Dana Ini Israel Dana Aid Oade Nuenigan

Sain Iosua uqa almeanafa, Israel dana aid hoage Ifan ou qei totodec odeinah, hoage Keinande dana aid unug bahin qei aqe itatac adecian nueinah, odeic hoage Ifan uqau nun le hofa qei totodec odeinah. Israel dana aid hoage hanameic gugufu Ifan Iawe uqa binainig mudecun uculeic qa, hoage Keinan hoageu ulec manecet hoqa binainima mudeinah. Israel dana aid hoage Kingcai qe bileinah, ode hocon, hoage unug bahin elaci haqa hoage doin ho meu bahin ein ho, hoage mudec adi mudeinah.

Israel dana aid hoage odecet adi Ifan ou qei totodec odecianfe, uqa hoage ulouladeian hocon, uqa hoageu ad fialacil ho uladean soic hoage aqe itatac adeinah. Ad fialacil hoage Israel hoageu elcel matibahin feleu oadedeic, ehewana hofa qe ifulafalde adedeic, hoage Israelde matibahin aqecian almeinah. Israel dana aid hoage Ifan ou qei totode odedecian, ad fialacil hoage soic hoage meuqe mumudadecian bilecian iar matibahin nueanafa, Israel dana aid hoage wawa falideciafa, hoage Ifan uqa esulade ad dana lebena gude oade meadeian hocon hoage Ifan ocolideinah.

Odean Ifan uqa, in uqa hoage esulade uqa hoageu ad fialacil lebena gude oade meadeb, hoage mil bilecia hogu ho wawa malolgu bilenigan houqa o soian hocon uqa dana houqa saiade adeanah. Odan hoqa, dana aid hoage Ifanun dahia ecelean, hoage haun ehele hananmeic ulec kadan houqa binainima mudeinah. Ode hocon, Ifan uqa hoageu ad fialacil dana aid am hoil, hoage utuqana bilecia ho Midian adecia ho, uqa hoage uladean Midian hoage soic hoage aqe meuqe madeinah.

Midian hoage 7 iar iacul ho, hoage Israel ageu eli lec ho alawade oinah. Israel hoage ben bahin umunieinah; Hoage men iacul nieadeciaugu lokumeinah, ode hocon, Midian hoage qei qeleadeinah. Ois hogu qa, Israel hoage Ifan uqa esulade ad lebena gude oadeian hocon, hoage gagadi bahin Ifan maudeinah.

Del hoil, Israelde dana hoil weni Gidion, odan Gidion uqa Midian hoage wit aci uqau ho feleu outebilacan, uqa lokumecgu adi wit aci foudeanah. Iawe uqau engel houqa Gidioncai soafa madeanah, “Fan dana gagadi ahulec, Ifan uqa inacai bilea. Nuec Israel hoage, Midian hoage meuqe meadecia ho gude oade meadece.”

Gidion memeg uqa lai hug mengu ohalec (alta) hoil mudean hogu, uqa ulec kadan hoil ihandec mude uteanah. Ifan uqa, Gidion uqa lai hug mengu ohalec (alta) ho alocie golodeian hocon maudeanah. Odan hoqa, Gidion uqa dana aid hoagecen uqa cumunieanah, ode hocon uqa humudean nue wi gagatu soanah. Odean hogu, uqa ihanec mudec lai hug mengu ohalec (alta) ho qe alocie ifulafaldeanah. Odede uqa ihanec mudec lai hug mengu ohalec (alta) qildec hoil Ifan uqauan, uqa kadan houqau ihanec mudec lai hug mengu ohalec (alta) taweanahgu utuqanu hogu mudeafa, uqa houqa taitac Ifan ihandec uteanah.

Odean ohagean eteu, dana aid hoage dana hoil uqa ihanec mudec lai hug mengu ohalec (alta) ho qe alocie ifulafadean ho feciafa, hoage gemana asisi bahin beanah. Hoage Gidion qebil almeian hocon hoage uqau logu wainah. Odan hoqa, Gidion memeg uqa madeanah, “Age elacicin ageu manecet ho esuldenigan odecia? Uqa gugufu manecet mefe, uludebil uqa, uqa dodocon waubdeafa bileian!” Uqa le houqa madeanfe, dana aid hoage qei Gidion qecian almeanah.

Odean Midian hoage Israel hoageu elcel feleu oadenigan hocon, hoage haun ehele faheinah. Hoage matibahin hocon hoage haniwade siewahuqe. Gidion uqa hoagecai adenigan hocon, uqa Israel hoage madadean hoage eguleic gabandeinah. Gidion uqa Ifan uqa dado mudec elis ifadeian hocon ocolideanah. Odeb uqa esi hogu doian, Ifan uqa esi uqacai bileafa uqa Israel hoage esulade, uqa Midian lebena gude oadeian ec ho doian.

Dado hanuqec houqa, Gidion uqa sipsip ganac hoil milgu meme, uqa eteu wa oi nea houqa sipsip ganacgu sisip bagic houqa adi qahu memeb, milgu qa ub qahu mewan ec ho uqa Ifan ocolideanah. Odan Ifan uqa ode odeanah. Odean etenan wi qa, uqa mil qa qahume ninieb, sipsip ganac qa kololec nieian ec ho uqa Ifan ocolideanah. Odean Ifan uqa hofa odecet odeanah. Dado elis heale Gidion odehian uqa doanah, Ifan uqa esi uqacai bileafa, uqa Israel esulade Midian lebena gude besade o meadeian ec doanah.

