Ifan Uqa Israelcai Le Made Gagadi Mude Qel Qetea

Ifan uqa Israelde dana aid mehadean, hoage macas logcai ho gemacu nue alewaciafa, uqa hanuqe mehadean wadau mil igis adi kakanec niea ho gemacu nue, hoage fohien hoil weni Sinai ecia hogu teinah. Fohien houqacatgu adi, Moses uqa gehugu lai iciean feanahcai. Dana aid hoage fohien facigu hoageu lo talabes cefadeinah.

Ifan uqa Mosescai Israelde dana aid madadeanah, “Age Isau le madec ho totodec, isau le qel qete gagadi mudec ho falefeic ho, isa age oademin, age isa mugumi isau etacub bilenigan, odeb, isa ageu king bileadedemin, age qa ihandec dana bilenigan, odeb hatu houqa ho gun."

Del iet hedeanafa, sain dana aid hoage Ifan udunig bile saiade hedecianafa, fefelaean, qeli qeqean, ahu alesosoan, odan, taul udahu ben bahin sosoan, Ifan uqa Sinai Fohien efeugu hogu neanah. Moses uqa adi fohien hogu teian oisduleanah.

Odean Ifan uqa le made qel qete gagadi mudede madeanah, “Isa Iawe, Isa ageu Ifan. Isa age Isip hogu, age begabeg abi dana aid bilein hogude besadi oade meadinah. Age ulec manecet odacat ho ub binainima mudebilac.”

“Age ub kadan mudadeciafa binainima mudebilac, elacin, isa Iawe, isa ho felcadec Ifan. Age isa wenimi ho ub ifuliful madebilac. Ufu bilec del houqa gun bileian hoqacan docusadecial. Le hoqa edegucisai, ageu abi unug ho del osahi gude nueb, del kesinub (6) ho iacul ho abi odecial, elacin, del besip (7) houqa ho, del age huena mude bibileic isacan isde dodoic bilenigan.”

"Age memacilcai aniacil ho meumeu meadeciale. Ub dana beu qagebil almewan. Dana uqa aidec bibileb, o, aid uqa gemug bibileb, uqa ub wal kobol mudewan. Ub feleu mebilac. Ub ulec le madebilac. Ub dana hoil utuqanin bilehiacai houqa aidec, o, lo uqau, o, elaci hoil uqa muguc ho ocun wawa aiewan."

Odeafa, Ifan uqa men batac elis hogu, uqa Nun Le 10 houqa louqadeafa uqa Moses uteanah. Ifan uqa nun le odacatcai nun leih hoage ho houqa totodedec bilenigan hofa adeanah. Dana aid hoage nun le heage totodec odebilfe, Ifan uqa esi eldec adede, uqa hoage meu bilenigan ofadeian ec le made qel qeteanah. Hoage ho qei totodec odebilfe, Ifan uqa esi hoage ulouldec adeian.

Ifan uqa Israel hoage talabes hoil efenigan ec galedean houqacan ho, uqa talabes handeg ho, uqa ho unug silide ifacadeanah.Talabes houqa ho, Egule Bile Le Made Docun Talabes ec madeinah, Talabes ho wauqan ho loto benahiac hoil uqa Talabes wauqan gemacu qetean, faman elis nanahai alesohianah. Ihanec ilo dana ben uqa adi qa, uqa ois faman qete agiec hoil loto benahiac houqa labalab niea hogu, faman waian ec niea, elacin, Ifan uqa hogu bileanah.

In hoil uqa Ifan uqau nun le madec ho qei totode odefe ho, uqa Ifan ihandec uteian eqaf hoil ofahe uqa Egule Bile Le Made Doc Talabes houqau abagucisai sibelu hogu, ihandec mudecun lai hug mengu ohalec (alta) tawea hogu o soian. Ihandec dana hoil uqa esi eqaf houqa qeb almebafa, uqa esi ihanec mudec lai hug mengu ohalec (alta) hogu ohis meafa uqa nameb ieian. Ihandec mudenigan eqaf qecian almehan houqa logac ho, dana houqau qisolmec ho lahuldeutetean, uqa Ifan amuggu ho gegehincai qitigi iwe alesoa. Ifan uqa Moses otig Aroncai, Aron uqau sihul sihul alesonigan hoage ho, hoage Ifan uqau ihandec dana bilenigan gawadeanah.

Dana aid hoage unug Ifan uqa nun le adean ho unug totodec odadedeic, hoage Ifan adi binainig mumudeic, hoage uqau dana aid bahin bilenigan ec ho, hoage wawa osahi meinah. Odan hoqa, hoage Ifan ou totode odecun ec le madeic qel qetein ho qei giec, hoage qisolmec meuqe meuqe ho odeinah.

Moses uqa Sinai Fohien efeugu, uqa Ifancai le mamadehian del matibahin nueanah. Dana aid hoage uqa humude nie nieic wele aqe beanah. Hocon hoage gol ho oadeciafa, oade Aron uteteic hoage uqa kadan hoil mudecadeian hocon ocolideinah!

Aron uqa golgu uqa kadan hoil makau nacag ahun mudeanah. Dana aid hoage hananmeic kadan hoqa asisi bahin binainig mumudeic, hoage ihandec uteianah. Ifan uqa hoageu qisolmec houqacan uqa hoagecen gemag asisi beanafa, uqa hoage fadaladep qeimenigan hocon, uqa isdec mudeanah. Odan hoqa, Moses uqa hoagecen meme uqa inondean, Ifan uqa Moses uqau inondec ho dahmeuteafa, uqa hoage qei fadaladeanah.

Sain Moses uqa fohien efeugude neafa, uqa kadan ho feafa uqa gemag asisi bahin bean hocon uqa men elis hogu Ifan uqa Nun Le 10 ho hogu louqadeancai houqa, uqa efe aqalean qage golodehianah.

Ode, Moses uqa kadan ho tudean au ibuldeanafa, uqa au ho pilisade tahuladean wa nieadeinahgu nocianafa, uqa dana aid hoage wa ho efe lenigan bahin madadeanfe, dana aid hoage wa ho efe leinah. Ifan uqa ulumen meuqe hoil suldean dana aid hoage dewagu alesoan, dana aid matibahin hoage almeinah.

Moses uqa Nun Le 10 houqau men batac asacde houqa uqa efe aqalean qagehian hoaleu abengu ho, uqa qilde elis ehele mudaleanah. Odeafa, uqa haun ehele fohien ho tobe teafa, uqa Ifan uqa dana aid hoageu qisolmec houqa agasecadede houqacan ub isdewan ec ho uqa inondeanah. Ifan uqa Moses dahmuleafa, uqa dana aid hoageu qisolmec ho agase adeanah. Moses uqa fohien efeugude uqa men batac qilde elis hogu, uqa Nun Le 10 ho louqadeccai neanah. Odean Ifan uqa Israel dana aid hanuqe mehadean hoage Sinai Fohien ho uludeic, Ifan uqa Mil Abraham Uteian Le Made Qel Qetean houqa totmudeic nueinah.

Ifan uqacan totqec louqec heqa: Ehelawe Oc 19 - 34 hogude