Iesus Uqa Le Totqec Odacat Hofa Iwaladea
Iesus uqa Ifan uqau meu ul houqacan ho, uqa le matibahingu uqa tota qeanah. Odede uqa hoil qa ede madeanah, “Ifan uqau meu ul houqa ho ede, dana hoil uqa mastet aci ho, uqa o nue abi uqaugu cefeian iwe. Age docia mastet aci houqa elcel odacat aci hoage iwe qe, uqa ho aci alanig bahin.”
“Oda hoqa, sain mastet aci houqa ben mea ho, uqa abi gude eli celcel cefec ho unug holimadec uqa ben ahiac, ode hocon hai hoage faheic leben uqadeugu hogu hoage hiwe bilecia.”
Iesus uqa totqec hoil edefa totqeanah, “Ifan uqau meu ul ho, aid hoil uqa bret nameian hocon uqa ist oafa uqa flauacai lawanidean, ist ho unug flauagu nue ihoc wa niea iwe."
“Ois Ifan uqau meu ul ho edegu iwe hofa fecun. Dana hoil uqa etacub hoil elianig uqau ben bahin houqa, uqa abi aben hoilgu lokumean bileanah iwe. Odan dana hoil uqa etacub elianig uqau ben bahin houqa mecide feafa, uqacusin fel oafa felgu leleanah. Dana houqa ben bahin elubae, uqa nue elcel uqadeu ho unugcai suladeafa, uqa men aci hogude oafa uqa abi aben hoqa idatmeanah, odeb abi aben etacub elianig ben bahincai houqa ho uqau abi aben alesouteian.”
“Ois Ifan uqau meu ul ho edeciwefa niea. Houqa ho macas gude bali meunig iwe, odan etacub hoil qei bali meunig ho meuqe mudeanahcai, odan bali meunig houqau gude men aci ho ben bahin ocun niea. Sain macas gude bali meunig idatmeme suldec dana hoil, uqa macas gude bali meunig houqa qeledeafa, uqa elcel uqadeu ho unug suladeafa, uqa men aci hogude oan ho uqa macas gude bali meunig houqa idadmeanah.”
Odeafa Iesus uqa, dana aid leih hoage kobol meu hoage odeciacai houqacan ho, hoage ho ihoc bahin odeqa ec ho dodoic, hoage dana aid odacat qa ecewadeic alucal meciadeciacai hondeg hoagecen ho, uqa le totqec hoil madeanah. Iesus uqa madeanah, “Dana elis hoale Ifan uqau Gun Logu inondehian nuehianah. Hoaleu gude hoil uqa ho, uqa men aci tex gohilec dana, odan hoil houqa uqa cufu fec ilo dana.”
“Cufu fec ilo dana uqa ede inondeanah, ‘Heiteca Ifan, isa qisol mec dana qe, isa ho dana odacat hoage iwe qe. Dana hendeg – isa feleuqan dana, hoage iwe qe, isa dana elcel tutucun ho qei odeciacai hoage iwe qe, isa dana aidenacil bibilecian fefeciafa, hoage aid hoilun obecia hondeg iwe qe, o, isa men aci tex gohilec dana heuqa iwe qe.’”
“‘Fege isa ede odicacai, isa cufu osahi osahi ho unug isa gaid ud bili elisdicacai, odi isa gaid men acicai elcel odacat ugacai hogude ho, isa qatanican am 10 alesoanafa, am osahi ho ina isicacai.’”
“Odan hoqa, men aci (tex) gohilec dana houqa, uqa cufu fec ilo dana houqa ulude wa acanamcai taweanah. Ode uqa hau ohisfa qei meciean teanah. Uqa ucule qa uqa ahuldec ecgu, uqa leben famqeafa, uqa dodo muguc ho qeqe uqa inondeanah, ‘O Ifan, a, ina isa walolomi lege, elacin, isa ho qisol dana.’”
Odeafa Iesus uqa madeanah, “Isa age gugufu madadica, Ifan uqa men aci (tex) gohilec dana uqau inondec houqa dahmeafa, uqa dana ho uqa ho uqa tutu obec dana ec madeanah. Odedeqa uqa cufu fec ilo dana ho uqau inondec ho uqacan ho uqa qei galedeanah. Ifan uqa esi ini hoage muguma qeqeic obecia ho, uqa hoage one milus memeade qa, uqa ini hoage dodocon ho, hoage ihoc qe ec ho dociacai hoage qa, uqa hoage ohisadeb tenigan.”
Ifan uqacan totqec louqec heqa: Metiu 13:31- 33, 44 - 46; Mak 4:30-32; Luk 13:18- 21; 18:9 -14 hogude