Ifan Uqau Le Ahun Made Dana
Israelde dana aid, Iudade dana aid bilecian bean sain hogu ho, Ifan uqa le ahun madec dana uqadeu hondeg matibahin hoageugu suladeanah. Le ahun madec dana hoage Ifan uqau le dahmeciafa, hoage nueic Ifan uqau le houqa dana aid madadeinah.
Odan sain Ahab uqa Israel hatu ho uqau king bileanahgu, Ilaia uqa Ifan uqau le ahun madec dana bileanah. Odan Ahab uqa hodana meuqe, uqa dana aid wawa oan hoage ulec manecet Bal ecia houqa binainig mudeinah. Ilaia uqa Ahab maudeanah, "Israel uqau hatugu esi wa hoil qei newan, o, oi hofa hoil qei newan, nueb isa ois ec mademinafa." Houqa odean Ahab uqa gemag asisi beanah.
Ahab uqa Ilaia qeb almeian odeanah hocon, ode hocon Ifan uqa Ilaia uqa wadau mil igis adi kakanec hogu nueafa, uqa hogu wa nacag hoil niea hogu, Ahab uqa fewan hocon uqa lokumeian maudeanah. Odan gaid ode eteu lehiwcai, hai hoage bretcai, eqaf ufun ofaheic Ilaia uteinah. Ahab uqa fan adec dana uqadeucai hoage Ilaia megeic obeinah, odan hoqa, hoage uqa qei feleb. Awau gagadi bahin niniean nuean, wa nacag ho wele sideanah.
Hocon Ilaia uqa hatu hoil utuqanu bilea hogu nueanah. Hatu hogu aid wi hoil uqa melahcai hoale bilehianah. Hoaleu eli lec houqa wele qitigi meian odeanah, elacin, wa qei nean houqa odean ahel soanah. Odan hoqa, hoale Ilaia mecide ofdedehian bileinah. Ode hocon, Ifan uqa hoageu eli le ho fe saiade adean hocon, hoageu flaua awalgu bilean houqacai, hoageu oil gunifcai ho qei gunuc me nohianah. Hoage ahel sain hogu hoage elicai bileinah. Ilaia uqa hogu iar nag maticai bileanah.
Sain iar iet odan lagel 6 hedeanafa, Ifan uqa wa ohisde ehele suldeb neian hocon, uqa Ilaia uqa ehele Israel uqau hatugu nueafa, uqa Ahab maudeian hocon maudeanah. Odan sain Ahab uqa Ilaia feafa uqa madeanah, "A ha, ina louqesmec dana!" Ilaia uqa walde maudeanah, "Ina qa louqesmec dana! Ina Iawe Uqa Gugufu Ifan ho uculudec, ina Bal binainig mudenah. Ina Israel uqau hatu gude dana aid unug mehaden, age fohien weni Kamel hogu nuecie!"
Israel uqau hatu gude dana aid unug bahin, odan 450 manecet Bal uqau le ahun madec dana hoagecai, hoage ilam gabandeic hoage Kamel fohien hogu faheinah. Ilaia uqa dana aid madadeanah, "Age adecen isdec ageu ho gaid falifuludeacai? Iawe uqa Ifan mefe, uqa ewel outecie! Bal uqa Ifan mefe ho, age uqa ewel outece!"
Ode Ilaia uqa Bal uqau le ahun madec dana hoage madadeanah, "Age makau manafal hoil qeciafa, age ihandec mudenigan saiadecie, odeqeit, age lai qa ub fudebilac. Isafa odecet adi odeigan. El Ifan uqa lai suldeian houqa ho, uqa adi ho uqa gugufu Ifan." Ode hocon, Bal uqau ihanec dana hoage ihandenigan saiadeinah, odean hoqa, hoage lai qa qei amacudeinah.
Odean Bal uqau ihanec dana hoage Bal inonduduleic madeinah, "Bal ina ige dahmigece!" Ben asil ho hoage utae inondedeic, hoage dodo dewena basingu agoinah. Odan hoqa, ho odein houqacan elaci hoil qei alesoanah.
Odan am noanahgu qa, Ilaia uqa Ifan ihandec uteian saiadeanah. Ode uqa dana aid hoage wa gunif benben 12 ho oade soic, ihande mudenigan elcel saiadec niean houqa taitac hoage wa esawebilafa, eqaf cufuncai, laicai, mil ihandec mudec lai hug mengu ohalec (alta) taweanahgu hofa qahumebcaiteian hocon madadeanah.
