Pol Uqa Kristen Alesoa
Saul uqa dana haun, odan uqa ho dana ini Stiwen qecian almeancai hoageu loto ecelag laho obeciacai ho, uqa qafane tawe houqa ofde adeanah. Ode uqa Iesusun qei wacu cefeinahcai hocon uqa ini wawa cefeincai ho utumade meuqe memeade obeanah. Uqa Ierusalem hogu, uqa danacai, aidcai, ilam falede kalabusgu meadeian hocon, uqa lo osahi osahigu unug uqa ciciawe obeanah. Ihanec ilo dana uqa, Saul uqa ois uqa taun ben Damaskus hogu nueafa, uqa Kristen hondeg taun hogude ho faladeafa, uqa mehade ehele Ierusalem faheian ec ho oisduleanah.
Odan Saul uqa Damaskus nueian hocon nunuean, hau ohisde fulacdec ben hoil watalude uqa olilduleanah, odan uqa batage ne milgu nieanah. Saul uqa itacub hoil uqa le ede madean dahmeanah, “Saul! Saul! Ina elacicin isa utumite meuque mimite obeca? Odan Saul uqa ocolieanah, “Ilo dana isau, ina in?” Odan Iesus uqa walde maudeanah, ‘Isa Iesus. Ina isa utumite meuque mimite obeca!"
Odan sain Saul uqa aie tawean ho, uqa amug ho afaqean hocon meciewahuqe. Odan uqa fiacul hoage, uqa gimdeic mehuleic Damaskus wainah. Saul uqa del iet ho uqa eli, o, wa hoil leccaiqe uqa gaul odecet nieanah.
Odan Damaskus hogu, ewel oc dana hoil weni Ananias ecia uqa bileanah. Ifan uqa Ananias maudeanah, “Ina lo Saul niea hogu nuece. Ina leben ho ina uqa deweu taitac megan, odeb, uqa esi haun ehelawe mecieian.” Odan hoqa, Ananias uqa madeanah, “Ilo dana isau, isa dana heqa wawa cefec hondeg adegucisai uqa hoage utumade meuque memeade obean houqacan ho isa duga.” Odan Ifan uqa le wadacde maudeanah, “Nuece! Isa uqa Iuda sihul gudecai, dana aid am filfil hoil gudecai, uqa hoageugu uqa isa wenimi houqa madadeian hocon gawicah. Uqa esi isa wenimicin bahin elcel matibahingu dain efeian.”
Hocon Ananias uqa Saulcai nueafa, uqa leben Saul deweu taitacmeme uqa madeanah, “Iesus uqa ina hegu fahegan fafahecan uqa inacai amasac alesoal ho, uqa isa inacai sulitean isa inacai fahicah, odeb haciou ina haun ehelawe meciegan, odeb Kis Gun uqau gagadi odec hoqa inacai bileian.” Odan qei giec bahin Saul uqa ehelawe mecieanah, odan Ananias uqa Saul wa loudec uteanah. Odean Saul uqa eli leih leanafa, uqa huen ho haun ehelawe soanah.
Odean, Saul uqa sain qei cusdeanah, uqa hananme Iuda hondeg Damaskus bilein hoage meu le madadede madeanah, “Iesus uqa ho Ifan Melah!” Odan Iuda hoage dana houqa uqa ini wawa cefein hondeg ho uqa hoage aqadeb qeimenigan hocon odeancai ho, uqa qil uqafa ho Iesusun wacu cefean hocon hoage ona atage neanah. Saul uqa Iesus uqa Mesaia ec ho gatiti bahin houqacan uqa Iuda madadeanah.
Odan del matibahin nueanafa, Iuda hoage Saul qebil almeian hocon hoage le ilameinah. Hoage dana leih suladecian, hoage uqa qebil almeian hocon hoage nueic, hoage taun ben houqa aba wacgu mecieic taweinah. Odan hoqa, Saul uqa hoageu le ilamec houqacan dahmeanah odan hocon uqau fiacul hoage uqa esuldulecian, uqa lokume mehelade cum bisole nueanah. Sain hoil qa wi hoage uqa gamgu ho bibilean, taun ben houqa waubdec gelgel cefec niea houqa tefade, hoage uqa o muleic fafalecian no nueanah. Sain Saul uqa Damaskus hogude mehelade cum bisole nueafa uqa houqacan qei uleanah, uqa odecet adi ode Iesusun le ho sae obeanah.
Ode Saul uqa Iesus uqau ewel oc dana hoage feadeian hocon uqa Ierusalem nueanah. Odan hoqa, hoage uqacan cumunieinah. Odean dana hoil uqa wacu cefeccai uqa weni Banabas, uqa Saul mehule aposel hoagecai nueafa, uqa Saul uqa adegu Damaskus hogu cumuniec qitigi uqa le saean houqacan uqa hoage madadeanah. Ho odeanafa ewel oc dana hoage hogu ois eic Saul oinah.
Wawa cefec hondeg Ierusalem hogu utumade meuqe meadec ho niean, hogu hoage bisolade nueadein ho, leih qa acanamcai nueic taun ben Antiok hogu alewainah. Odeic hoage Iesusun le houqa saeinah. Antiokde dana aid hoage matibahin ho Iudade qe, odan hoqa, sain hoqa ho hahawan bahin hoageu gude maticai bahin hoagefa wawa cefeinah. Banabascai Saul hoale wawa cefec qilde heage Iesusun le matibahin iwaladedehi hoale tamanec wawa cefec hoage isdec gagadi mudeadehian hocon hogu nuehianah. Antiok hogu ho ini Iesusun wawa cefec bilein hoagecen ho, “Kristen” ec madec houqa, hahawan bahin hogu asac hananmeic madeinah.
Ois del hoil, sain Antiokde Kristen hoage ud bibileic inondedecian, Kis Gun uqa hoage madadeanah, “Banabascai Saul hoale, isa abi hoale odehian houqacan isa oalin ho odeihian hocon, age hoale oaleic umuti fil mealecie.” Hocon Antiokde wawa cefec tamanec houqa Banabascai Saul inonaleleic, hoage lebena hoale taitanalai meinah. Odeciafa, hoage hoale masa odacat matibahin hogu, hoale Iesusun meu le houqa saehian hocon sulalecian hoale nuehianah. Banabascai Saul hoale dana aid am filfil gude hoage iwaladehian, dana aid matibahin hoage Iesusun wawa cefeinah.
Ifan uqacan totqec louqec heqa: Aposel 8:3; 9:1-31; 11:19-26; 13:1-3 hogude