Dalie Wadau Mil Igis Adi Kakanec Hogu Obecia

Ifan uqa Israel dana aid hoagecai uqa le made qel qete gagadi mudean hogu, uqa hoage nun le uqadeu ho, hoage totode odenigan houqacan hofa uqa madade hedeanafa, hoage Sinai Fohien ho uludeinah. Ifan uqa hananme hanuqe hoage mehade, uqa Mil Abraham Uteian Le Made Qel Qetean houqa mil ho weni Keinan ec hofa madecia, houqa totomudeic nueinah. Tain tutu adi qafule tawean houqa hagie Keinan totomude nunuean hoage totodeinah.

Ifan Uqa Mil Abraham Uteian Le Made Qel Qetec niea houqa ho uqa Abrahamcai, Aisakcai, odan Iakobcai, ho, uqa esi hoageu sihul sihul alesonigan hoage adeian ec madadeanah. Odan hoqa qil, mil hogu ho dana aid am filfil gude matibahin hoage hogu biladeinah. Dana aid hoage ho Keinan dana aid ec madadecia. Keinan dana aid hoage qei Ifan binainig mudeciacai, o, hoage uqau le hofa qei totodec odecia. Hoage ulec manecet ho binainima mumudeic, hoage silail kobol meuqe meuqe hondeg ho matibahin mudadeinah.

Ifan uqa Israel dana aid madadeanah, “Age Keinande dana aid hoage Mil Abraham Uteigan Le Made Qel Qetec niea hogu biladecia ho, age hoage unug bahin itatacadebil nuadecial. Age hoagecai hoil ub wawa osahi meic wawa meu niecgu bilebilac, odeic, age hoageu gude dana o aid ub oadebilac. Age hoageu kadan ho unug bahin alocie golodeadecial. Age isa oni he qei totode odefeic, age esi isa binainimi mudec ho cuculeic qa, age hoageu kadan ho binainima mudenigan.”

Odan sain Israel dana aid hoage fahe Keinan uqau mil gadac niea hogu alesociafa, Moses uqa dana 12 hoage Israel hatu uqau masa gati 12 hogude osahi osahi, uqa hoage meciade feade gawoadeanah. Uqa dana hoage nueic hoage gaul ode obeqa eic, feleu mecieic hoage Keinan mil adaha ho fenigan hocon, uqa isdec houqa adeanah. Hoage Keinande hoage gagadi odeccai, o , hoage gagadi odeccaiqeif houqacan hofa, hoage gaul obeqa eic feleu mecideic fenigan madadeanah.

Dana 12 hoage Keinan hatu iacul 40 del obeciafa, hoage ehele faheinah. Odeic hoage dana aid madadeinah, “ Keinan mil ho mil muhuccai bahinag odan elifo elcel matibahin niea!” Odan hoqa, feleu mecie obec dana 12 hoageu gude dana 10 hoage qa madeinah, “Taun benben hoageu ho gagadi bahinag. Odan odan dana hogude hoage qa ho itoec docanacai, hoage dewa tehiec! Ige hoage utum adeqaefeb, gugufu bahin, hoage esi ige qige golodenigan, odeic ige qigebil almecun!"

Odan qeigiec bahin, Kalepcai Iosua, hoale feleu mecie obec dana elis hoale qa madehianah, "Ho gugufu, Keinan dana hoage itoec, docanacai, odan dewena ho tehiec, oda hoqa, gugufu bahin ige esi ihoc hoage aqade golodecun! Ifan uqa esi igecen meme adeian!”

Odan hoqa, dana aid hoage Kalebcai Iosua aleu le ho qei faleinah. Hoage Mosescai Aron hoalecen qa gemana beanah, odeic hoage madeinah. “Ale elacicin aben elianigcai qei meuqe hegu ige mehige fahehianah. Ige Isip hogu bilecmeali qa, fangu dana ige qei qigebil almememun, ige aidenigeilcai himenigeil qa hoage begabeg abi dana aid alesonigan oadebih.” Odeic Israel dana aid hoage, hoageu hanuqec dana fil hoil mecide gawobilafa, uqa hoage haun ehelawe mehade Isip nueian galedeanah.

Ifan uqa gemag asisi bahin beanafa, uqa Egule Le Madec Talabes hogu neanah. Ode Ifan uqa madeanah, “Age isa facalisani bilecun ulecia hocon, dana aid unug bahin esi bilec gugcai qe hoage daliec wadau mil igis adi kakanec hogu obenigan. Odedeb qa Iosuacai Kaleb hoale qa qea, ini unug iar hoageu 20 iar, o, holimde tec hoage qa hogu almenigan, odeb hoage qei Mil Abraham Oian Le Made Qel Qetec niea hogu wabilac."