Odeafa Ilaia uqa inondeanah, "O Iawe, ina Abraham, Aisak, odan Iakob, ina hoageu Ifan, ode qil ina Israel ageu Ifan bileca, odan isa inau abi dana bilica ec ho ifaigece. Madica iwe ina ihoc mudenafa, dana aid heage esi ina ho gugufu Ifan ec ho donigan."
Qeigiec bahin, lai hau ohisde neafa, eqaf cufuncai, laicai, mencai, gegefcai, odan wa ihandec mudec lai hug mengu ohalec (alta) ho alildec niean hofa unug ieadeanah. Sain dana aid hoage ho feciafa, hoage haciou bahin milgu no bileciafa, hoage madeinah, "Iawe uqa Ifan! Iawe uqa Ifan!"
Odean Ilaia uqa madeanah, "Bal uqau ihanec dana hoage hoil ub uladebil cum bisole nueadebilac!" Hocon dana aid hoage Bal uqau ihanec dana ho biliteadeic faladeciafa, hoage oadeic aben ho ulude acanamcai waciafa hoage aqecian almeinah.
Ho hedean, Ilaia uqa King Ahab maudeanah, "Ina qaimqe bahin taun ben hogu nuece, elacin, wa neian odea!" Odan qeigiec bahin, wa neian hocon gagatu meneanah. Odean wa ulumencai hananme neanah. Iawe uqa awau sain ho qei mudeanahgu, uqa ho gugufu Ifan ec ho ifaeanah.
Ilaia uqau sain hedeanafa, Ifan uqa dana hoil weni Elisa ecia houqa le ahun madec dana uqau bileuteian hocon gawuleanah. Ifan uqa Elisa lebengu uqau gagadi odec dado matibahin ifaeanah. Ifan uqa gagadi odec dado hoil ifaean ho uqa Naman uqaugu ifaeanah. Naman uqa ho, uqa hatu hoil Israelcai ad bilein ho uqau fan adec dana hoageu hanuqec dana, odan uqa deweugu ho akan sag meuqecai bileanah. Naman uqa Elisacan dahmeafa, uqa Elisa uqa odeb uqa deweu ho meu alesoian hocon, uqa nue Elisa ocolideanah. Elisa uqa Naman uqa nue Iodan wagu, uqa wa duih no 7 gadac hedeian maudeanah.
Hanuqecgu, Naman uqa gemag bean hocon uqa ho odecun uleanah, elacin, uqa ho elianig hoil qei alesowan ec doanah. Odan hoqa, uqa ho ahuldica ec ho doafa, uqa ehelawe isdec falideafa, uqa Iodan Wa iacul duih no 7 gadac hedeanah. Sain itqecgu uqa hedeian hocon uqa wa iaculde alebeanahgu, uqa deweu unug meu alesoanah! Ifan uqa Naman uqau sag ho qitigi mudeuteanah.
Ifan uqa le ahun madec dana odacat matibahin suladeanah. Le ahun madec dana hoage unug dana aid hoage kadan binainima mudecia ho cuculeic, hoage hananmeic dumana tutucun houqacai, hoage odacat waloloma lec duman hogu obenigan ec ho madadeinah. Ifan uqau le ahun madec dana hoage, dana aid hoage Ifan ou qei totode odedeic, hoage kobol meuqe ho qei ulefeic ho, Ifan uqa esi hoage gehiladeafa, uqa hoage dewa lecai ec feadeafa, uqa esi hoage uloul adeian ec ho madadeinah.
Sain maticai, dana aid hoage Ifan ou qei totodeic odeinah. Hoage sain hoil hoilgu, hoage Ifan uqau le ahun madec dana ho ifuladeinah, odan sain odacat ho, hoage aqadecian almeinah. Sain hoil, Ifan uqau le ahun madec dana weni Ieremaia, uqa wa fel hoil wacai qitigi hogu, uqa bile almeian hocon hoage uqa fale efecian hogu noanah. Uqa waful wa fel ho bisigu niean hogu dadabuen noanah. Odan hoqa, king uqa Ieremaia waloloc leafa, uqa Ieremaia almewan hocon uqa abi dana uqadeu ho madadean, hoage Ieremaia didecian wa fel iaculde alebeanah.
Ifan uqau le ahun madec dana hoage, dana aid hoage meuqe madecian fefeciafa, hoage Ifan uqau le madecun ho qei uleinah. Hoage dana aid hoage qei wawa falidefeic, Ifan uqa esi hoage aqe ifuliful adeian ec ho madadeinah. Odeceic hoage, Ifan uqa Mesaia suldeian le made qel qetean hoqacan hofa, hoage dana aid madadeinah.
Ifan uqacan totqec louqec heqa: 1 King 16 -18; 2 King 5; Ieremaia 38 hogude