Iesus Uqa Dana Hoil Siai Meuqecai Ho Meu Mumude, Uqa Aid Hoil Sagcai Hofa Meu Mudea
Del hoil, Iesus uqa ewel oc dana uqadeu hoagecai, hoage hatu Geresa dana aid bilecia hogu nuenigan hocon hoage botgu tobe teciafa, hoage wa qalide houqa qeteic nahaicisai wainah.
Sain hoage wa qalidec houqa nahaicisai nue alewacianafa, dana hoil uqa siai meuqe deweu tecian bileancai houqa, uqa guculecgu adi uqa Iesuscai soanah.
Dana houqa, uqa hihibanig ahulec, ode hocon in hoil uqa dana houqa fale one mumude ahacdeb, uqa ehna bilewahu qe. Dana aid hoage dana houqa sengufa lebencai faci ho hibawociahancai, odahan hoqa, uqa gaid ode sen ho agoadehan.
Dana houqa aben dana leladec felana nieadecia ho gemacu uqa nieanah. Dana houqa gaid ode asilcai wi ho uqa isogoe euwewe nieanah. Uqa loto elcel hoil qei taqoanah, ode uqa gaid gaid ode uqa men nieadecia hogu uqa deweu acago adi nieanah.
Odean sain dana houqa Iesuscai soafa, uqa haciou bahin Iesus amesacgucisai, uqa milgu no gatelac cefe bileanah. Odan Iesus uqa siai meuqe ho maudeanah, “Dana ho deweu iaculde alesogec!”
Odan dana siai meuqecai houqa lelec ohisgu utaeanah, “Iesus, ina Ifan Ben Gagadi odec ahulec houqa melah, ina isacai elaci ogan? A ina ub isa deweni dain utenac!” Odean, Iesus uqa siai meuqe houqa ocolideanah, “Ina wenimin in?” Odan dana houqa uqa walde maudeanah, “Isa wenimi ho Legion, elacin, ige ho matibahin bileqa.” ("Legion " ec ho, Rom hoageu fan adec dana hogude tausen ganicif hoage am osahi osahi mudeciacai houqa "Legion" ec madecia.)
Ode siai meuqe hoage Iesus ninicdeinah, “A ina ige hatu hegude ub suligen aleso nuemunac!” Odan aben hogu ho fo am hoil, hoage lolocis utuqanu hogu hoage eli leleic nieinah, hocon siai meuqe hoage Iesus ninicdeinah, “A odeqeit, ina ige suligen, ige fo wawagu nocun!” Odan Iesus madeanah, “Nueciec!”
Odan siai meuqe hoage dana deweu gude alesociafa, hoage fo wawagu noinah. Fo hoage wa oc tutu qafulec tawean hogu hoage guculecgu adi nonociafa, hoage wa qalidec hogu wa iacul no wa le almeinah. Fo am houqa ho 2,000 fo ode.
Sain fo ofadec dana aid hoage etacub ho alesoan ho feciafa, hoage gucule taun ho iacul nueciafa, hoage Iesus uqa hoageugu ade odean fein houqacan hoage dana aid unug madadeinah. Odan dana aid taun hogude hoage faheciafa, hoage dana siai meuqe hoage deweu tecian bileahan ho uqa ehna kiliedaeafa, uqa loto elcel taqoafa, uqa dana deweu meu adi bileanah iwe bibilean feinah.
Dana aid hogude hoage hoqa feciafa, hoage asisi bahin cumunieciafa, hoage Iesus uqa hogude cucule nueian maudeinah. Hocon Iesus uqa botgu teafa, uqa nueian hocon saiadeanah. Odan dana siai meuqe deweu tecian bileancai houqa, uqa Iesus totodeb obehian hocon uqa Iesus ninicdeanah.
Odan hoqa, Iesus uqa dana ho maudeanah, “Qec, isau galeitec hoqa ina logu nuecafa, ina Ifan uqa inacan elcel unug ade mudeal houqacai, ode uqa inacan adaha bahin wacu qeal houqacan ho ina fianal hoagecai, inau sihul hoage madadegan isdica.”
Odeanfe dana houqa nueafa, uqa Iesus uqa uqacan ade mudulean houqacan ho uqa dana aid unug hoage madadeanah. Odean dana aid unug ini hoage uqau totqec houqa dahmein ho, hoage isdec qeqean, ona atage nean dahme bileinah.
Ode Iesus uqa haun ehelawe, uqa wa qalidec ho nahaicisai wanah. Sain uqa nue alewanafa, dana aid am ben bahin hoage eguleic uqa alildeinah, odeic hoage tufulifuldedeic hoage uqa duculdeinah. Odan aid hoil uqa 12 iar uqa logac nenean ulumen ben efe bilean houqa, uqa dana aid am ho gemacu obeanah. Aid houqa dokta hoage meu mitenigan eafa, uqa men aci uqau ho unug bahin uqa dokta idat meadeanah. Odan ho uqa meu hoil qei alesoanah, uqa meuqe bahin meanah.
Aid houqa uqa Iesus uqa dana aid sagcai hondeg matibahin ho uqa meu madean houqacan uqa doafa, uqa isdeanah, “Isa duga, Gugufu bahin isa Iesus uqau loto elcel houqa adi ho qutuadifig ho isafa esi meu mitec oigan!” Hocon, aid houqa Iesus gogodocgucisai beafa, uqa Iesus uqau loto qutuadeanah. Sain uqa loto ho qutuadedean bahin, uqa logac nean ho gatideanah.
Odan qei giec bahin, Iesus uqa gagadi odec uqau houqa uqa ho ulude wawan uqa deban doanah. Hocon Iesus uqa waldeafa uqa ocolieanah, “In isa qutuiteah?” Odan uqau ewel oc dana hoage waldeic maudeinah, “Dana aid matibahinag he alilciseseic, hoage ina gahalisecia ho ina fefegafa, ina elacicin, ‘In isa qutuiteah ega?’”
Aid houqa ben bahin cumunieafa, uqa qelelece uqa Iesus amuggu gatelac cefe bileanah. Odeafa, uqa ade odeafa uqa meu mulec oan houqacan uqa Iesus maudeanah. Odan Iesus uqa aid ho maudeanah, “Inau wawin cefec houqa ho ina meu miseah. Ina wawin meugu nuecale.”
Ifan uqacan totqec louqec heqa: Metiu 8:28-34; 9:20-22; Mak 5:1-20; 5:24b-34; Luk 8:26-39; 8:42b-48 hogude