Wawa Cefec Tamanec Houqa Hananmea
Iesus uqa ehelawe hau ohis nueanafa, ewel oc dana uqadeu hoage qa, hoage Iesus madadeanah iwe hoage Ierusalem hogu nag bahin ode nieinah. Wawa cefec hondeg Ierusalem hogude hoage gaid ode inondenigan hocon so gabamdeic eguleinah.
Iar unug, Mehele Nuec (Pasowa) houqacan isdec del hogude bean del 50 oa hogu ho, Iuda hoageu del ben hoil Pentikos ecia houqacan isdedeic elubaec sain houqa soacai. Pentikos del houqa ho, Iuda dana aid hoage wit eli houqa walmeanafa, hoage agocian wa houqacan hoage isdedeic elubaeciahec. Iuda hondeg hatu filfilgu bileadeciacai hoage Ierusalem hogu adi gabamdeic, hoage Pentikos houqacan isdedeic elubaec hoageu ho mudadenigan hocon fahadeinah. Odan iar Iesus almeanahgu hogu qa, Iesus uqa ehelawe hau ohis nueanafa, ufu osahi ode hedeanafa Pentikos houqa soanah.
Sain wawa cefec hoage unug osahigu adi gabamdecianafa, qei giec bahin, lo hoage bileinahgu ho, wasali gagadi bahin soan udahu wa iwe hondeg, houqa lo hogu unug ihoc wanah. Odean etacub hoil lai iec belinag iwe houqa alade soic, wawa cefec hoage unug gatina ohis haluhaleic taweinah. Odan hoage unug Kis Gun uqau gagadi odec ho hoage oadean tacean, hoage hanameic odacat ageu legu hoage le madeinah.
Odan sain Ierusalemde dana aid hoage udahu houqa dahmeciafa, dana aid hoage elaci alesoso odea ec ho fecunceciafa hoage fahadeinah. Sain dana aid hoage, wawa cefec hoage Ifan uqa abi benben odean alesoan houqacan, hoage amasac qasale mamadecian dahmadeciafa, hoage ona atage neanah, elacin, hoage elcel houqacan ho le ageucat hogu madadedecian dahmadeinah.
Dana aid leih hoage qa, hoage Iesus uqau ewel oc dana hoage wa gagadi ho lecian iloma ifuldeah ec le ho um aqeinah. Odan hoqa, Pita uqa aie taweafa madadeanah, “Isa dahmitecie! Dana heage qei wa gagadi ho lecian iloma ifuldeah! Etacub heuqa Ifan uqau le ahun madec dana weni Ioel, uqa le ahun madeanahgu uqa Ifan uqa le madeanah, 'Sain qeimec ho nieiangu hogu, isa esi Kis isau houqa felademin uqa esi abi odeian' ec madean ho, he houqa ihoc mudec ho alesoa.'‘
“Israelde dana aid age, Iesus uqa ho dana uqa Ifan uqau gagadi odecgu, uqa dado gagadi odec ahulec odan mecidec meu bahin wawa aieanahcai houqa, uqa ho mudadean alesocian age ho mecideinahcai hocon age ho docia. Odan hoqa, agecen bahin uqa na babalecgu qecian uqa almeanah.”
“Gugufu Iesus uqa almeanah, odeanqa, Ifan uqa Iesus almec gude tulidean aieanah. Ho odeanahgu hogu, le ahun ede madec niea, 'Ifan ina esi qei inau Gun Bahin houqa uluden uqa felgu moliewan’ ec le ahun houqa ho ihoc mudeanah. Odan ige gugufu bahin, Ifan uqa Iesus almean ho tulidean ehelawe aie eawac bilea ec ho, ige amigegu feun hocon qasale madeqa.”
“Ifan uqa qil Iesus ohisdean teahan, uqa Memige Ifan uqau leben meulifain houqa ho uqa bilea. Odan Iesus uqa esi Kis Gun suldeian ec uqa le made qel qeteanah iwe, uqa Kis Gun suldeah. Age qil elcel he fefeadeic dahmeadecia heuqa ho, Kis Gun uqa he odedean elcel he alesoadecia.”
“Age dana Iesus houqa age uqa na babalecgu qecian almeanah. Oda hoqa, Ifan uqa odean Iesus uqa adi ho uqa ilo Ben ahiac igeu bilea, odan uqacat adi ho uqa Mesaia ec ho, age ho gugufu bahin ec ho docie."
Dana aid Pita dahmulein hoage Pita uqa elcel houqacan le madean ho odean, hoage ben bahin ode wawa aieanah. Ode hocon, hoage Pita uqacai, ewel oc dana leih hoage ocoli adeinah, “Otigeil, ige elaci ade hoil odecun?”
Odan Pita uqa hoage madadeanah, “Age unug bahin, age qisolmec kobol ho cuculeic wawa falideciafa, Iesus Kristus wenigu age wa loadec onigan, age ho odebil Ifan uqa esi ageu qisolmec ho agase adede houqacan qei isdewan. Odede uqa esi idacdec igec Kis Gun uqau gude soa hofa ho esi age adeian.
3,000 dana aid ode, hoage Pita uqa le madean houqacan hoage wawa cefeciafa, hoage Iesus uqau ewel oc dana aid alesoinah. Hoage wa loadec ociafa, hoage wawa cefec osahi hoageu tamanec Ierusalemde hoagecai bileinah.
Dana aid wawa cefec qildec hoage qa gaid ode so dana hanuqecgu ewel oc dana bilein hoage aposel alesociafa, hoage iwaladein hoqa dahmemeic hoage aposel hoagecai ilam gabamdeic, hoage sain nag bahin ode hoagecai ilam bibileic, eli ilam leleic, hoagenanan hoage hoil inondulean inondulean einah. Hoage ilam gabamdeic Ifan weni ohisdec houqacan ho hoage wawa elubaeanah, odedeic hoage elcel hoageu unug ho hoage gemacu hoilcai ehawe utean uteaneinah. Dana aid unug hoagecen ho meu bahin odecia ec ho doadeinah. Del unug gaid ode dana aid matibahin soic Iesusun wawa cefeinah.
Ifan uqacan totqec louqec heqa: Aposel 2 hogude