Odan 32,000 Israelde fan adec dana hoage Gidioncai soinah, odan hoqa, Ifan uqa dana hoage ho gehcai bahin ec ho uqa Gidion maudeanah. Hocon Gidion uqa 22,000 fan ade dana hoage adecun cumunien ho, uqa suladean logu nueadeinah. Odan Ifan uqa fan adec dana oia gehcai bahin odecet uqacai bilecia ec ho Gidion maudeanah. Odeanfe, Gidion uqa unug suladean hoage logu nunueadecian, 300 fan adec dana hoage adi qa bileinah.

Wi hogu, Ifan uqa Gidion maudeanah, "Ina Midian hoage aben ociahan nieciaugu hogu nogafa, sain ina hoage el le madenigan ho dahmadecafa, hogu ina cumunieca ho esi qeimeian." Ode hocon, wi hogu, Gidion uqa Midian hoage aben ociafa nieinahgu hogu noafa, uqa Midiande fan adec dana hoil uqa bebelean houqacan, uqa mel fiac hoil mamaudean dahmaleanah. Odan fan adec dana ho uqa fiac houqa madeanah, "Bebelec he uqau gug ho, Gidion uqau fan adec dana hoage esi Midiande fan adec dana aqebil almenigan." Sain Gidion uqa le houqa dahmeafa, uqa Ifan binainig mudeanah.

Odeafa Gidion uqa ehelawe fan adec dana uqadeucai faheafa, uqa hoage osahi osahi taul fudenigancai, awalcai, odan enal ieccai, uqa ho adeanah. Midiande fan adec dana hoage aben ociafa niein hogu hoage huniniecian, Israelde fan adec dana hoage utum adenigan aliladeinah. Gidion uqau 300 fan adec dana hoage, enal ieccai hoageu ho, hoage awal iacul tacadein hocon Midiande hoage enal iec ho qei feinah.

Odean Gidion uqau fan adec dana hoage sain osahigu adi, hoage awal hoageu ho qagadedecian, qeigiec bahin enal uqau iegowec houqa amasac meinah. Hoage taul hoageu ho fuadedeic utaeinah, " Ige Iawecai Gidionun adeqa!"

Odan Ifan uqa odean, Midiande hoage daliadeic hoage nanan, hoage hoil utumdean utumdean eic, age dodo qean qean eic almeadeinah. Odan sain hocotgu adi, Israelde hoage Israelde leih logu nieadein ho unug faheic hoage esuladebil, hoage Midian labadebil cum nueadenigan hocon le sulde adeinah. Ode hoage matibahin aqadecian almemecian, leih uladein hoqa hoage labadecian, Israel uqau mil ho uludeic nueadeinah. Del hogu, 120,000 Midian hoage almeinah. Ifan uqa Israel esulade ad lebena gude oadeanah.

Dana aid hoage Gidion uqa hoageu king bileadeian galeadeanah. Gidion uqa hoage ho odecun ho uqa qei ois adeanah.Odan hoqa, uqa hoage osahi osahi gol ring Midian hoageu gude oadein houqa, hoage oade soic uqa utenigan hocon ocoliadeanah. Dana aid hoage gol am ben bahin ho Gidion uteinah.

Odean Gidion uqa gol hoqagu, uqa loto ecelag dewenagu lahociacai hondeg ho mudean alesoan ho fil bahin, odan houqa ho, ihanec dana hoageu ilo dana, uqa taqohan iwe hondeg ho mudeanah. Odan hoqa, dana aid hoage hananmeic etacub houqa, ulec Kadan iwe ode binainig uteinah. Hocon Ifan uqa Israel hoage haun ehele qan bi fenigan hocon uqa ulumen adeanah, elacin, hoage ulec kadan binainima adeinah. Ifan uqa Israel hoageu ad fialacil ho uladean soic hoage aqeinah. Odean hogu, hoage haun ehele Ifan uqa hoage esuladeian hocon ocolideinah. Odan Ifan uqa dana hoil uqa hoage esulade oadeian hocon suldeadeanah.

Etacub ede ho gaid ode alesoanah: Israel dana aid hoage esi silail mudebilafa, Ifan uqa esi hoage qan bi fenigan hocon, uqa ulumen hoil adebafa, hoage esi wawa falidebilafa, Ifan uqa, esi in hoil hoage esulade oadeian houqa suldeadeian. Iar matibahin, Ifan uqa in uqa Israel esulade ad fialacil lebena gude oade meadeian ho, uqa matibahin suldecadeanah.

Sain matibahin, hoageu ad fialacil ho odebahinag utumcadecianfe, dana aid hoage hatu odacat hoage king hoageucai bileinah iwe, hoagefa odecet adi kingcai bilenigan galeadean Ifan ocolideinah. Hoage in uqa king bileadeian ho, uqa dana docancai, odeb uqa ihoc gagadi taweafa, uqa hoage hanuqe adeb fan adegu wanigan hocon, hoage dana odahacan galeadeanah. Ifan uqa hoageu ocoliec edahacan ho, uqa qei galedeanah. Odan hoqa, hoage ocoliein hocon bahig, uqa king hoil adeanah.

Ifan uqacan totqec louqec heqa: Gehilec Dana: 1-3; 6-8