Pitacai Ion Hoale Niqaniq Hoil Meu Mudehia

Del hoil, Pitacai Ion hoale Gun Logu nuehianah. Sain hoale Gun Lo iacul wacun aba ben hogu wawahi qa, hoale dana hoil uqa faci meuqe mean hocon obewahu qe houqa men acicin niniqe bibilean fehianah.

Pita uqa dana faci meuqecen uqa obecun ihoqe houqa mecidulele maudeanah, “Isa men aci qa isecun qitigu." Odeqeit, elaci isa eia houqa ina iseigan. Iesus uqau gagadi odecgu maisica ina aie obecec!”

Qei giec hocotgu bahin , Ifan uqa dana faci meuqecen obecun ihoqe houqa meu mudean, dana houqa hananme ocobe, uqa bisole wa bisole so e ocobe uqa Ifan weni ohisdec ho odeanah. Dana aid hoage Gun Logu aben gaul niec hogu niein hoage qa, hoage dolonacudean ona atage neanah.

Dana aid am ben bahin hoage haciou bahin, hoage dana meu mulec oancai houqa fecunceic fahadeinah. Odan Pita uqa hoage madadeanah, “Age elacicin dana heuqa meu mulec oal hocon, age dolonacudean ona atage nea? Dana he ile dodo ileu gagadi odeccai ileu meu bahin hogu qei meu mulec oah. Hoqeit, heqa ho Iesus uqau gagadi odec houqacai, odan, uqa ihoc odeb alesoian ec wawige cefec igeu ho Iesus uqa igeacai, houqa ho dana heuqa meu mudec uteah.”

“Ois agecet adi ho age Iesus qebil almeian ec ho, age dana Rom gabman uqau hatu ho ilo bile ofdeacai houqa maudeinah. Age dana eawac bilec igeacai houqa qecian almeanah, odan hoqa, Ifan uqa almec gude tulidean uqa aieanah. Gugufu, age etacub ho odein ho age houqau gug ho qei dodoic ho odeinah. Odan hoqa, Ifan uqa age kobol ho mudeinahgu ho, uqa Mesaia qa esi dain ben efefe almeian ec le ahun madec nieadecia houqa ihoc mudeanah. Hocon qil, age ahuldeunah eic wawa falideic Ifancai socie, odeb ageu silail ho wahio qeimude adeian.”

Gun Lo uqau hanuqec ilo dana hoage, le Pitacai Ion hoale mamade odehian houqacan hoage wawa meu qei nieanah. Hocon hoage hoale falaleciafa kalabusgu mealeinah. Odan hoqa, dana aid matibahin hoage qa Pita le madean houqa ho gugufu ec dociafa, hoage wawa cefeinah. Odan dana hoage Iesusun wawa cefein hoqa, hoage haniwadec gadac ho benme teafa 5,000 ode oanah.

Odan del etenan hogu, Iuda hoageu hanuqec ilo dana hoage Pitacai Ion mehaleic, hoage ihanec ilo dana ben houqacai, Iuda hoageu ufu fec hanuqec ilo dana odacat hoageugu mehale wainah. Odan hoage Pitacai Ion ocolialeinah, “Ale el gagadi odec hagu, ale dana faci meuqecen obewahuqe he meu mudehia?”

Odan Pita uqa hoage madadeanah, “Iesus uqa ho Mesaia, odan uqau gagadi odec houqa ho dana he age amagu tawea heuqa meu mudeanah. Age Iesus na babalecgu qecian almeanah, odan hoqa, Ifan uqa Iesus almec gude tulidean ehelawe aie eawac bilea! Age uqa gegehildeinah, oda hoqa, age esuladec besadec o meadec ocun ho hi hoilcai qitigi, Iesus uqau gagadi odecgu houqa adi ho hi niea!”

Odan hanuqec ilo dana hoage, Pitacai Ion hoale cumuniec qitigi tatawehi hoale le madehian hocon, hoage tigaleciafa uluna ulean le qitigi bileinah, elacin, hoage fein ho, dana elis hoale ho masalde dana adi, ode hoale iwaldec doc ben hoil qei ohianahcai ho feinah. Odeciafa qa, hoage dana elis hoale ho Iesuscai bilehianah ec ho isdeic doinah. Hoage Pitacai Ion hoale cumuniec le madale hedeciafa, hoale felacalecian aleso nuehianah.

Ifan uqacan louqec totqec heqa: Aposel 3:1 - 4:22 hogude