Sain dana aid hoage le ho dahmeciafa, hoage qisol mebah eciafa hoage wawawi einah. Hoage fan adecun elcel acicai hoageu ho oadeciafa, hoage Keinan dana aid utum adenigan nueinah. Moses uqa hoage ub nuebilacan ahac adeanah, elacin, Ifan uqa hoage felacadeanah. Odan hoqa, hoage Moses uqau le ho qei faleinah.

Odan Ifan uqa hoagecai qei fan adec houqagu nuean, hocon hoage qanagilecian hoageu gude matibahin aqecian almeinah.Odean Israelde dana aid hoage Keinan uludeciafa, hoage walde soic, hoage 40 iar wadau hogu dalie obeinah.

Sain Israelde dana aid hoage 40 iar ho iacul wadau hogu dalie obeinahgu, Ifan uqa hoage elaci hoilun qutuebilac hocon uqa elcel saiade adeanah. Uqa bret hau ohisde weni "mana" ecia houqa, uqa hoage lenigan hocon saiade adeanah. Ifan uqa Israel hoage eqaf ufun lenigan hocon uqa hai weni kueil ecia ho, (odan hai hoqa benahiac bahin qe, odan alanig bahin qe, uqa gemacu), uqa houqa suladean hoage Israel ageu talabes nieadeinahgu noinah. Sain etacub ho nieanahgu hogu, Ifan uqa hoage dewa lahuldenigan loto elcelcai, sendel faimagu taqoin ho, ub qeigiec silmeafa basilecadewan hocon, uqa ofde adeanah.

Ifan uqa gagadi odec dadomec uqaugu, uqa hoage wa men gude hofa adeanah. Oda hoqa uqa ho odean ho fefeciafa, Israelde dana aid hoage Ifancai Moses gonacaleleic, hoalecen gemana bebean le coinah. Ho odedecianafa, Ifan uqa le qel qetec uqadeu uqa Abrahamcai, Aisakcai, odan Iakobcai mudean houqacangu ho, uqa hoage qei uladel.

Odan sain hoilgu, sain dana aid hoage wacai qe bilecianfe, Ifan uqa Moses maudeanah, “Men le mauden wa esi hogude alesoian.” Odan hoqa, Moses uqa dana aid unug amagu uqa Ifan maudeanah iwe uqa ou qei totode mudeanah, odede qa uqa men le maudecun cucule, uqa kobaigu men qe elis deanah. Dana aid hoage unug wa lenigan hocon men hogude wa alesoanah, odan hoqa, Ifan uqa Mosesun gemag beanafa uqa madeanah, “Ina Mil Onigan Le Made Qel Qetec niea hogu ina esi qei wanac.”

Israelde dana aid hoage mil wadau igis adi kakanec hogu dalie ocobecian 40 iar nue hedeanafa, dana aid ini Ifan facalicanig bilecun uculeic uqau le fedeinahcai hoage unug bahin alme hedeinah. Odeanafa, Ifan uqa dana aid hanuqe adean nueic, Uqa Abraham Mil Uteian Le Madean Qel Qetean ho, hoage mil houqau medeu fahe soan hogu haun ehele alewainah. Ois, Moses uqa wele toia bahin mean hocon, Ifan uqa Iosua uqa Moses esuldule, uqa dana aid hanuqe mehade nueian hocon uqa gawoanah. Ifan uqa esi sain hoil uqa Ifan uqau le ahun madec dana hoil, uqa Moses iwecet hoil suldeb soian ec houqacanafa uqa Moses le maude qel qeteanah.

Ode, Ifan uqa, Moses uqa fohien hoilgu uqa hoil efeugu hogu teafa, hogu uqa esi ihoc Ifan uqa Mil Abraham Uteian Le Made Qel Qetean houqa feian ec maudeanah. Moses uqa amuggu adi, uqa Ifan uqa Abraham Mil Uteian Le Made Qel Qetean houqa feanah, odan hoqa, Ifan uqa Moses uqa mil hogu wacun ho qei ois duleanah. Odean Moses uqa almeanafa, Israel dana aid hoage uqacan 30 del hoage gehel nieinah. Odan Iosua uqa hoageu hanuqec ilo dana qilde bileadeian alesoanah. Iosua uqa hoageu hanuqec dana meu bahin, elacin uqa ho uqa Ifan adi ho uqa ihoc ec ho dodoude, uqa Ifan uqau le ho totodec odeanah.

Ifan uqacan totqec louqec heqa: Ehelawe Oc 16-17; Haniwadec 10-14; 20; 27; Nun Le 34 hogude