Ifan Uqa Abrahamcai Le Made Qel Qetehi Gagadi Mudehia

Wa alec ho hedean, iar matibahin nueanafa, dana aidcai matibahin haun ehele milgu bileinah. Odan hoage unug le osahi adi madeinah. Hoage fulusdeciafa, hoage mil he unug ihoc wa nienigan hocon Ifan uqa madadean ho, hoage ho totodec odecun uculeic qa, hoage hoilgu adi gabande bibileic taun ben hoil mudeinah.

Hoage ben ode muguma qeqeic qa, hoage Ifan le madean houqacan hoage qei doinah. Hoage hananmeic lo hoil tutu adi ohis te hau qutudeian ec hofa cefeinah. Odan Ifan uqa fean ho, hoage odecet adi gabandeic kobol meuqe ho mudefeic ho, hoage ihocun esi qisolmec matibahin ho mudadenigan.

Hocon Ifan uqa hoageu le osahi adi ho, uqa waldean hogude le filfil matibahin aladesoinah. Ode uqa dana aid filigan adean, hoage qatiec mil he unug ihoc wainah. Hoage haname taun ben ho cefein ho, taunhouqa weni Babel, odan weni houqau gug ho “daliec”.

Etacub ho alesoanafa,odan hogude 100 iar matibahin nue hedeanafa, Ifan uqa dana hoil weni Abram ecia houqa le maudeanah, "Inau hatucai, inau sihul hondeg ho cuculadec, isa ina mil ifaiseigan hogu nuece. Isa esi eldec iseigan, odidi isa odemin, inau gude sihul ho esi hatu ben bahin wenicai alesoian. Isa odemin, ina wenimincai, inau sihul ho wenima ho esi ben bahin alesoian. Ini ina eldec isenigan ho, isa esi hoage eldec adeigan, odeb, ini geldec isenigan ho, isa esi hoage geldec adeigan. Inaugu adicin qa, mil he unug gude sihul unug ho eldec onigan."

Hocon, Abram uqa Ifan ou totodec odeanah. Uqa aidec Sarai mehuleancaitean, uqa abi dana uqadeucai, elcel uqadeu ho unugcai, uqa ho oadeancaitean, uqa Ifan mil ifadeanahgu hogu nueanah. Uqa mil weni Keinan ecia hogu nueanah.

Sain Abram uqa nue uqa Keinan hatugu alewanafa, Ifan uqa madeanah, “Walwaldedec he unug mecidece. Isa esi inacai, ina wawin gude sihul sihul bilenigan hoagecai, ina mil he fega he unugcai ho isa esi inacai hoage muguma onigan age adeigan.” Odean Abram uqacai, ini uqacai nuein hoagecai, uqa mil hogu bileanah.

Odan del hoil, Abram uqa Ifan Ohis Bahinag houqau inhandec dana Melkisedek decia ho qeledeanah. Melkisedek uqa Abram eldec utete madeanah, “Ifan Ohis Bahinag, uqa haucai mil he unug memeg bilea, houqa Abram eldec uteale.” Odean Abram uqa elcel uqau unug hogude ho uqa qatanean am 10 alesoanafa, hogude am osahi oafa uqa Melkisedek uteanah.

Odean iar matibahin nueanah. Odan hoqa, Abram uqa Saraicai hoale dana melcai qitigi odecet adi bilehianah. Odan Ifan uqa, Abram uqa esi dana melcai bileafa uqau sihul sihul ho esi habie, hau ohis sulupai niea iwe nieian ec ho, uqa ehele Abram le made qel qeteanah. Odan Abram uqa Ifan uqau le made qel qetec houqacan ho uqa wacu cefean hocon, Ifan uqa Abram uqa tutu obec dana ec ho uqa made amasacdeanah.

Odean Ifan uqa Abramcai, hoale le madehi qel qete gagadi mudehianah. Le made qel qete gagadi mudec houqa ho, dana elis, o, dana am elis gemacu, hoage wawa osahi meciacai. Ifan madeanah, “Isa esi ina inau gudecet isa dana mel hoil iseigan. Isa Keinan mil ho inau sihul sihul ho adica.” Odan hoqa, Abram uqa dana melcai qitigi uqa odecet adi bileanah.

Ifan uqacan totqec louqec heqa: Gugqec 11 - 15 hogude.