheanah. Odan ufu osahi nueanafa, Noa uqa ehele ufudid suldean nueanah. Odan ufudid uqa, uqa na weni oliw ecia houqa leben hoil olohugu ocuteafa faheanah! Odan wa qa side nonoan, oi qa qage beinah.

Odan Noa uqa wa humude bilean ufu hoil ehele oanafa, uqa ufudid suldean nue ietdeanah. Odan sain hogu, ufudid uqa ul mude bileian aben fean hocon uqa ehele qei faheanah. Wa qa wele side noanah!

Odan lagel elis hedeanafa, Ifan uqa Noa maudeanah, “Inacai, ina aiden himenalcai, eqaf unug hoagecai, age qil bot culudeic alesocie. Ina wawin gude ho fulusdeic matibahin alesocial, odeic milgu unug ihoc wa nieal." Hocon, uqa hemeculcai uqadeucai hoage bot iaculde alesoinah.

Sain Noa uqa bot iaculde alesoafa, uqa Ifan ihandecun lai hug mengu ohalec (alta) mudeafa, uqa eqaf hondeggu ihanec mudecun ho ois ec niea hogude leih oadeafa, uqa Ifan ihandec uteanah. Ifan uqa ihandec houqacan uqa wacu meu nienafa, uqa Noa himeculcai eldec adeanah.

Ifan uqa madeanah, “Dana aid hoage elcel meuqe odenigan houqacan ho, isa haun ehele qei mil geldeminac, odidi dana aid hoage mel alcal gudecet hoage qisolmec ahulec bilenigan hofa, isa haun ehele qei odemin wa alec hoil mil he unug qe ifuliful dewan. Isa le he madi qel qetica."

Odeafa, Ifan uqa wal hahawan bahin mudean houqa ho, uqau le made qel qetean houqacan dado houqa meanah. Sain unug wal hau ohis aleso niefe, Ifan uqa le made qel qetec houqacan dahu soian, odedeb, odecet adi dana aid uqadeu hoagefa dahia soian.

Ifan uqacan totqec louqec heqa: Gugqec 6 - 8 hogude.