Polcai Sailas Hoale Filipai Taun Hogu Bilehia
Sain Saul uqa Rom hatu uqau hatu alcal Rom facalisanig bilein ho iacul obeanahgu ho, uqa Rom wenima "Pol" ec houqa sain hogu uqa haname Rom weni utein houqa madeanah. Del hoil, Pol uqa fiac Sailascai hoale Iesusun le meu bahin houqa, hoale Filipai taun hogu amasac le saehian hocon nuehianah. Hoale taun ben ho sibelu wa ben ho utuqanu hogu aben dana aid hoage inondenigan hocon eguleinahgu hogu nuehianah. Hoale hogu aid hoil weni Lidia decia ho, odan aid houqa ecel idadmeme suldeacai ho qeledehianah. Aid houqa Ifanun wacu niniean uqa Ifan binainig mudeanah.
Ifan uqa Lidia uqa Iesusun le houqacan uqa wacu cefeian hocon, uqa Lidia odean wacu aieanafa, Lidia uqacai ini uqacai bilecia hoage wa loc oinah. Uqa Polcai Sailas hoale uqau logu niehian hocon madaleanah, hocon hoale uqacai ini uqacai bilecia ho, ageu logu ilam nieinah.
Polcai Sailas hoale gaid ode dana aid hoagecai, hoage inondec aben hogu eguleic le madeinah. Del unug sain hoale ocobe hogu nunuehian, begabeg abi aid hoil, uqa siai meuqe hoil wacu noancai houqa hoale totoaleanah. Siai meuqe houqau odecgu, aid houqa dana aid hoageu bilec esicin houqacan ho uqa madadeanah. Ode hocon, aid houqa dana aid hoageu bilec esi ade nieian houqacan madadec abi ho odeanahgu, uqa ini uqau ilo bileutein hoageu men aci ho ben bahin mude adeanah.
Ois Polcai Sailas hoale ocobe nunuehian, begabeg abi aid houqa odecet adi benahiac utae nieanah, “Dana heale ho Ifan ohis bahinag houqau abi dana obehia. Hoale age besade oade meadec onigan hocon madadehia!” Aid houqa sain matibahin uqa ode adi odeanfe, Pol uqa wele gemetandeanah.
Ois nuean, nuean,del hoil, sain begabeg abi aid houqa hananme benahiac utaenahgu, Pol uqa falide aid ho mecidulele, uqa siai meuqe ho aid ho deweugu bilean houqa maudeanah, “Iesus uqau gagadi odec hogu maisica, ina aid ho deweu gude alesogec.” Odan hocotgu bahin, siai meuqe houqa aid ho cuculude aleso nueanah.
Dana ini begabeg abi aid houqau ilo bileutein hoage gemana asisi bahin beanah! Hoage begabeg abi aid houqa, uqa siai meuqe houqacai qe ho, uqa dana aid hoageu bilec esicin ho hoil qei madadewan ec ho wele isdec oinah. Ode hocon dana aid hoage esi ehele qei aid houqau ilo bileutein hoage men aci idatmeadebilac.
Hocon ini begabeg abi aid houqau ilo beleutein hoage Polcai Sailas oaleciafa, hoage ini Rom hatu uqau ilo biladein hoageugu mehaleic wacian, hoage hoale aqaleleic kalabusgu mealeinah.
Hoage Polcai Sailas oaleciafa, kalabus lo hogu aben dana hoil uqa aleso nuecun ihocqe hogu mealeinah, odeic hoale faimalai hofa tofeinah. Odan hofa hoale ho odalein ho fefehiafa, hoale wi tu gemacu ho hoale Ifan weni ohisdec seg ho siladehianah.
Odan qei giec bahin, mim cumunancai gagadi bahinag soanah! Kalabus lo hogu aba wac qetutqec nieadein ho unug bahin batawade nueinah, odan ini kalabusgu bileadein hoage unug sengu hibawoadec bilein ho, sen ho besade batageinah.
Odan kalabus ofadec dana houqa huniean ho aieanah. Odeafa sain uqa kalabus lo ho uqau aba wac qetutqec ho batawadec hoqa feafa, uqa asisi bahin cumunieanah! Uqa isdean ho kalabus hoage wele cum bisoleciah ec ho isdeafa, uqa dodo deweic qe almeian hocon isdec mudeanah. (Uqa doanah, uqa ini kalabusgu bilecia ho ois adeb hoage cum bisoladefeic, ini Rom gabman uqau ilo bilecia hoage esi uqa qebil almeian.) Odan hoqa, Pol uqa dana ho feafa uqa bencai utaeanah, “Ulece! Ina ub dewen dain utenac. Ige unug eia.”
Kalabus ofadec dana houqa deweu unug qelelean uqa Polcai Sailas hoalegu wafa uqa ocolieanah, “Isa qisolmec isadeu hogude besite omite oiganmefe ho, isa elaci haqa odeigan?” Pol walde maudeanah, ”Iesus uqa Ilo Dana, ina Iesusun wawin cefece, oden inacai ini inacai belecai ho, age esi besade oade meadec houqa onigan.” Odean kalabus ofadec dana houqa Polcai Sailas mehale lo uqaugu nueafa, uqa hoale dewenalaigu iomalai nieadein houqa wahioaleanah. Pol uqa dana ini dana houqau logu bilecia ho unugcai, uqa hoage Iesusun meu le houqa sacadeanah.
Kalabus ofadec dana houqacai, ini uqacai bilecia ho unugcai, hoage Iesusun wawa cefecianafa, hoage wa loadec oinah. Odean kalabus ofadec dana houqa, uqa Polcai Sailas hoale lehiw eli lec houqa alean lelehian, hoage unug ilam wawa meu niean elubaeinah.
Odan del etenan hogu, taun ben hogude ilo bileadecia hoage, Polcai Sailas kalabus gude felacaleleic qa, hoage hoale Filipai taun ben ho ulude nuehian bahin madaleinah. Odan Polcai Sailas hoale nue Lidia uqacai, hoale fialacil odacat hoagecai, meciade obe hedehiafa, hoale taun ben houqa ulude nuehianah. Odan Iesus uqacan le meu bahin houqa ode qage pilisade nunuean, wawa cefec tamanec hofa ho maticai ode alade soinah.
Pol uqacai Kristen ilo odacat hoage, taun benben matibahinaggu nueadeic, hoage Iesusun le meu bahin houqa, hoage dana aid sacadedeic hoage iwaladeinah. Hoage wawa cefec tamanec ho niadein hogude, ini wawa cefec bilein hoage gagadi meadeccai, iwaldecgu ho, hoage le matibahin hofa louqeic adeinah. Le ho louqadein hogude ho, leih qa Baibel uqau buk alesoinah.
Ifan uqacan totqec louqec heqa: Aposel 16:11- 40 hogude