Ifan Uqa Mil Abraham Uteian Le Made Qel Qeteanah

Nuean nuean itqecgu, ois, Israel dana aid hoage, Ifan uqa Mil Abraham Uteian Le Made Qel Qetean houqa onigan sain soanah. Iosua uqa feleu meciec dana elis sulalean, hoale Keinan hatu uqau taun ben hoil weni Ieriko ecia hogu nuehianah. Ieriko waubdec men gelgel cefe calildec houqa gagadi bahin nieanah. Taun ben hogu, aid hoil weni Rahab, odan uqa walbig aid, uqa feleu meciec dana elis hoale o lokumaleafa, uqa ehna oale malean nuehianah. Uqa Ifanun wacu cefec hocon uqa ho odeanah. Feleu meciec dana hoale, sain Israel hoage Ieriko taun ben hoqa alocie ifuliful denigangu hegu, hoale esi Rahab uqa sihul uqadeucai ho, hoale ofadehian ec le maude qel qetehianah.

Israelde dana aid hoage Iodan wa houqa matie waciafa, hoage esi Ifan uqa Mil Abraham Uteian Le Made Qel Qetean hogu wanigan. Odan Ifan uqa Iosua maudeanah, “Ihanec dana hoage oade meaden hi hagiecie.” Sain ihanec dana hoage faimagu Iodan wa lacudedecian, wa gocgucisai nea houqa ago oan, Israel dana aid hoage wa nahaicisai wanigan hocon, hoage mil kakanec taitac ocobeic wainah.

Sain Israel dana aid hoage Iodan wa matie wa nahaicisai wacianafa, Ifan uqa hoage Ieriko taun ben gagadi odeccai ho, hoage ade bahin utumdenigan ho, Ifan uqa Iosua maudeanah. Dana aid hoage Ifan ou totodec odeinah. Ifan odenigan madadeanah iwe, fan adec danacai, ihanec dana hoage Ieriko taun ben gagadi odeccai ho, hoage del osahi gude nuean del itanub (6) ho gemacu, hoage del osahi osahigu taun ben ho alildede, hoage talitaldedeic obe osahi osahi deinah.

Odean del besip (7) hogu qa, Israel dana aid hoage Ieriko taun ben ho alilde talitaldede obe 7 deinah. Sain hoage talitaldec 6 houqa hedeciafa, hoage 7 hogu hedenigan ocobeic qa, fan adec dana hoage utatadiecian, ihanec dana hoage qa taul fudeinah.

Odede niecian, men gelgel cefec Ieriko alildec niean ho alocie golodeanah! Israelde hoage Ifan madadeanah iwe, hoage taun ben ho iacul elcel niean ho unug alocie golodeinah. Hoage Rahabcai uqau sihul hoage adi qa tacewadeinah, odan hoage Israelde dana aid ibuldecianafa bileinah. Sain dana aid odacat Keinan hatugu biladecia hoage, Israel hoage Ieriko taun ben ho qe alocie golodein houqacan dociafa, Israel hoage ub hoagefa utumcadebilac hocon hoage ben bahin cumunieinah.

Ifan uqa Israel dana aid hoage, dana aid hoil gude am filfil hoage Keinan milgu bilecia hoagecai, hoage ub tanawe wawa osahi meic bilebilac hocon uqa gagadi bahin made ahacadeanah. Odan hoqa, dana aid am hoil Gibion adecia, hoage Keinan milgu bileciacai, hoage uleic hoageu masa ho, Keinan utuqanu qe, hoage bilecia ec hoage Iosua ulec le ho maudeinah. Israel hoage ub hoagecai fan adebilac hocon hoage Iosua uqa hoagecai , hoage wawa osahi mec houqau le ho louqebil noian hocon hoage Iosua ocolideinah. Iosuacai Israelde dana aid hoage, Gibion hoage hagude ho donigan ho hoage Ifan qei ocolideinah. Hocon Iosua uqa hoagecai, hoage qei fan adebilac ec wawa osahi mec uqau le ho hoage louqean noanah.

Sain Israel dana aid hoage, Gibion hoage uladeinah ec ho dociafa, hoage asisi gemana beanah. Odan hoqa, hoagecai qei fan ademunac eic, hoage wawa osahi meic le louqecian noan houqacan isdeinah, elacin, etacub houqa ho Ifan amuggu le made qel qeteinah. Sain odacat nueanafa, Keinan hatu gude dana aid am odacat bilein hoageu gude, dana aid am hoil Amor adeica hoageu gude King hoage, Gibion hoage wele Israelcai wawa osahi meinah ec dociafa, hoage fan adec dana ageu ageu ho oade soic haguadecian, fan adec dana ho am benahiac osahi adi alesoanah. Odeciafa hoage Gibion utumcadecian, Gibion hoage esuladec onigan hocon, hoage Iosuacai le suldeinah.

Hocon Iosua uqa Israelde fan adec dana hoage, uqa oade haguadean hoage wi ocobe nueic Gibion alewainah, odeic hoage eteu wele bahin Amorde fan adec dana utumcadecian hoage tigaleinah.

Del hogu, Ifan uqa Israelun meme uqa adeanah. Ifan uqa odean Amor hoage idadaliecian, uqa hau ohisde wa gagamug tec men ailel iwe benben ho suladean neic Amorde matibahin aqadean almeinah.

Ifan uqa Israel hoage sain ihoc ninieb, hoage fan adeic Amor hoage aqe golodenigan hoconafa, uqa odean cam uqa hau ohis osahigu adi taweanah. Del hogu, Ifan uqa Israel uqau fan houqa gutime uqa fan houqa qean hedeadeanah.

Ifan uqa fan adec dana am ho aqe hedeanafa, Keinande dana aid am odacat hoage Israel utumdenigan hocon, hoage osahigu adi soic gabandeinah. Odan Iosua uqa Israelde fan adec dana uqadeucai hoage aieic, hoagecai adeic hoage aqe golodeinah.

Fan adec heqa hedeanafa, Ifan uqa Mil Abraham oian Le Made Qel Qetec niea houqa, uqa Israel feifei 12 hoage osahi osahi hoage mil gati ageu ageu ehawe adeanah. Odeafa, Ifan uqa Israel uqau mil gadac hatu hoilcai niecia ho totodec ho, uqa dana aid hogu bileadecia hoage Israelcai ehele fan hoil ub niewan hocon, uqa odean hoage Israelcai wawa meugu bileinah.

Sain Iosua uqa dana toia meafa, uqa Israel dana aid unug egulenigan madean hoage eguleinah. Odean Iosua uqa Israel dana aid hoage Sinai Fohien hogu, Ifan uqa hoagecai le made qel qete gagadi mudean, hoage houqa totodec odenigan ec madein houqacan, hoage ub dahia elewan hocon madadeanah. Odan dana aid hoage Ifan uqacan adi dodoic, hoage uqau nun le adean ho totodec odenigan eic, hoage le made qel qeteinah.

Ifan uqacan totqec louqec heqa: Iosua 1 - 24